ދިރާގު ދިވެހި ޕްރިމިއާ ލީގުގައި ހޮނިހިރު ދުވަހުގެރޭ ކުލަބު ގްރީން ސްޓްރީޓްސް އަތުން ފަސޭހަކަމާއެކު އެންމެ ފަހުގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަން މޮޅުވެއްޖެއެވެ.

ގައުމީ ފުޓްބޯޅަ ދަނޑުގައި ކުޅުނު މި މެޗު މާޒިޔާއިން ކާމިޔާބުކުރީ 7-1 ގެ ތަފާތު ބޮޑު ނަތީޖާއަކުންނެވެ.

މެޗުގެ ވަރަށް ކުރީ ކޮޅު މާޒިޔާއިން ވަނީ ލަނޑު ޖަހާ ލީޑު ނަގައިފައެވެ. މި ލަނޑު މެޗުގެ 16 ވަނަ މިނެޓުގައި އެޓީމަށް ކާމިޔާބުކޮށްދިނީ ނާއިޒް ހަސަން (ދާދު) އެވެ. އަދި މެޗުގައި މާޒިޔާއިން ކާމިޔާބުކުރި ދެވަނަ ލަނޑު މުޙައްމަދު އުމެއިރުގެ އެހީތެރިކަމާއެކު މެޗުގެ 36 ވަނަ މިނެޓުގައި އެޓީމަށް ކާމިޔާބުކޮށްދިނީ ކެޕްޓަން އަސަދުﷲ އަބްދުﷲ އެވެ.

މެޗުގެ ދެވަނަ ހާފުގައި މާޒިޔާއިން ވަނީ އެޓީމުގެ އެޓޭކުތައް އިތުރަށް ވަރުގަދަ ކޮށްފައެވެ. އެގޮތުން މެޗުގެ 52 ވަނަ މިނެޓުގައި މާޒިޔާއިން ވަނީ އެ ޓީމުގެ ތިންވަނަ ލަނޑު ޖަހާފައެވެ. މި ލަނޑު އެޓީމަށް ކާމިޔާބުކޮށްދިނީ އިބްރާހީމް އައިސަމެވެ. މެޗުގެ 58 ވަނަ މިނެޓުގައި ގްރީން ސްޓްރީޓްސްގެ އެންޖެލް މުނޯޒް އެ ޓީމަށް ލަނޑެއް ޖަހައިދިން ނަމަވެސް، އޭގެ މިނެޓެއް ފަހުން އަސަދުﷲ ވަނީ މާޒިޔާއަށް އިތުރު ލަނޑެއް ޖަހައިދީފައެވެ. އަދި މެޗުގައި މާޒިޔާއިން ކާމިޔާބުކުރި ފަސްވަނަ ލަނޑު 72 ވަނަ މިނެޓުގައި ކާމިޔާބުކޮށްދިނީ މުޙައްމަދު އިރުފާން (އިރޭ) އެވެ.

އަދި އޭގެ ހަ މިނެޓު ފަހުން ޕެނަލްޓީއަކުން ބަދަލު ކުޅުންތެރިއެއްގެ ގޮތުގައި ކުޅެން އެރި ކޮނޭލިއަސް ސްޓެވާޓް (ކޯނޭ) ވަނީ މާޒިޔާގެ ހަވަނަ ލަނޑު ޖަހާފައެވެ. މިއީ ގޯލު ރޮނގު މަތިން ގްރީން ސްޓްރީޓްސްގެ މުޙައްމަދު ފަރުހާން ބޯޅައިގައި އަތްލުމުން ރެފުރީ ދިން ޕެނަލްޓީއެކެވެ. އަދި އެއާއެކު ރެފުރީ ވަނީ ފަރުހާނަށް ރަތް ކާޑެއް ދައްކާފައެވެ. މި މެޗުގައި މާޒިޔާއިން ކާމިޔާބުކުރި ފަހު ލަނޑު އިތުރު ވަގުތުގައި ޖަހައިދިނީ ހަމްޒާ މުޙައްމަދު (ހަމްޕު) އެވެ.

މެޗަށްފަހު ވާހަކަ ދައްކަމުން މާޒިޔާގެ ކޯޗު މުޙައްމަދު ނިޒާމް (ނިޒާމްބެ) ބުނީ މި ނަތީޖާއަކީ ހިތްހަމަޖެހޭ ނަތީޖާއެއް ކަމަށާއި، ކުރީ މެޗާ އަޅާބަލާއިރު މި މެޗުން ރަނގަޅު ގިނަ ކަންތައްތަކެއް ފެނިގެންދިޔަ ކަމަށެވެ. އަދި ކުރިއަށް އޮތް ތަނުގައި ރަނގަޅުކުރަން ޖެހޭ ކަންކަންވެސް ފާހަގަވި ކަމަށްވެސް ނިޒާމްބެ ބުންޏެވެ.

ގްރީން ސްޓްރީޓްސްގެ ކޯޗު އަލީ ނިސްތާރު މުޙައްމަދު ބުނީ މިއީ ގްރީން ސްޓްރީޓްސްއިން ބަލައިގަންނާނެ ނަތީޖާއެއް ނޫން ކަމަށާއި، މި މެޗުން ވަރަށް ގިނަ ފިލާވަޅުތަކެއް ލިބުނު ކަމަށެވެ. އަދި ކުރިއަށް އޮތްތަނުގައި އިތުރަށް ގްރީން ސްޓްރީޓްސްގެ ކުޅުން ރަނގަޅު ކުރާނެ ކަމަށްވެސް އޭނާ ބުންޏެވެ.

ލީގުގައި ކުޅުނު ދެވަނަ މެޗުންވެސް މޮޅުވެ މާޒިޔާއިން ހަ ޕޮއިންޓް ހަމަކުރިއިރު، އެ ޓީމު ވަނީ ލީގުގައި ކުޅުނު ފުރަތަމަ މެޗުން ޔުނައިޓެޑް ވިކްޓަރީ (ޔޫވީ) އަތުން 4-0 ން މޮޅުވެފައެވެ. އަދި ލީގުގައި މިހާތަނަށް ކުޅުނު ދެ މެޗުންވެސް ގްރީން ސްޓްރީޓްސް ވަނީ ބަލިވެފައެވެ.