އެއް ޓީމަކަށް އެންމެ ގިނަ ލަނޑު ޖަހައިގެން ބްރެޒިލުގެ ލެޖެންޑް ޕެލޭ ހަދާފައިވާ ރިކޯޑު ބާސެލޯނާގެ ކެޕްޓަން ލިއޮނެލް މެސީ މުގުރާލައިފިއެވެ.

ޕެލޭގެ ރިކޯޑު މެސީ މުގުރާލީ ސްޕެނިޝް ލީގުގައި އަންގާރަ ދުވަހުގެރޭ ރެއާލް ވަޔަޑޮލިޑް އަތުން 3-0 ގެ ނަތީޖާއަކުން ބާސާ މޮޅުވި މެޗުގައެވެ.

ރަށުން ބޭރުގައި ކުޅުނު މި މެޗުގައި ބާސާއިން މޮޅު ކުޅުމެއް ދެއްކިއިރު، މެޗުގެ 21 ވަނަ މިނެޓުގައި އެ ޓީމުން ވަނީ ލީޑު ނަގާފައެވެ. މެސީ ހުރަސްކޮށްދިން ބޯޅައަކުން މި ލަނޑު އެ ޓީމަށް ކާމިޔާބުކޮށްދިނީ ޑިފެންޑަރު ކްލެމެންޓް ލޯންގްލޭއެވެ. އަދި މެޗުގެ 35 ވަނަ މިނެޓުގައި ސާޖީނިއޯ ޑެސްޓުގެ އެހީއާއެކު ފޯވާޑް މާޓިން ބްރެއިތުވެއިޓް ވަނީ ބާސާއަށް ލީޑު ފުޅާކޮށްދީފައެވެ.

މި މެޗުގައި މެސީ ލަނޑު ޖެހީ މެޗުގެ 65 ވަނަ މިނެޓުގައި ޕެޑްރީ ދިން ޕާހަކުންނެވެ. މި ލަނޑާއެކު މެސީ ވަނީ ބާސާގެ ޖާޒީގައި ޖުމްލަ 644 ލަނޑު ހަމަކޮށް ޕެލޭގެ ރިކޯޑު މުގުރާލާފައެވެ. މީގެ ކުރިން އެއް ޓީމަކަށް އެންމެ ގިނަ ލަނޑު ޖަހައިގެން ޕެލޭ ރިކޯޑު ހަދާފައި އޮތީ ބްރެޒިލުގެ ސަންތޯސްއަށް 1956 ވަނަ އަހަރުން ފެށިގެން 1974 ވަނަ އަހަރުގެ ނިޔަލަށް ކުޅުނު ދުވަސްވަރު 656 މެޗުން 643 ލަނޑު ޖަހައިގެންނެވެ. މެސީ އެ ރިކޯޑު މުގުރާލީ ބާސާއަށް ކުޅެދިން 749 މެޗުންނެވެ.

ބާސާގެ ސީނިއާ ޓީމުން 2004 ވަނަ އަހަރު ކެރިއަރު ފެށި މެސީއަކީ ބާސާގެ ތާރީޚުގައިވެސް އެޓީމަށް އެންމެ ގިނަ ލަނޑު ޖަހާދީފައިވާ ކުޅުންތެރިޔާއެވެ. އަދި އޭނާ ވަނީ ބާސާއާއެކު ސްޕެނިޝް ލީގު 10 ފަހަރު، އަދި ޔުއެފާ ޗެމްޕިއަންސް ލީގު ހަތަރު ފަހަރު ހޯދާފައެވެ.

ސްޕެނިޝް ލީގުގައި އަންގާރަ ދުވަހުގެރޭ ކުޅުނު މެޗުން ބާސާ މޮޅިވިއިރު، އެ ޓީމު އޮތީ 14 މެޗުން 24 ޕޮއިންޓާއެކު ތާވަލުގެ ފަސްވަނައިގައެވެ. ތާވަލުގެ އެއްވަނައިގައި އޮތީ 13 މެޗުން 32 ޕޮއިންޓް ހޯދާފައިވާ އެތުލެޓިކޯ މެޑްރިޑެވެ. އެ ޓީމު ވަނީ އަންގާރަ ދުވަހުގެރޭ ރެއާލް ސޮސިއެޑާޑް އަތުން 2-0 ން މޮޅުވެފައެވެ. އަދި ތާވަލުގެ ދެވަނައިގައި 14 މެޗުން 29 ޕޮއިންޓާއެކު ރެއާލް މެޑްރިޑް އޮތްއިރު، ތިންވަނައިގައި އޮތީ 16 މެޗުން 26 ޕޮއިންޓާއެކު އޮތް ސޮސިއެޑާޑެވެ.