ފައިގެ ފަލަމަސްގަނޑަށް ލިބުނު އަނިޔާއިން ރަނގަޅުވެ އޭސީ މިލާނުގެ ފަރިތަކުރުންތަކުގައި އެ ޓީމުގެ ފޯވާޑް ޒްލަޓާން އިބްރަހިމޮވިޗް ބައިވެރިވާން ފަށައިފިއެވެ.

އުމުރުން 39 އަހަރުގެ އިބްރަހިމޮވިޗަށް އަނިޔާވީ އިޓާލިއަން ލީގުގައި މިދިޔަ ނޮވެމްބަރު މަހުގެ 22 ވަނަ ދުވަހު ނާޕޮލީ އަތުން 3-1 ން މިލާން މޮޅުވި މެޗުގައެވެ. އެ މެޗުގައި އިބްރަހިމޮވިޗް ދެ ލަނޑު ޖެހި ނަމަވެސް، ލިބުނު އަނިޔާއަކާ ގުޅިގެން މެޗުގެ 79 ވަނަ މިނެޓުގައި އޭނާ ވަނީ ބަދަލުކޮށްފައެވެ.

ރިޕޯޓުތައް ބުނާ ގޮތުން އެ މެޗަށްފަހު ހެދި ޓެސްޓުން އިބްރަހިމޮވިޗުގެ ފަލަމަސްގަނޑަށް އަނިޔާވެފައިވާކަން ހާމަވި ނަމަވެސް، އޭނާއަށް ލިބުނު އަނިޔާ ސީރިއަސް ނޫން ކަމަށް ވަނީ ރިޕޯޓުކޮށްފައެވެ. އެކަމަކު އެ އަނިޔާއާ ގުޅިގެން އިބްރަހިމޮވިޗަށް ވަނީ މިލާނުން ކުޅުނު ހަ މެޗެއް ގެއްލިފައެވެ.

އިބްރަހިމޮވިޗް އަނިޔާއިން ރަނގަޅުވިއިރު، އޭނާ އަންނަނީ މި ސީޒަނުގައި ތަފާތު މޮޅު ކުޅުމެއް ދައްކަމުންނެވެ. އެގޮތުން މިހާތަނަށް މި ސީޒަނުގައި އޭނާ ވަނީ ކުޅުނު 10 މެޗުގައި 11 ލަނޑު ޖަހާފައެވެ. މީގެ ތެރެއިން 10 ލަނޑު އިބްރަހިމޮވިޗް ޖަހާފައިވަނީ އިޓާލިއަން ލީގުގައި ކުޅުނު ހަ މެޗުގައެވެ.

މި ސީޒަނުގައި މިލާނުން މޮޅު ކުޅުމެއް ދައްކަމުން އަންނައިރު، އެ ޓީމު އޮތީ އިޓާލިއަން ލީގުގެ އެއްވަނައިގައި ކުޅުނު 11 މެޗުން ލިބުނު 27 ޕޮއިންޓާއެކުއެވެ. އަދި ލީގުގައި މިހާތަނަށް ކުޅުނު އެއްވެސް މެޗަކުން މިލާން ބަލިވެފައެއް ނުވެއެވެ. އަދި އެ ޓީމު ވަނީ ޔުއެފާ ޔޫރޮޕާ ލީގުގެ ދެވަނަ ބުރުން ޖާގަ ހޯދާފައެވެ.