ޒީރޯ ނެޓް އެމިޝަން ޓަރގެޓް ކަނޑައެޅުމުން މަޖިލިހުގެ އެންވަޔަރަމަންޓް ކޮމިޓީން މަރުހަބާ ކިޔައިފި
15 ޑިސެމްބަރު 2020 | އަންގާރަ 09:39ބޭރު ގައުމުތަކުގެ އެހީތެރިކަން ބޭނުންވޭ
އެންވަޔަރަމަންޓް އެންޑް ކްލައިމެޓް ޗޭންޖު ކޮމެޓީ
ސަރުކާރުން 2030 ވަނަ އަހަރު އަންނަންވާއިރަށް ޒީރޯ ނެޓް އެމިޝަން ހާސިލް ކުރުމަށް މަސައްކަތް ކުރާނެ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ނިންމެވި ނިންމެވުމަށް އެންވަޔަރަމަންޓް އެންޑް ކްލައިމެޓް ޗޭންޖު ކޮމެޓީ އިން މަރުހަބާ ކިޔައިފިއެވެ.
ރައީސުލްޖުމްހުރިއްޔާ އިބްރާހިމް މުހައްމަދު ސޯލިހު މިކަން އިއުލާން ކުރެއްވީ ޔުނައިޓެޑް ނޭޝަންސް ކްލައިމެޓް 2020'' ގައެވެ.
ރައްޔިތުންގެ މަޖިލީހުން ބުނީ މިނިންމެވުމާއެކު ރާއްޖެއިން ވަނީ މުޅި ދުނިޔޭގެ މޫސުމަށް އަންނަ ބަދަލުތަކުގެ ސަބަބުން އެންމެ ބޮޑަށް އަސަރުކުރާ ރާއްޖެ ފަދަ ގައުމުތަކުން، މޫސުމަށް އަންނަ ބަދަލުތަކުގެ ނުރައްކަލުން ދުނިޔެ ސަލާމަތް ކުރުމަށް ކުރާ މަސައްކަތުގައި އެންމެ ކުރީ ސަފުގައި ހަރަކާތްތެރިވަމުންދާކަން ހާމަވާ ކަަމަށެވެ. އެހެންކަމުން މިނިންމުމާއެކު ރާއްޖެ މިވަނީ ދާއިރާގެ ލީޑަރެއްގެ ހައިސިއްޔަތުން މަސައްކަތް ފަށާފައެވެ.
ޒީރޯ ނެޓް އެމިޝަން ހާސިލް ކުރުމާއި ގުޅޭ ގޮތުން ރައީސް ސޯލިހު އިތުރަށް ވިދާޅުވެފައިވަނީ މިކަން ކުރުމަށް ބޭރުގެ ގައުމުތަކުގެ އެހީތެރިކަމާއި އަދި ފައިނޭންސްގެ އެހީތެރިކަން ބޭނުންވާނެ ކަމަށެވެ. އަދި މި އެހީތައް ހޯދުމަށް ސަރުކާރުތަކާއި ގުޅިގެން އަދި ތަފާތު އެންޖީއޯތަކުގެ އެހީ ވެސް ހޯދަން ޖެހޭނެ ކަމަށް އެމަނިކުފާނު ވިދާޅުވިއެވެ.
މިކަމަށް އިޝާރާތް ކުރައްވާ މަޖިލީހުން ބުނީ މިޕްލޭންއާ އެއްގޮތަށް އަމަލުކޮށްފިނަމަ ބޭރުގެ އެހީތެރިކަން ވެސް ހޯދަން މަގުފަހިވާނެ ކަމަށާއި، ޓަރގެޓް ހާސިލް ކުރުމަށް ވެސް ބޮޑެތި އެހީތެރިކަން ލިބޭނެ ކަމަށެވެ.
އެހެންކަމުން މަޖިލިސް ކޮމެޓީ އިން ވަނީ ރާއްޖެ މިކްލައިމެޓް ޕްރޮސްޕަރިޓީ ޕްލޭންއާ އެއްގޮތަށް އަމަލުކުރުން މުހިންމު ކަމުގައި އަންގާފައެވެ.
ކްލައިމެޓް ވަލުނަރަބަލް ފޯރަމްއަކީ ރާއްޖެ ހިމެނޭ ގޮތަށް ތިމާވެށީގެ ނުރައްކާތެރިކަން ބޮޑުވެފައިވާ 20 ގައުމަކުން ބައިވެރިވާ ފޯރަމް އެކެވެ. ރާއްޖެއިން ގަބޫލުކުރަނީ ސީވީއެފް ގައި ކަނޑައަޅާފައިވާ ކްލައިމެޓް ޕްރޮސްޕަރިޓީ ޕްލޭންއާ އެއްގޮތަށް މަސައްކަތް ކޮށްފައި ނަމަ ރާއްޖެއަށް 2030 ގައި މިކަން ހާސިލްވާނެ ކަމަށެވެ.
