ފިޔަވަޅުތަކާއެކު ފަތުރުވެރިންނަށް ތައިލެންޑް ހުޅުވާލިތާ އެއް ދުވަސްފަހުން ތައިލެންޑްގެ ތެރެއިން ކޮވިޑްގެ ކޭސްތަކެއް

ކޮވިޑް-19 ގެ ސަބަބުން ތައިލެންޑްގެ ފަތުރުވެރިކަން ހުއްޓުމަކަށް ގެނެސްފައި އެތައް މަސްތަކެއް ބޭއްވުމަށްފަހު ފިޔަވަޅުތަކާއެކު ފަތުރުވެރިންނަށް ތައިލެންޑް ހުޅުވާލިތާ އެއް ދުވަސްފަހުން ތައިލެންޑްގެ ތެރެއިން ހަތަރު މީހުން ކޮވިޑް-19 އަށް ޕޮޒިޓިވްވެއްޖެއެވެ.

ތައިލެންޑްގެ ސިއްހީ އޮފިޝަލުން ބުނީ 67 އަހަރުގެ އަންހެނަކު ވައިރަސް އަށް ޕޮޒިޓިވްވެފައިވާކަމަށެވެ. އަދި އޭނާގެ އާއިލާގެ އިތުރު ތިން މީހަކުވެސް ވައިރަސް އަށް ޕޮޒިޓިވްވެފައިވާކަމަށް އޮފިޝަލުން ބުނެއެވެ.

މިމީހާއަކީ ތައިލެންޑުން ބޭރަށް ދަތުރުކޮށްފައިވާ މީހެއް ނޫންކަމަށްވެސް އޮފިޝަލުން ބުނެއެވެ. އަދި މިމިހާ އާއި ކްލޯޒް ކޮންޓެކްޓުންގެ ގޮތުގައި ހިމެނޭ 165 މީހެއްގެ ސާމްޕަލް މިހާރު ނަގާފައިވާކަމަށްވެސް އޮފިޝަލުން ބުނެއެވެ.

ތައިލެންޑްގެ ޑިޒީސް ކޮންޓްރޯލް ޑިޕާޓްމަންޓުން ބުނެފައިވަނީ އަލަށް މިފެނުނު ކޭސްތައް ފެންނަން ދިމާވި ސަބަބު ހޯދުމުގެ މަސައްކަތް ކުރަމުން އަންނަ ކަމަށެވެ. ތައިލެންޑްގެ އެތެރެއިން ފާއިތުވި ދުވަސްތަކުގައި ކޭސްތައް ފެނިފައިވަނީ ވަރަށްވެސް މަދުންނެވެ. ފާއިތުވި މަސްތަކުގައި ވައިރަސް އަށް ޕޮޒިޓިވްވެފައިވާ ގިނަ މީހުންނަކީ ކަރަންޓީނުގެ މުއްދަތު ހަމަވުމުން ނަގާފައިވާ ސާމްޕަލްތަކުން ޕޮޒިޓިވްވެފައިވާ މީހުންނެވެ. ތައިލެންޑުން ފާއިތުވި ދުވަސްތަކުގައި ގިނައިން ވައިރަސް އަށް ޕޮޒިޓިވްވެފައިވަނީ އެގައުމަށް އެތެރެވި މީހުންނެވެ.

ތައިލެންޑުން މިހާތަނަށް އައިއިރު ކޮވިޑް-19 ޖެހިފައިވަނީ 4297 މީހުންނަށެވެ. އަދި މަރުވެފައިވަނީ 60 މީހުންނެވެ. ތައިލެންޑުގައި ކޮވިޑް ކޮންޓްރޯލްކުރުމުގައި ބޮޑު ދައުރެއް އަދާކޮށްފައިވަނީ އެގައުމުގެ އިގްތިޞާދު އެންމެ ބޮޑަށް ބަރޯސާވެފައިވާ ފަތުރުވެރިކަން ހުއްޓާލާފައި ބާއްވައިގެންނެވެ.

އެތައް މަސްތަކެއްވަންދެން އެގައުމަށް ފަތުރުވެރިންނަށް ނާދެވޭގޮތަށް ހަދާފައިވާއިރު ބުރާސްފަތި ދުވަހު ވަނީ ފިޔަވަޅުތަކަށް ލުއިތައް ދޭން ފަށާފައެވެ. އެގޮތުން 50 ގައުމެއްގެ ރައްޔިތުންނަށް އެގައުމަށް އާދެވޭއިރު 72 ގަޑިއިރުގެ ޕީސީއާރު ނެގެޓިވް ޓެސްޓެއް އެމީހުން އަތުގައި އޮންނަންޖެހެއެވެ. އަދި ތައިލެންޑަށް އައުމަށްފަހު ދެ ހަފްތާވަންދެން ކަރަންޓީނުވާންޖެހެއެވެ.