ހަތަރު ދާއިރާއަކަށް ދާއިރާގެ އިސްމެޖިސްޓްރޭޓުން ކަނޑައަޅައިފި
24 ޑިސެމްބަރު 2020 | ބުރާސްފަތި 15:47ހދ. ޖުޑީޝަލް ދާއިރާގެ އިސްމެޖިސްޓްރޭޓް ކަމަށް، ހދ. ކުޅުދުއްފުށި، އަލީޝާ، ޢަލީ އާދަމް
ޖޭއެސްސީ: މިމަހުގެ 22 ވަނަ ދުވަހު ބޭއްވި ބައްދަލުވުމުގައި ވަނީ ޖުޑީޝަލް ހަތަރު ދާއިރާއަކަށް އިސްމެޖިސްޓްރޭޓުން އައްޔަން ކުރަން ނިންމާފައި
ހަތަރު ޖުޑީޝަލް ދާއިރާއަކަށް އިސްމެޖިސްޓްރޭޓުން ޢައްޔަނުކުރައްވައިފި އެވެ.
ޖުޑީޝަލް ސަރވިސް ކޮމިޝަން (ޖޭއެސްސީ)ން ބުނީ، ދާއިރާ އިސްމެޖިސްޓްރޭޓުން ހޯދުމަށް އެ ކޮމިޝަނުން ކުރި އިޢުލާނުގެ ދަށުން އެމަޤާމުތަކަށް ކުރިމަތިލީ ފަރާތްތަކުގެ ތެރެއިން މަޤާމަށް އެންމެ ޤާބިލް ބޭފުޅެއް ހޮވުމަށްޓަކައި އިންޓަވިއު ކުރުމަށްފަހު ހަތަރު ޖުޑީޝަލް ދާއިރާއަކަށް، ދާއިރާ އިސްމެޖިސްޓްރޭޓުން މިމަހުގެ 22 ވަނަ ދުވަހު ބޭއްވި އެ ކޮމިޝަންގެ ބަންދަލުވުމުގައި ނިންމާފައިވާ ކަމަށެވެ.
އެގޮތުން، ހދ. ޖުޑީޝަލް ދާއިރާގެ އިސްމެޖިސްޓްރޭޓް ކަމަށް، ހދ. ކުޅުދުއްފުށި، އަލީޝާ، ޢަލީ އާދަމް އަންޔަން ކުރައްވާފައިވާއިރު، އދ. ޖުޑީޝަލް ދާއިރާގެ އިސްމެޖިސްޓްރޭޓް ކަމަށް، ކ.މާލެ، މއ. ވެލަބުލިގެ، އިބްރާޙީމް މަޢުމޫރު އައްޔަން ކުރައްވާފައިވެއެވެ. އަދި ގއ. ޖުޑީޝަލް ދާއިރާގެ އިސްމެޖިސްޓްރޭޓް ކަމަށް، ސ. މަރަދޫ، އެށެވެލި، އިބްރާޙީމް އިޙްސާން އައްޔަން ކުރައްވާފައިވާއިރު، ގދ. ޖުޑީޝަލް ދާއިރާގެ އިސްމެޖިސްޓްރޭޓް ކަމަށް، ގދ. ތިނަދޫ، މުނިޔާގެ، މުޙައްމަދު ޒާހިރު ޙަސަން އައްޔަން ކުރައްވާފައިވެއެވެ.
ޖޭއެސްސީން ބުނީ، ހދ. ޖުޑީޝަލް ދާއިރާގެ އިސްމެޖިސްޓްރޭޓް ކަމަށް ޢައްޔަނު ކުރުމަށް ނިންމި، ޢަލީ އާދަމް ވަނީ ވިލާ ކޮލެޖް އިންބެޗްލަރސް އޮފް ޝަރީޢާ އެންޑް ލޯ ހާޞިލްކުރައްވާފަ ކަމަށެވެ. އަދި ޢަލީ އާދަމަކީ ފަނޑިޔާރުކަމުގައި 15 އަހަރު ދުވަހުގެ ތަޖުރިބާ ލިބިވަޑައިގެންފައިވާ މެޖިސްޓްރޭޓެއް ކަމަށްވެސް ޖޭއެސްސީން ބުނެފައިވެއެވެ.
މީގެއިތުރުން، އދ. ޖުޑީޝަލް ދާއިރާގެ އިސްމެޖިސްޓްރޭޓް ކަމަށް ޢައްޔަނުކުރުމަށް ނިންމި، އިބްރާޙީމް މަޢުމޫރު ވަނީ ވިލާކޮލެޖް އިން ޑިޕްލޮމާ އިން ޝަރީޢާ އެންޑް ލޯ ހާޞިލްކުރައްވާ ކަމަށާއި ފަނޑިޔާރުކަމުގައި 10 އަހަރު ދުވަހުގެ ތަޖުރިބާ ލިބިވަޑައިގެންފައިވާ މެޖިސްޓްރޭޓެއް ކަމަށް ޖޭއެސްސީން ބުނެއެވެ. އަދި ގއ. ޖުޑީޝަލް ދާއިރާގެ އިސްމެޖިސްޓްރޭޓް ކަމަށް ޢައްޔަނުކުރުމަށް ނިންމި، އިބްރާޙީމް އިޙްސާން ވަނީ ދިވެހިރާއްޖޭގެ ޤައުމީ ޔުނިވާސިޓީން ބެޗްލަރ އޮފް ޝަރީޢާ އެންޑް ލޯ (އޮނާރސް) ހާޞިލްކުރައްވާފައި ކަމަށާއި ފަނޑިޔާރުކަމުގައި ދެ އަހަރު ދުވަހުގެ ތަޖުރިބާ ލިބިވަޑައިގެންފައިވާ މެޖިސްޓްރޭޓެއްކަމަށް ޖޭއެސްސީން ބުނެއެވެ.
ގދ. ޖުޑީޝަލް ދާއިރާގެ އިސްމެޖިސްޓްރޭޓް ކަމަށް ޢައްޔަނުކުރެވުނު މުޙައްމަދު ޒާހިރު ޙަސަން ޑިޕްލޮމާ އިންޝަރީޢާ އެންޑް ލޯ ހާޞިލްކުރެއްވީ މޯލްޑިވްސް ކޮލެޖް އޮފް އިސްލާމިކް ސުޓަޑީސްޒުންކަމަށާއި ފަނޑިޔާރުކަމުގައި 21 އަހަރު ދުވަހުގެ ތަޖުރިބާ ލިބިވަޑައިގެންފައިވާ މެޖިސްޓްރޭޓެއް ކަމަށްވެސް ޖޭއެސްސީން ބުނެފައި ވެއެވެ.
