އަންނަ 2021 ވަނަ އަހަރުގެ ފުރަތަމަ ކުއަރޓަރގައި ރާއްޖެއަށް ވެކްސިން ލިބޭނެ ކަމަށް ހެލްތު މިނިސްޓްރީގެ ޗެއަރޕަރސަން އޮފް ސްޓިއަރިންގް ކޮމިޓީ ފޯރ ކޮވިޑް ވެކްސިން، ޑރ. ޝާހު އަބްދުﷲ މާހިރު ލަފާކުރައްވައިފިއެވެ.
ރާއްޖެޓީވީގެ 'ހަބަރުފީތާ' ޕްރޮގްރާމްގައި ކޮވިޑް-19 ވެކްސިންއާއި ގުޅިގެން މައުލޫމާތު ދެއްވަމުން ޑރ. ޝާހު ވިދާޅުވީ ބޮޑަށް ބެލެވެނީ އަންނަ އަހަރުގެ ފުރަަތަމަ ކުއަރޓަރގައި ރާއްޖެއަށް ވެކްސިން ލިބޭނެ ކަމަށެވެ. ރާއްޖެއަށް ވެކްސިން ލިބެނީ ދުނިޔޭގެ ހުރިހާ ގައުމަކަށް ހަމަހަމަކާއި އެކު ވެކްސިން ފޯރުކޮށްދިނުމަށް ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ކުރިއަށްގެންދާ "ކޮވެކްސް" ޕްރޮގްރާމްގެ ދަށުން ނެވެ.
މިއަންނަ އަހަރު ގެ ފުރަތަމަ ކުއަރޓަރގައި އަޅުގަނޑުމެން މި އެކްސްޕެކްޓް ކުރަނީ ރާއްޖެއަށް ވެކްސިންއެއް ލިބެން. ދެން އަޅުގަނޑުމެން އެހެން އެކްސްޕެކްޓް ކުރިޔަސް ވެސް ދުނިޔެއަށް މިއަންނަ ޑިމާންޑާއި، އެކި ގައުމުތަކަށް ވަރަށް ހަމަހަމަކޮށް ފޯރުކޮށްދިނުމުގެ މަސައްކަތް ކުރަމުން އެބަ ގެންދޭ. އެހެންވީމާ އަޅުގަނޑުމެންވެސް ކޯވެކްސް ފެސިލިޓީ، ގްލޯބަލް ޕާޓްނަރޝިޕްގެ ތެރެއިން އަޅުގަނޑުމެންނަށްވެސް ވެކްސިން ލިބޭނީ. އެހެންމަ އަޅުގަނޑުމެންނަށް އެ ޓާގެޓަށް އިރާދަކުރެއްވިއްޔާ ލިބޭނެ ކަމުގެ އުއްމީދުތައް އެބައޮތް.ޑރ. ޝާހު އަބްދުﷲ މާހިރު
ޑރ. ޝާހު ވިދާޅުވީ މިހާރު ރާއްޖެއިން އަމާޒު ހިފާފައިވަނީ ވެކްސިން ލިބޭއިރު، އެއަށް ފުރިހަމައަށް ތައްޔާރުވެ ތިބުމަށް ކަމަށެވެ. އެގޮތުން، މިކަމާއި ގުޅިގެން އެކުލަވާލާ ޕްލޭންގެ ދަށުން، ރާއްޖޭގެ ހުރިހާ ކަންކޮޅުތަކެއްގައި ތިބި ރައްޔިތުންނަށް ވެކްސިން ފޯރުކޮށްދެވޭނީ ކިހިނަކުންތޯ ބަލަމުން އަންނަ ކަމަށެވެ. އަދި އެންމެ ފުރަތަމަ މި ވެކްސިން ދޭން ޖެހެނީ ކޮން ފަރާތްތަކަކަށްތޯ ދެނެގަނެވި، މި ކަމާއި ގުޅޭ ހުރިހާ ޕްލޭންތައް ވެކްސިން ލިބުމުގެ ކުރިން ނިންމޭނެ ކަމަށް އޭނާ ލަފާކުރެއްވިއެވެ.
އެނގިވަޑައިގަންނަވާނެ ފަދައިން ގިނަ ވެކްސިންތަކަކީ ދެ ޑޯޒް ޖަހަންޖެހޭ ވެކްސިން. އެއީ ދެ ޑޯޒް ދޭތެރޭގައި އެއް މަސް ދުވަސް، ފުރަތަމަ ޑޯޒް ޖަހާފައި ދެވަނަ ޑޯޒް އެއް މަސް ފަހުން. އެހެންވީމާ ފުރަތަމަ ކަމަކަށް ވެކްސިނޭޝަން ޕްރޮގްރާމް ކޮމްޕްލީޓްކުރަން ބަލާލާއިރު ދެ ޑޯޒް ހަމަވީމާ އެ ވެކްސިން ފުލޫ ދެވުނީ ކަމަށް ބެލެވޭނީޑރ. ޝާހު އަބްދުﷲ މާހިރު
މިހާރު ވަމުންދާ ތައްޔާރީތަކާއި ގުޅިގެން ވާހަކަދައްކަވަމުން ޑރ. ޝާހު ވިދާޅުވީ ބާރު ދުވެލީގައި ތައްޔާރީތައް ވަމުން އަންނަ ކަމަށާއި ރާއްޖެއަށް ވެކްސިން ލިބޭ ދުވަހު ވެކްސިން ޖެހުމުގެ މަސައްކަތް ވެސް ފެށިގެންދާނެ ކަމަށެވެ. ޑރ. ޝާހު ވިދާޅުވީ ވެކްސިނޭޝަން ޕްރޮގްރާމް ކުރިއަށްދާނީ އެކި އިދާރާތަކާއި ގުޅިގެން ކަމަށެވެ.
ކޮވިޑް-19ށް ވެކްސިން ހޯދުމަށް ރާއްޖެއިން ކުރަމުންދާ މަސައްކަތުގައި މިހާރު ކޮވެކްސް ފެސިލިޓީން ރާއްޖޭގެ އާބާދީގެ 20 އިންސައްތައަށް ހިލޭ ވެކްސިން ހޯދުމަށް ހުށައެޅި ހުށައެޅުން ރަސްމީކޮށް ޑަބްލިޔުއެޗްއޯއިން ވަނީ ގަބޫލުކޮށްފައެވެ.
ކޮވެކްސް ފެސިލިޓީގެ ދަށުން ރާއްޖެއަށް އެންމެ ފުރަތަމަ ވެކްސިން ލިބޭނީ އާބާދީގެ ދެ ލައްކަ މީހުންނަށްކަމަށް "ރާއްޖެއެމްވީ" އަށް އިތުބާރުކުރެވޭ މަސްދަރަކުން ވަނީ ކަށަވަރުކޮށްދީފައެވެ. އަދި ކޮވެކްސް ފެސިލިޓީގެ ދަށުން ރާއްޖެއަށް ލިބޭ ވެކްސިނެއްގެ ހަތަރު ލައްކަ ޑޯޒް ލިބޭނެއެވެ. ވެކްސިން ރާއްޖެ ގެނައުމުގައި ލަސްތަކެއް ވަނީ ވެކްސިން ރައްކާކޮށްފައި ބަހައްޓާނެ ތަންތަނާ މެދު އަދި ގޮތެއް ނުނިންމޭތީ ކަމަށްވެސް ވަނީ މައުލޫމާތު ލިބިފައެވެ.
