ފައިޒާ ވެކްސިނަށް ހެލްތް ވޯކަރަކު އެލަރޖިކްވި މައްސަލަ ބަލަނީ
17 ޑިސެމްބަރު 2020 | ބުރާސްފަތި 03:18ރިޕޯޓްތައް އިތުރަށް ދިރާސާ ކުރުމުގެ މަސައްކަތް ދަނީ ކުރަމުން
ކޮވިޑް ވެކްސިންގެ މަރުހަލާތަކުގެ ތެރެއިން މަރުހަލާއެއްގައި ވޮލެންޓިއަރެއް ވެކްސިން ޖަހަނީ
ފައިޒާ ވެކްސިން ޖެހި ހެލްތް ވޯކަރަކު އެލަރޖިކްވި މައްސަލަ އިތުރަށް ބަލަމުން އަންނަ ކަމަށް އެ ކުންފުނިން ހާމަކޮށްފިއެވެ.
ވެކްސިން ޖަހައިގެން އެލަރޖިކްވެފައިވަނީ އެލަކްސާގެ ހެލްތް ވޯކަރެކެވެ. އެއާއެކު އެ ކުންފުނިން އަންނަނީ ރިޕޯޓްތައް އިތުރަށް ދިރާސާ ކުރުމުގެ މަސައްކަތް ކުރަމުންނެވެ. ފައިޒާ ކުންފުނިން ބުނެފައިވަނީ އެލަރޖިކްވި މައްސަލަ ބަލަމުން އަންނަ ކަމަށާއި، އެކަމާއި ގުޅޭ އިތުރު ތަފްސީލު އަދި ނުލިބޭ ކަމަށެވެ. ނަމަވެސް ހެލްތް ވޯކަރަށް ސީރިއަސް އެލަރޖިކް ރިއެކްޝަން ދިމާވެފައިވާ ކަމަށް އެ ކުންފުނިން ވަނީ ބުނެފައެވެ.
މި މައްސަލައާއި ގުޅިގެން ސަރަހައްދީ ސިއްހީ އިދާރާތަކާއި ގުޅިގެން އަންނަނީ މަސައްކަތް ކުރަމުންނެވެ.
މީގެކުރިން ވެސް ޔޫކޭގައި ފައިޒާ ވެކްސިން ދިން ދެ މީހެއްގެ ފަރާތަކުން އެލަރޖިކްގެ އަސަރު ފެނިފައިވެއެވެ. ނަމަވެސް އެ ދެމީހުންނަށް މާބޮޑު އަސަރެއް ނުކުރާ ކަމަށާއި، އެކަމުން ރަނގަޅުވެފައިވާ ކަމަށް ރިޕޯޓްތައް ބުނެއެވެ.
އެމެރިކާގެ ފާމަސޫޓިކަލް ކުންފުނި ފައިޒަރ އާއި ޖަރުމަނުގެ ބައޯއެންޓެކް ގުޅިގެން އުފެއްދި ކޮވިޑް-19 ވެކްސިން ބޭނުންކުރުމުގެ ހުއްދަ އެމެރިކާއިން ދީފައިވާއިރު އަންނަ ހަފްތާގައި ވެކްސިން ދޭން ފަށާނެކަމަށް އެމެރިކާގެ ހެލްތު ސެކެޓްރީ އެލެކްސް އަޒަރް ވިދާޅުވެއްޖެއެވެ.
އެމެރިކާގެ ފުޑް އެންޑް ޑްރަގް އެޑްމިނިސްޓްރޭޝަން (އެފްޑީއޭ) އިން ހުކުރު ދުވަހު ވަނީ ފައިޒަރގެ ކޮވިޑް-19 ވެކްސިން އެގައުމުގައި ބޭނުންކުރުމަށް ހުއްދަ ދީފައެވެ. އެމެރިކާއިން ފައިޒަރގެ ވެކްސިނަށް ހުއްދަ ދީފައިވަނީ ވެކްސިނަށް ހުއްދަ ދިނުމަށް ބޭއްވި އެފްޑީއޭގެ ޕެނަލްގައި ބައިވެރިވި 22 މީހުންގެ ތެރެއިން 17 މީހުންގެ ވޯޓާއިއެކުއެވެ. ހަތަރު ފަރާތަކުން ވެކްސިނަށް ހުއްދަ ދިނުމާ ދެކޮޅަށް ވޯޓުލާފައިވާއިރު، ޕެނަލްގެ އެކަކު ވަކިގޮތަކަށް ވޯޓު ދީފައެއް ނުވެއެވެ.
ފައިޒަރ އަދި ބައޯއެންޓެކް ވެކްސިންގެ އެންމެ ފަހުގެ ނަތީޖާތައް ދައްކާގޮތުން މި ވެކްސިނަކީ ކޮވިޑުން ދިފާއުކޮށްދިނުމުގައި 95 އިންސައްތަ ކާމިޔާބު ވެކްސިނެކެވެ. މިއީ މިހާތަނަށް އުފެއްދި ވެކްސިންތަކުގެ ތެރެއިން ވައިރަހުން ދިފާއުކުރުމުގައި އެންމެ ކާމިޔާބު އެއް ވެކްސިނެވެ.
