ކުލަބު އީގަލްސްގެ ހުނަރުވެރި ފޯވާޑް އަޙްމަދު ރިޒުވާން (ރިޒޭ) ގެ ކަކުލަށް ލިބުނު އަނިޔާ ސީރިއަސް ކަމަށް އެ ޓީމުގެ ކޯޗު މުޙައްމަދު ޝިޔާޒް (މޯހަން) ބުނެފިއެވެ.
ރިޒޭގެ ކަކުލަށް އަނިޔާވީ ރާއްޖޭގެ ފުޓްބޯޅަ ސީޒަން ފެށުމަށް ކުޅުނު އެފްއޭ ޗެރިޓީ ޝީލްޑް މެޗުގައެވެ. އެ މެޗުގައި ފަހަތުން އަރައި 3-2 ގެ ނަތީޖާއަކުން މާޒިޔާ ސްޕޯޓްސް އެންޑް ރެކްރިއޭޝަން ބަލިކޮށް އީގަލްސްއިން މުޅިން އަލަށް ޗެރިޓީ ޝީލްޑް ކާމިޔާބުކުރިއިރު، އެ މެޗުގައި ރިޒޭ ވަނީ މޮޅު ކުޅުމެއް ދައްކާފައެވެ. އެގޮތުން އެ މެޗުގައި ރިޒޭ ވަނީ އެއް ލަނޑު ޖަހައި، އަނެއް ދެ ލަނޑު ޖަހަން ފުރުސަތު ތަނަވަސްކޮށްދީފައެވެ. އެކަމަކު މެޗުގެ ފަހުކޮޅު އަނިޔާއާ ގުޅިގެން ރިޒޭ ވަނީ ބަދަލުކޮށްފައެވެ.
ރިޒޭގެ ކަކުލަށް ލިބުނު އަނިޔާއާ ގުޅިގެން ދިރާގު ދިވެހި ޕްރިމިއާ ލީގުގައި އީގަލްސްއިން މިހާތަނަށް ކުޅުނު ދެ މެޗުގައިވެސް އޭނާ ކުޅެފައެއް ނުވެއެވެ. އަދި މި ދެ މެޗުން އީގަލްސް ވަނީ ބަލިވެފައެވެ. އެގޮތުން ފުރަތަމަ މެޗުގައި ލީގުގައި އަލަށް ވާދަކުރަމުން އަންނަ ސުޕަ ޔުނައިޓެޑް ސްޕޯޓްސް (ސަސް) އަތުން 1-0 ން އީގަލްސް ބަލިވިއިރު، އާދީއްތަ ދުވަހުގެރޭ ޓީސީ ސްޕޯޓްސް ކުލަބު އަތުން އީގަލްސް ބަލިވީ 2-0 ގެ ނަތީޖާއަކުންނެވެ.
އާދީއްތަ ދުވަހުގެރޭގެ މެޗަށްފަހު މޯހަން ބުނީ ރިޒޭގެ ކަކުލަށް ލިބުނު އަނިޔާ ސީރިއަސް ކަމަށާއި، ރިޒޭއަށް ކުޅުމުގެ ތެރެއަށް އެނބުރި އާދެވޭނެ ދުވަހެއް ބުނަން އެނގޭނީ 10 ނޫނީ 15 ވަރަކަށް ދުވަސް ފަހުން ހަދާ ޓެސްޓުތަކަށްފަހު ކަމަށެވެ. އަދި ރިޒޭ ނެތުމުން މުޅި ޓީމުގެ މޮޓިވޭޝަން ވަރަށް ބޮޑަށް ދަށްވެފައިވާ ކަން މެޗުތަކުން ފާހަގަވާ ކަމަށާއި، ރިޒޭ ނެތް ދެ މެޗުގައިވެސް ލަނޑު ޖަހަން ރަނގަޅު ފުރުސަތުތަކެއް ލިބި ބޭނުން ނުހިފުނު ކަމަށްވެސް މޯހަން ބުންޏެވެ.
މޯހަން އިތުރަށް ބުނީ ރިޒޭގެ އިތުރުންވެސް އެ ޓީމުގައި އަނިޔާގެ ގިނަ މައްސަލަތަކެއް އެބަހުރި ކަމަށާއި، އެގޮތުން އެ ޓީމުގެ ހަސަން ރާއިފް އަޙްމަދު (ހަންނަ) އާއި އަޙްމަދު ނޫމާން (ހެލްމެޓް) ވެސް ތިބީ އަނިޔާގައި ކަމަށެވެ. މޯހަން މިހެން ބުނިއިރު، އީގަލްސްއިން އާދީއްތަ ދުވަހުގެރޭ ކުޅުނު މެޗު ފެށީ ނޫމާން ބެންޗުގައި ބައިންދައިގެންނެވެ. އެކަމަކު ފުރަތަމަ ހާފުގައި އިތުރު ގޮތެއް ނެތިގެން ނޫމާން ވަނީ ކުޅެން އަރުވާފައެވެ.
ލީގުގައި ކުޅުނު ފުރަތަމަ ދެ މެޗުންވެސް އީގަލްސް ބަލިވެފައިވާއިރު، ލީގުގައި އީގަލްސް ދެން ކުޅޭ މެޗުގައި ހުކުރު ދުވަހު ހަވީރު ނުކުންނާނީ ދަ ގްރާންޑޭ ސްޕޯޓްސް ކުލަބާ ދެކޮޅަށެވެ.
