އެސްޓްރަޒެނެކާއިން އެލެކްސަން ކުންފުނި ގަންނަނީ

ބޭސް އުފައްދާ ކުންފުންޏެއް ކަމަށްވާ އެސްޓްރަޒެނެކާއިން އެމެރިކާގެ އެލެކްސަން ކުންފުނި 39 ބިލިއަން ޑޮލަރަށް ގަންނަން ނިންމާފައިވާ ކަމަށް ރިޕޯޓްތައް ބުނެފިއެވެ.

އެސްޓްރަޒެނެކާ ކުންފުންޏަކީ ކޮވިޑް-19 ގެ ވެކްސިން އުފެއްދުމުގައި އެންމެ ކުރީގައި އުޅޭ ކުންފުނިތަކުގެ ތެރޭގައި ހިމެނޭ ކުންފުންޏެކެވެ. މި ކުންފުނިން އެލެކްސަން ގަތުމަށް ނިންމާފައި ވަނީ އެ ކުންފުނީގެ ހުރިހާ ހިއްސާއެއް އަދި މުދަލަކާއިއެކުގައެވެ.

އެސްޓްރަޒެނެކާ އަދި އެލެކްސަން ކުންފުނީގެ ބޯޑު މެމްބަރުން މިކަމާއި އެއްބަސްވެފައިވީ ނަމަވެސް، ކުންފުނި ވިއްކާލުމުގެ ހުއްދައަށް އެލެކްސަންއިން އެ ކުންފުނީގެ ހިއްސާދާރުންގެ އަރިހުން އަހަން ޖެހޭނެއެވެ. އެހެންކަމުން އެސްޓްރަޒެނެކާގެ އަތްމައްޗަށް އެލެކްސަން ކުންފުނި ދާނީ އަންނަ 2021 ވަނަ އަހަރުގެ ފަހު ކުއާޓާގައި ކަމަށް ރިޕޯޓްތައް ބުނެއެވެ.

އެސްޓްރަޒަނެކާ އަދި އޮކްސްފޯޑް ޔުނިވަރސިޓީ ގުޅިގެން ތައްޔާރުކުރި ވެކްސިން މިހާރު ވަނީ ކްލިނިކަލް ޓްރަޔަލްތައް ނިންމާ ނަތީޖާ އާންމު ކޮށްފައެވެ.

އެސްޓްރަޒެނެކާގެ އޮޕަރޭޝަންސް އެކްސެކިއުޓިވް ޕަމް ޗެންގް ވަނީ އެ ކުންފުނިން އުފައްދާ ކޮވިޑް ވެކްސިންގެ 200 މިލިއަން ޑޮޒް 2020 ވަނަ އަހަރު އުފެއްދޭނެ ކަމަށާއި 2021 ވަނަ އަހަރުގެ ފުރަތަމަ ކުއަރޓާ ނިމެންވާއިރަށް ވެކްސިންގެ 700 މިލިއަން ޑޯޒް އުފެއްދޭނެ ކަމަށް ބުނެފަ އެވެ.