މޯލްޑިވްސް މެރިން އެކްސްޕޯ 2020 ފަށައިފި، މިފަހަރު ވާޗުއަލްކޮށް
ޑިސެމްބަރު މަހުގެ 20ން ފެށިގެން 22ށް އެކްސްޕޯ ކުރިއަށްދާނެ
އަލްޝާލީ މެރިންގެ އެކްޝަން 25 ފިޝިންގ ލޯންޗް - މިއީ މިދިޔަ އަހަރުގެ އެކްސްޕޯގެ އެންމެ މޮޅު އުފެއްދުން
މޯލްޑިވްސް މެރިން އެކްސްޕޯ 2020 ފަށައިފިއެވެ.
މި ހިނގާ ޑިސެމްބަރު މަހުގެ 20ން ފެށިގެން 22ށް ކުރިއަށްދާ މި އެކްސްޕޯ ރަސްމީކޮށް ފައްޓަވައިދެއްވީ މިނިސްޓަރ އޮފް ޓޫރިޒަމް ޑރ އަބްދުﷲ މައުސޫމުއެވެ.
ވާރޗުއަލްކޮށްކުރިއަށްދިޔަ ރަސްމިއްޔާތެއްގައި މި އެކްސްޕޯ ފައްޓަވައިދެއްވާފައިވާއިރު، އެކި ދަންފަޅިތަކަށް ބަހާލައިގެން އެކްސްޕޯގެ ވެބިނަރތައް ބޭއްވުމަށް ވަނީ ހަމަޖެހިފައެވެ. އެގޮތުން 3 ސެޝަނަކަށް ބަހާލައިގެން ވެބިނަރ ކުރިއަށް ގެންދިއުމަށް ވަނީ ހަމަޖެހިފައެވެ.
މި އަހަރު ވާރޗުއަލްކޮށް ކުރިއަށްގެންދާ މި އެކްސްޕޯއަކީ މީޑިއަމް ޕްރައިވެޓް ލިމިޓެޑުން އިންތިޒާމު ކޮށްގެން ކުރިއަށްގެންދާ އެކްސްޕޯއެކެވެ. އަދި މި އެކްސްޕޯގައި ބައިވެރިވުމަށް ޝައުޤުވެރިވާ ހުރިހާ ފަރާތްތަކަށްވެސް ވަނީ ފުރުސަތު ހުޅުވާލެވިފައެވެ.
2007 ވަނަ އަހަރުން ފެށިގެން ބާއްވަމުން އަންނަ މި އެކްސްޕޯއަކީ ބޯޓުތަކާއި ކަނޑުގެ އުޅަނދުފަހަރު ބައިނަލްއަޤުވާމީ ޕްލެޓްފޯމެއްގައި ދައްކާލުމަށް ލިބޭ އެންމެ ބޮޑު ފުރުޞަތެވެ. އެގޮތުން، އުޅަނދުފަހަރު ބަންނަ މީހުންނާއި ސަޕްލަޔަރުންނާއި ޚިދުމަތް ފޯރުކޮށްދޭ މީހުންގެ އިތުރުން ބޮޑެތި ކުންފުނިތަކުންނާއި ވިޔަފާރިވެރިންނާ ގުޅުން ބަދަހި ކުރުމަށް މި އެކްސްޕޯގެ ތެރެއިން ފުރުޞަތު ލިބިގެން ދިޔައެވެ.
ނިމިދިޔަ އަހަރު ބާއްވާފައިވާ ފަސްވަނަ މޯލްޑިވްސް މެރިން އެކްސްޕޯއަށްވެސް ބޮޑު ތަރުޙީބެއް ލިބިގެން ގޮސްފައިވެއެވެ. އެގޮތުން ފަސްވަނަ މޯލްޑިވްސް މެރިން އެކްސްޕޯގެ އެންމެ އުފެއްދުންތެރި ޕްރޮޑަކްޓަކަށް ހޮވިފައިވަނީ އަލްޝާލީ މެރިންގެ "އެކްޝަން 25 ފިޝިންގ ލޯންޗް" އެވެ.
އެ ފަހަރުގެ މެރިން އެކްސްޕޯގައި އިތުރު އުފެއްދުންތަކަކަށްވެސް އެވޯޑްކުރިއެވެ. އެގޮތުން ބެސްޓް ސްޓޯލް ޑިޒައިން އެވޯޑް އެލިއާ އިންވެސްޓްމަންޓަށް ލިބުނުއިރު ބެސްޓް ކަސްޓަމަރ ސަރވިސް އެވޯޑް ލިބުނީ ޑީޓެކްއަށެވެ. އަދި އިންޓަނޭޝަނަލް ކޮންޓްރިބިއުޓަރ އެވޯޑް ޓްރޭޑް ޕްރޮމޯޓަރސް އަށް ލިބުނު އިރު އަޕް އެންޑް ކަމަރ އެވޯޑް ފޯސައިޓް ސަރވޭޔަރސް އަށްވަނީ ލިބިފައެވެ.
