ޕެލޭގެ ރިކޯޑާ މެސީ ހަމަކުރި މެޗުން ބާސާ އެއްވަރު

އެއް ޓީމަކަށް އެންމެ ގިނަ ލަނޑު ޖަހައިގެން ބްރެޒިލުގެ ލެޖެންޑް ޕެލޭ ހަދާފައިވާ ރިކޯޑާ ބާސެލޯނާގެ ކެޕްޓަން ލިއޮނެލް މެސީ އެއްވަރުކޮށްފިއެވެ.

ޕެލޭގެ ރިކޯޑާ މެސީ އެއްވަރުކުރީ ސްޕެނިޝް ލީގުގައި ހޮނިހިރު ދުވަހުގެރޭ ވެލެންސިއާއާ 2-2 ން ބާސާ އެއްވަރުވި މެޗުގައެވެ.

ބާސާގެ ދަނޑުގައި ކުޅުނު މި މެޗުގައި އެންމެ ފުރަތަމަ ލަނޑު ޖަހާ ލީޑު ނެގީ ވެލެންސިއާއިންނެވެ. މެޗުގެ 29 ވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ މޫކްތާ ޑިއަޚަބީއެވެ. އެކަމަކު ފުރަތަމަ ހާފުގެ އިތުރު ވަގުތުގައި އޭރިއާ ތެރެއިން ބާސާގެ އެންޓޮއިން ގްރީޒްމަނަށް ފައުލް ކުރުމުން އެ ޓީމަށް ވަނީ ޕެނަލްޓީއެއް ލިބިފައެވެ. މެސީ ފޮނުވާލި ޕެނަލްޓީ ވެލެންސިއާގެ ގޯލްކީޕަރު މަތަކުރި ނަމަވެސް، ރިބައުންސް ބޯޅައިގައި ޖޯޑީ އަލްބާ ނެގި ހުރަހަކުން މެސީ ވަނީ ބާސާއަށް ނަތީޖާ އެއްވަރުކޮށްދީފައެވެ.

މި ލަނޑާއެކު މެސީ ވަނީ ބާސާގެ ޖާޒީގައި ޖުމްލަ 643 ލަނޑު ހަމަކޮށް ޕެލޭގެ ރިކޯޑާ އެއްވަރުކޮށްފައެވެ. ބްރެޒިލުގެ ސަންތޯސްއަށް 1956-1974 ކުޅުނު ޕެލޭ 643 ލަނޑު ޖަހާފައިވަނީ 656 މެޗުންނެވެ. އަދި އެ ރިކޯޑާ މެސީ ހަމަކުރީ 748 މެޗުންނެވެ.

ހޮނިހިރު ދުވަހުގެރޭ ކުޅުނު މެޗުގެ ދެވަނަ ހާފު ފަށައިގެން ހަތްވަނަ މިނެޓުގައި ބާސާއިން ވަނީ ފަހަތުން އަރައި ލީޑު ނަގާފައެވެ. މި ލަނޑު އެ ޓީމަށް ކާމިޔާބުކޮށްދިނީ ރޮނާލްޑް އަރައުހޯއެވެ. އެކަމަކު މެޗުގެ 69 ވަނަ މިނެޓުގައި މެކްސިމިލިއާނޯ ގޯމޭސް ވަނީ ވެލެންސިއާއަށް ނަތީޖާ އެއްވަރުކޮށްދީފައެވެ.

މި ނަތީޖާއާއެކު ބާސާ އޮތީ 21 މެޗުން 13 ޕޮއިންޓާއެކު ތާވަލުގެ ފަސްވަނައިގައެވެ. އެއްވަނައިގައި 12 މެޗުން 29 ޕޮއިންޓް ހޯދާފައިވާ އެތުލެޓިކޯ މެޑްރިޑް ވަނީ ހޮނިހިރު ދުވަހުގެރޭ އެލްޗޭ އަތުން 3-1 ގެ ނަތީޖާއަކުން މޮޅުވެފައެވެ. އަދި ތާވަލުގެ ދެވަނައިގައި އޮތީ 15 މެޗުން 26 ޕޮއިންޓާއެކު ރެއާލް ސޮސިއެޑާޑެވެ.