ޕީއެސްޖީ ދޫކޮށްލާކަށް ނުވިސްނަން: ނޭމާ

ޕީއެސްޖީ ދޫކޮށްލަން އެއްވެސް ވަރަކަށް ނުވިސްނާ ކަމަށް އެ ޓީމަށް ކުޅެމުން އަންނަ ބްރެޒިލުގެ ތަރި ނޭމާ ބުނެފިއެވެ.

ބާސާ ދޫކޮށް 2017 ވަނަ އަހަރު ނޭމާ ޕީއެސްޖީއަށް ބަދަލުވީ ދުނިޔޭގެ ރިކޯޑު އަގެއް ކަމަށްވާ 222 މިލިއަން ޔޫރޯ އަށެވެ. މީގެ ކުރިން އަނބުރާ ބާސާއަށް ބަދަލުވާން ބޭނުންވާކަން ނޭމާ ވަނީ ހާމަކޮށްފައެވެ. އެއާއެކު ބާސާއިން ވަނީ ނޭމާ އަނބުރާ ހޯދުމަށްވެސް މަސައްކަތް ކޮށްފައެވެ. އެކަމަކު ނޭމާ އަނބުރާ ގެނައުމުގެ މަސައްކަތުގައި ބާސާއިން މީގެ ކުރިން ބަލިގަބޫލުކުރީ ޕީއެސްޖީން ނޭމާ ވިއްކަން ކީ އަގު ބޮޑުވުމުންނެވެ.

ނޭމާ މި ވަގުތު ޕީއެސްޖީގެ އެއްބަސްވުމުގައި ހުރީ 2022 ވަނަ އަހަރުގެ ޖޫން މަހުގެ ނިޔަލަށެވެ. އަދި ދާދި ފަހުން ސްޕެއިނުގެ މީޑިއާތަކުން ވަނީ އަލުން އަނބުރާ ބާސާއަށް ބަދަލުވާން ނޭމާ މިހާރު ބޭނުންނުވާ ކަމަށް ރިޕޯޓުކޮށްފައެވެ.

ޔުއެފާ ޗެމްޕިއަންސް ލީގުގައި ބުދަ ދުވަހުގެރޭ އިސްތަންބޫލް ބަޝަކްޝެހީރް އަތުން 5-1 ން ޕީއެސްޖީ މޮޅުވި މެޗަށްފަހު ނޭމާ ބުނީ އޭނާ ޕީއެސްޖީގައި ހުރީ އުފަލުން ކަމަށާއި، ޕީއެސްޖީ ދޫކޮށްލަން އެއްވެސް ވަރަކަށް ނުވިސްނާ ކަމަށެވެ. އަދި އޭނާ އާއި ޕީއެސްޖީއާ ދެމެދު އޮތީ ވަރަށް ރަނގަޅު ގުޅުމެއް ކަމަށާއި، ބޭނުންވަނީ ޕީއެސްޖީގައި މަޑުކޮށް ގިނަ ކާމިޔާބީތަކެއް ހޯދަން ކަމަށްވެސް ނޭމާ ބުންޏެވެ.

ޕީއެސްޖީ ދޫކޮށްލަން އެއްވެސް ވަރަކަށް ނުވިސްނާ ކަމަށް ނޭމާ ބުނިއިރު، ދާދި ފަހުން އޭނާ ވަނީ އަންނަ އަހަރު ބާސެލޯނާއަށް ކުޅެމުން އަންނަ އާޖެންޓީނާގެ ތަރި ލިއޮނެލް މެސީއާ އެއް ޓީމެއްގައި ކުޅެން ބޭނުންވާ ކަމަށް ބުނެފައެވެ. މި ސީޒަނުގެ ނިޔަލަށް ބާސާއާއެކު މެސީ އެއްބަސްވުމުގައި ހުރިއިރު، ޕީއެސްޖީން މެސީ ހޯދުމަށް މިހާރު މަސައްކަތް ކުރަމުން އަންނަ ކަމަށް މީޑިއާތަކުން ވަނީ ރިޕޯޓުކޮށްފައެވެ.

މެސީ އާއެކު މީގެ ކުރިން ބާސާއަށް ކުޅުނު ނޭމާ ވަނީ މިހާތަނަށް ޕީއެސްޖީއަށް ކުޅެދިން 96 މެޗުގައި ވަނީ 79 ލަނޑު ކާމިޔާބުކޮށްފައެވެ. އަދި ވަނީ ޕީއެސްޖީއާއެކު މިހާތަނަށް ފްރެންޗް ލީގު ތިން ފަހަރު ކާމިޔާބުކޮށްފައެވެ.