އެޗްޑީސީ އާއި އެމްއައިޓީ އިން މީހުން ބިނާކުރުމުގެ އެއްބަސްވުމެއްގައި ސޮއިކޮށްފި
17 ޑިސެމްބަރު 2020 | ބުރާސްފަތި 22:15އެޕްރެންޓިސްޝިޕް ޕްރޮގްރާމްގެ ތަމްރީންތައް ދިނުން އެމްއައިޓީގެ ފަރާތުން ކުރާނެ
އެއްބަސްވުމުގައި ސޮއިކުރި ރަސްމިއްޔާތުގެ ތެރެއިން
ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އާއި މޯލްޑިވްސް އިންސްޓިޓިއުޓް އޮފް ޓެކްނޮލޮޖީ(އެމްއައިޓީ) މީހުން ބިނާކުރުމުގެ އެއްބަސްވުމެއްގައި ސޮއިކޮށްފިއެވެ.
މިއެއްބަސްވުމުގައި އެޗްޑީސީގެ ފަރާތުން ސޮއިކުރެއްވީ މެނޭޖިންގ ޑިރެކްޓަރު ސުހައިލް އަހުމަދެވެ. އަދި އެމްއައިޓީގެ ފަރާތުން ސޮއިކުރެއްވީ ޑިރެކްޓާ އޮފް ޕްރޮގްރާމް އާދަމް ހަލީމެވެ.
އެޗްޑީސީން ބުނީ މިއެއްބަސްވުމުގެ ދަށުން ހަތަރުވަނަ ވަނަ އެޕްރެންޓިސްޝިޕް ޕްރޮގްރާމް ކުރިއަށް ގެންދާނީ އެމްއައިޓީ އާއި ގުޅިގެން ކަމަށެވެ.
އެގޮތުން ޕްރޮގުރާމް ހިންގުމަށް ބޭނުންވާ ތަމްރީންތައް ދިނުމާއި، ސެޝަންތަކާއި ޕްރޮގްރާމްއަށް ބޭނުންވާ ކަރިކިއުލަމް ފަރުމާކުރުމުގެ އެންމެހައި މަސައްކަތްތައް އެމްއައިޓީގެ ފަރާތުން ކުރާނެ ކަމަށް އެޗްޑީސީން ބުނެއެވެ.
މަސައްކަތުގެ މާހައުލަށް ހުނަރުވެރި ޒުވާނުންތަކެއް ނެރުމަށް ކުރިއަށް ގެންދާ އެޕްރެންޓިސްޝިޕް މިފަހަރުގެ ޕްރޮގްރާމުން 60 ބައިވެރިންނަށް ފުރުސަތު ދެއެވެ. އަދި ޕްރޮގްރާމް ފުރިހަމަ ކުރުމުން ލެވެލް ތިނެއްގެ ސެޓްފިކެޓެއް ލިބޭ ކަމަށް އެޗްޑީސީން ބުނެއެވެ.
