މަސައްކަތު މާހައުލުގެ ރައްކާތެރިކަމާއި ގުޅޭ މަޝްވަރާ ބައްދަލުވުން ބާއްވައިފި
24 ޑިސެމްބަރު 2020 | ބުރާސްފަތި 23:42މަސައްކަތާއި ގުޅޭ ސަލާމަތީ އާލާތްތައް ބޭނުންކުރުމާއި ގުޅޭގޮތުން މުވައްޒަފުން އަހުލުވެރިކުރުމާއި ތަމްރީން ކުރުމުގެ މުހިންމުކަމާއި ބެހޭ ގޮތުން ވަނީ މަޝްވަރާކޮށްފައި
މަސައްކަތުގެ މާހައުލުގެ ރައްކާތެރިކަމާއި ގުޅޭ މަޝްވަރާ ބައްދަލުވުމުގެ ތެރެއިން
މަސައްކަތު މާހައުލުގެ ސަބަބުން ޖެހޭ ބަލިތަކާއި ހިނގާ ނުރައްކާތެރި އެކްސިޑެންޓްތައް މަދުކޮށް މަސައްކަތު މާހައުލަކީ ރައްކާތެރި ތަނަކަށް ހެދުމަށް މަސައްކަތްތެރިންނާއި މަސައްކަތް ކުރުވާ ފަރާތްތައް އަހުލުވެރިކުރުމަށްޓަކާ ޕަބްލިކް އިންޓްރަސްޓް ލޯ ސެންޓަރ، އަދި ހެލްތު ޕްރޮޓެކްޝަން އެޖެންސީން ކުރިއަށް ގެންދާ އޮކިއުޕޭޝަނަލް ސޭފްޓީ އެންޑް ހެލްތު ކެންޕޭންގެ ހަރަކާތެއްގެ ގޮތުން މަސައްކަތު މާހައުލުގެ ރައްކާތެރި ކަމާއި ގުޅޭ މަޝްވަރާ ބައްދަލުވުން ބާއްވައިފިއެވެ.
މިބައްދަލުވުމުގައި ސަރުކާރުގެ މުވައްސަސާތަކުގެ އިސްވެރިންނަށާއި ސަރުކާރު ހިއްސާވާ އަދި ޕްރައިވެޓް ކުންފުނިތަކާއި އަދި އަމިއްލަ ޖަމިއްޔާ ޖަމާޔަތަކުގެ އިސްވެރިންނަށް މަސައްކަތު މާހައުލުގެ ސަބަބުން ޖެހޭ ބަލިތަކާއި ކުރިމަތިވާ ނުރައްކާތަކާއި ބެހޭގޮތުންނާއި، ރައްކާތެރިކަން ކަށަވަރު ކުރުމުން ލިބިގެންދާ ފައިދާ ތަކާއި މަސައްކަތު މާހައުލަކީ ރައްކާތެރި ތަނަކަށް ހެދުމަށް އެޅިދާނެ ފިޔަވަޅުތަކާ ބެހޭ ގޮތުން މަޢުލޫމާތު ވަނީ ހިއްސާކުރެވިފައެވެ. އަދި މަސައްކަތު މާހައުލަގެ ރައްކާތެރިކަން ކަށަވަރުކުރުމަށް މުވައްސަސާތަކުން ކުރެވިދާނެ މަސައްކަތްތަކާއި އަދި ސަރުކާރުގެ ގުޅުންހުރި މުވައްސަސާތަކާއި އެކުގައި ކުރެވިދާނެ މަސައްކަތްތަކާ ބެހޭ ގޮތުން ވަނީ މަޝްވަރާ ކޮށްފައެވެ.
މިބައްދަލުވުމުގައި އެކި މުވައްސަސާތަކުގައި ހިނގާފައި ހުރި ނުރައްކާތެރި ހާދިސާތަކުގެ މައްޗައް ވަނީ އަލި އަޅުވާލާފައެވެ. މަސައްކަތު މާހައުލުގެ ސަލާމަތާއި ރައްކާތެރިކަން ކަށަވަރުކުރުމުގެ ގޮތުން ކުރެވިދާނެ ކަންތައްތަކުގެ ތެރެއިން، ވަޒީފާދޭ ފަރާތުން މަސައްކަތު މާހައުލުގެ ރައްކާތެރިކަމުގެ އާލާތްތައް ފޯރުކޮށް ދިނުމުގެ މުހިންމުކަމާއި، މަސައްކަތުގައި އުޅޭވަގުތުތަކުގައި ނުރައްކާތެރި ހާލަތްތައް ދެނެގަންނަން އެނގުމާއި، މަސައްކަތާއި ގުޅޭ ސަލާމަތީ އާލާތްތައް ބޭނުންކުރުމާއި ގުޅޭގޮތުން މުވައްޒަފުން އަހުލުވެރިކުރުމާއި ތަމްރީން ކުރުމުގެ މުހިންމުކަމާއި ބެހޭ ގޮތުން މަޝްވަރާ ކުރެވުނެވެ.
ހަމައެއާއެކު، މި ބައްދަލުވުމުގައި މަސައްކަތު މާހައުލުގެ ސަލާމަތާއި ރައްކާތެރިކަން ކަށަވަރުކުރުމުގައި އެކި މުވައްސަސާތަކުގައި ހުރި ގޮންޖެހުންތައްވެސް ވަނީ ފާހަގަކުރެވިފައެވެ. އަދި ހާއްސަ އިސްކަމެއް ދީގެން މަސައްކަތު މާހައުލުގެ ސަލާމަތާއި ރައްކާތެރިކަން ކަށަވަރުކުރުމުގައި "މަސައްކަތްތެރިންގެ ސަލާމަތާއި ރައްކާތެރި ކަމުގެ ބިލް" ފާސްކޮށް ތަންފީޒް ކުރުމަކީ ކޮންމެހެން ކުރަންޖެހޭ ކަމެއްގެ ގޮތުގައި ހުރިހާ ބައިވެރިންވެސް ފެންނަކަމަށް ވަނީ ނިންމައިފައެވެ. އަދި މިނިސްޓްރީ އޮފް އެކޮނޮމިކް ޑިވެލަޕްމަންޓުންން 2021 ވަނަ އަހަރުގައި މަސައްކަތުމާހައުލުގެ ސަލާމަތާއި ރައްކާތެރިކަމުގެ ބިލް ފާސްކުރުމާއި މަސައްކަތު މާހައުލުގެ ސަލާމަތާއި ރައްކާތެރިކަން ކަށަވަރުކުރުމަށް ގިނަ މަސައްކަތްތަކެއް ކުރިއަށް ގެންދިއުމަށް ރޭވިފައިވާކަން ވަނީ ހާމަކޮށްފައެވެ.
