އިޓާލިއަން ލީގުގައި އާދީއްތަ ދުވަހުގެ ހަވީރު ކުޅުނު މެޗުން އިންޓަ މިލާނުން ފަހަތުން އަރައި ކަލިއާރީ ބަލިކޮށްފިއެވެ.

ކަލިއާރީގެ ދަނޑުގައި ކުޅުނު މި މެޗުން އިންޓަ މޮޅުވީ ފަހަތުން އަރައި 3-1 ގެ ނަތީޖާއަކުންނެވެ.

މި މެޗުގެ ފުރަތަމަ ހާފުގައި އިންޓަގެ ފަރާތުން އެންމެ އެދެވޭ ކުޅުމެއް ފެނިފައި ނުވާއިރު، މި ހާފުގައި ކަލިއާރީން ވަނީ ލީޑު ނަގާފައެވެ. ފުރަތަމަ ހާފު ނިމެން ތިން މިނެޓަށް ވެފައި ވަނިކޮށް މި ލަނޑު ކަލިއާރީއަށް ޖަހައިދިނީ ރިކާޑޯ ސޮޓިލްއެވެ.

މި މެޗުގައި އިންޓައިން ފަރަގު ކުޑަކޮށްފައިވަނީ މެޗުގެ 77 ވަނަ މިނެޓުގައެވެ. މި ލަނޑު އެ ޓީމަށް ކާމިޔާބުކޮށްދިނީ ނިކޯލޯ ބަރެއްލާއެވެ. އަދި އޭގެ ހަތް މިނެޓު ފަހުން ޑެނީލޯ ޑަމްބްރޯސިއޯ ވަނީ އިންޓައަށް މެޗުގައި ލީޑު ނަގައިދީފައެވެ. އަދި މި މެޗުގައި އިންޓައިން ލީޑު ފުޅާކުރި ލަނޑު މެޗުގެ އިތުރު ވަގުތުގައި އެ ޓީމަށް ޖަހައިދިނީ އިތުބާރު ފޯވާޑް ރޮމެލޫ ލުކާކޫއެވެ.

މި މޮޅާއެކު ތާވަލުގެ ދެވަނައިގައި އިންޓަ އޮތީ ކުޅުނު 11 މެޗުން ލިބުނު 24 ޕޮއިންޓާއެކުއެވެ. އިޓާލިއަން ލީގުގެ އެއްވަނައިގައި 10 މެޗުން 26 ޕޮއިންޓާއެކު އޮތީ ވާދަވެރި އޭސީ މިލާނެވެ. އަދި އިންޓަ އަތުން ބަލިވި ކަލިއާރީ އޮތީ ތާވަލުގެ 13 ވަނައިގައި 11 މެޗުން 12 ޕޮއިންޓާއެކުއެވެ.