ޑޯޓްމުންޑުގެ ކޯޗުގެ މަގާމުން ފާވްރޭ ވަކިކޮށްފި

ބޮރޫޝިއާ ޑޯޓްމުންޑުގެ ކޯޗުގެ މަގާމުން ލޫސިއެން ފާވްރޭ ވަކިކޮށްފިއެވެ.

ޑޯޓްމުންޑުން ފާވްރޭ ވަކިކުރީ ޖަރުމަން ލީގުގައި ހޮނިހިރު ދުވަހުގެރޭ ސްޓުޓްގާޓް އަތުން އަމިއްލަ ދަނޑުގައި 5-1 ގެ ތަފާތު ބޮޑު ނަތީޖާއަކުން ޑޯޓްމުންޑް ބަލިވުމާ ގުޅިގެންނެވެ. ޑޯޓްމުންޑުގެ ސްޕޯޓިންގ ޑިރެކްޓަރު މައިކަލް ޒޯކް ބުނީ ފާވްރޭ މަގާމުން ވަކިކުރަން އެ ޓީމުގެ މެނޭޖުމަންޓުން ނިންމީ މި ސީޒަނުގައި ކަނޑައެޅި ޓާގެޓް ހާސިލުނުވެދާނެ ކަމުގެ ބިރު އޮތުމުން ކަމަށެވެ.

މީގެ ކުރިން ހާތާ ބާލިން އާއި، ބޮރޫޝީއާ މޮންޗެންގްލަޑްބަކުގެ އިތުރުން ނީސްއަށްވެސް ކޯޗުކަން ކޮށްދިން އުމުރުން 63 އަހަރުގެ ފާވްރޭ ޑޯޓްމުންޑާ ހަވާލުވީ 2018 ވަނަ އަހަރުގެ ޖުލައި މަހުގެ ތެރޭގައެވެ. ފާވްރޭ ވަނީ ޑޯޓްމުންޑާ ހަވާލުވި ފުރަތަމަ ސީޒަނުގައި ޖަރުމަން ލީގުގައި މެޗަކުން ބަލިނުވެ 15 މެޗު ހަމަކޮށްފައެވެ. އެއާއެކު އޭނާ ވެފައިވަނީ ޖަރުމަން ލީގުގައި މެޗަކުން ބަލިނުވެ 15 މެޗު ހަމަކޮށްދިން ޑޯޓްމުންޑުގެ ފުރަތަމަ ކޯޗަށެވެ. އޭގެ އިތުރުން ފާވްރޭ ވަނީ މިދިޔަ އަހަރު ޑޯޓްމުންޑަށް ޖަރުމަން ސުޕަ ކަޕުވެސް ކާމިޔާބުކޮށްދީފައެވެ.

ޑޯޓްމުންޑުން ފާވްރޭ ވަކިކުރިއިރު، އެ ޓީމު އޮތީ ޖަރުމަން ލީގުގެ ފަސްވަނައިގައި 11 މެޗުން 19 ޕޮއިންޓާއެކުއެވެ. ލީގުގެ އެއްވަނައިގައި އޮތް ބަޔާ ލެވަކޫސެންއަށް 11 މެޗުން 25 ޕޮއިންޓް ލިބިފައިވާއިރު، ދެވަނައިގައި އޮތް އެންމެ ފަހުގެ ޗެމްޕިއަން ބަޔާން މިއުނިކަށް 11 މެޗުން ވަނީ 24 ޕޮއިންޓް ލިބިފައެވެ.

ޑޯޓްމުންޑުގެ ކޯޗުގެ މަގާމުން ފާވްރޭ ވަކިކުރުމާއެކު މި ސީޒަނުގައި ދެން އެ ޓީމަށް އިރުޝާދު ދޭނީ އެސިސްޓަންޓް ކޯޗު އެޑިން ޓާޒިޗެވެ. ޓާޒިޗުގެ އިރުޝާދުގެ ދަށުން ކުޅޭ ފުރަތަމަ މެޗުގައި އަންނަ އަންގާރަ ދުވަހުގެރޭ ޖަރުމަން ލީގުގައި ޑޯޓްމުންޑް ނުކުންނާނީ ވާޑާ ބްރެމެންއާ ދެކޮޅަށެވެ.