އެމެރިކާއިން މޮޑާނާގެ ކޮވިޑް ވެކްސިނަށް ހުއްދަދީފި

އެމެރިކާގެ ފާމަސޫޓިކަލް ކުންފުނި މޮޑާނާއިން އުފެއްދި ކޮވިޑް-19 ވެކްސިން އެމެޖެންސީކޮށް ބޭނުންކުރުމުގެ ހުއްދަ އެ ގައުމުގެ ފުޑް އެންޑް ޑްރަގް އެޑްމިނިސްޓްރޭޝަން (އެފްޑީއޭ) ން ހުއްދަދީފިއެވެ.

އެމެރިކާގެ އެފްޑީއޭއިން މޮޑާނާގެ ވެކްސިނަށް ހުއްދަ ދީފައި ވަނީ ހުކުރު ދުވަހުއެވެ. މޮޑާނާގެ ވެކްސިނަށް އެމެރިކާއިން ހުއްދަ ދީފައި މި ވަނީ ފައިޒަރ އަދި ބައޯއެންޓެކްގެ ވެކްސިނަށް ހުއްދަ ދިންތާ ހަފްތާއެއްގެ ތެރޭގައެވެ.

އެމެރިކާގެ ނެޝަނަލް އިންސްޓިޓިއުޓް އޮފް ހެލްތު އާއި ގުޅިގެން މޮޑާނާއިން ތައްޔާރުކޮށްފައިވާ މި ވެކްސިން އުފެއްދުމަށް އެގައުމުގެ ސަރުކާރުން ވަނީ އެއް ބިލިއަން ޑޮލަރުގެ ފައިސާގެ އެހީ ފޯރުކޮށްދީފައެވެ. އަދި މި ވެކްސިންގެ ރައްކާތެރި 100 މިލިއަން ޑޯޒް ފޯރުކޮށްދިނުމުން އިތުރު 1.5 ބިލިއަން ޑޮލަރު ދޭނެކަމަށް އެމެރިކާ ސަރުކާރުން ވަނީ ބުނެފައެވެ.

މޮޑާނާގެ ވެކްސިިންގެ 200 މިލިއަން ޑޯޒް އެމެރިކާއިން ގަންނާނެކަމަށް ބުނެފައިވާއިރު، މިހާރުވެސް ވެކްސިންގެ ހަ މިލިއަން ޑޯޒް ހުރީ ޝިޕިންއަށް ތައްޔާރަށްކަމަށް މޮޑާނާއިން ބުނެއެވެ.

މޮޑާނާގެ ވެކްސިނަށް ހުއްދަ ދިނުމަށް ކުރިއަށް ގެންދިޔަ ޕެނަލްގައި ބައިވެރިވެ ވެކްސިނަށް ހުއްދަ ދިނުމަށް ނެގުނު ވޯޓުގައި ބައިވެރިވި 20 ޕެނަލިސްޓުން ވަނީ ވެކްސިނަަށް ހުއްދަ ދިނުމަށް އެއްބަސްވާކަމަށް ވޯޓު ދީފައެވެ. އަދި އެއް ބައިވެރިއަކު ވަނީ ވަގިގޮތަކަށް ވޯޓު ނުލާނެކަމަށް ބުނެފައެވެ.

އެމެރިކާގައި މޮޑާނާގެ ވެކްސިން 18 އަހަރުން މަތީގެ މީހުންނަށް ދިނުމަށް ހުއްދަ ދީފައިވާއިރު، ވެކްސިންގެ އެންމެ ފަހުގެ ނަތީޖާތައް ދައްކާގޮތުން މި ވެކްސިނަކީ ކޮވިޑް-19 އިން ރައްކާތެރިކުރުމުގައި %95 ކާމިޔާބު ވެކްސިނެކެވެ.