ރާއްޖެއިން ވަން ޗައިނާ ޕޮލިސީ ދަމަހައްޓާނެ ކަމުގެ ޔަގީންކަން ސަރުކާރުން ދީފި
10 ޑިސެމްބަރު 2020 | ބުރާސްފަތި 18:33ވަޒީރުންގެ ފެންވަރުގައި މަޝްވަރާތައް ބޭއްވުމަށް ރާއްޖޭން ވަނީ ޝައުގުވެރިކަން ފާޅުކޮށްފައި
ޗައިނާއާއެކު ބޭއްވި މަޝްވަރާތަކުގެ ތެރެއިން
މިނިސްޓްރީ އޮފް ފޮރިން އެފެއަރޒްއާ ޗައިނާގެ މިނިސްޓްރީ އޮފް ފޮރިން އެފެއަރޒްއާ ދެމެދު ޑިރެކްޓަރ ޖެނެރަލް ލެވެލްގައި ބޭއްވި މަޝްވަރާތައް ނިންމާލައިފިއެވެ.
ބުރާސްވަތި ދުވަހުގެ މެންދުރު ވަރޗުއަލްކޮށް ބޭއްވި މި މަޝްވަރާތަކުގައި އެކި ދާއިރާތަކާއި ގުޅޭ ގިނަ މަޝްވަރާތަކެއް ވަނީ ކޮށްފައެވެ.
ދިވެހިރާއްޖޭގެ ފަރާތުން މި މަޝްވަރާތަކުގައި އިސްކޮށް ބައިވެރިވެވަޑައިގެންނެވީ މިނިސްޓްރީ އޮފް ފޮރިން އެފެއަރޒްގެ އެޑިޝަނަލް ސެކްރެޓަރީ އަމީން ޖާވިދް ފައިސަލްއެވެ. ޗައިނާ ސަރުކާރުގެ ފަރާތުން މި މަޝްވަރާތަކުގައި އިސްކޮށް ބައިވެރިވެވަޑައިގެންނެވީ ޗައިނާގެ މިނިސްޓްރީ އޮފް ފޮރިން އެފެއަރޒްގެ ޑެޕިއުޓީ ޑިރެކްޓަރ ޖެނެރަލް (އޭޝިއަން އެފެއަރޒް ޑިޕާޓްމަންޓް) މރ ޗެންގް ސޮންގް އެވެ.
މި ބައްދަލުވުމުގައި ވާހަކަ ދައްކަވަމުން އެޑިޝަނަލް ސެކްރެޓަރީ ޖާވިދު ވަނީ ދިވެހިރާއްޖެއިން "ވަން-ޗައިނާ" ސިޔާސަތު ދަމަހައްޓާނެކަމުގެ ޔަޤީންކަން ދީފައެވެ. އަދި ކޮވިޑް-19 ގެ ޙާލަތުގައި ޗައިނާ ސަރުކާރާއި ވިޔަފާރިތަކުން ދިވެހިރާއްޖެއަށް ފޯރުކޮށްދިން އެހީތެރިކަމަށް ރާއްޖެއިން ވަނީ ޗައިނާއަށް ޝުކުރު އަދާކޮށްފައެވެ.
ޗައިނާއަކީ ރާއްޖޭގެ ތަރައްޤީގެ މުހިއްމު ބައިވެރިއެއް ކަމަށް ޖާވިދު ވިދާޅުވިއެވެ. އަދި އަވަސް މުސްތަޤްބަލެއްގައި ދެޤައުމުގެ ދެމެދު ދަތުރުފަތުރު އަލުން ފެށި، ވިޔަފާރިކުރުން ކުރިއެކޭ އެއްގޮތަށް ކުރިއަށް ގެންދެވޭނެ ކަމަށް އުއްމީދު ކުރައްވާކަމަށް ޖާވިދު ވަނީ ވިދާޅުވެފައެވެ.
ޗައިނާގެ ފަރާތުން ވާހަކަ ދައްކަވަމުން ޗެންގް ސޮންގް ވިދާޅުވީ ދިވެހިރާއްޖެއާއި ޗައިނާއަކީ ވަރަށް ގާތް ދެޤައުމުކަމަށެވެ. އަދި ދެގައުމުގެ ގުޅުން އިތުރަށް ބަދަހިކުރުމަށް މަސައްކަތް ކުރައްވާނެ ކަމަށްވެސް ވިދާޅުވިއެވެ. މީގެ އިތުރުން ބައިނަލްއަޤްވާމީ މައިދާނުގައި ޗައިނާއަށް ދިވެހިރާއްޖޭގެ ފަރާތުން ލިބޭ އެއްބާރުލުން ފާހަގަކުރައްވައި، ދިވެހިރާއްޖެއަކީ ޗައިނާގެ މުހިއްމު ބައިވެރިއެއް ކަމަށް ޗެންގް ސޮންގް ވިދާޅުވިއެވެ.
މި މަޝްވަރާތަކުގައި ދެ ޤައުމުންވެސް ވަނީ ދެޤައުމުގެ ގުޅުން އެކި ދައިރާތަކުން އިތުރަށް ބަދަހިކުރުމަށް އެއްބަސްވެފައެވެ. އެގޮތުން މޫސުމީ ބަދަލުތަކާއި، އިޤްތިޞާދީ އަދި މާލީ ދާއިރާއިން ގުޅުން ބަދަހިކުރުމަށް ވަނީ މަޝްވަރާ ކުރައްވާފައެވެ.
މީގެ އިތުރުން ޚާރިޖީ ވަޒީރުންގެ ފެންވަރުގައި ދެޤައުމުގެ މެދުގައި މަޝްވަރާތައް ކުރިއަށް ގެންދިޔުމަށް ރާއްޖެއިން ވަނީ ޝައުގުވެރިކަން ފާޅުކޮށްފައެވެ.
ދިވެހިރާއްޖެއާ ޗައިނާ އާ ދެމެދު ޑިރެކްޓަރ ޖެނެރަލް ލެވެލްގައި މިދިޔަ ޖުލައި މަހުވެސް މަޝްވަރާތައް ބާއްވާފައިވެއެވެ.
