އައްޑޫ ސިޓީގައި ހިންގަމުންދާ ފްލައިން ސްކޫލު ހިންގުމުގެ ޝައުގުވެރިކަން މޯލްޑިވިއަން އިން ފާޅުކޮށްފިއެވެ.

ފަލައިން ސްކޫލު ހިންގުމުގެ ޝައުގުވެރިކަން މޯލްޑިވިއަންއިން ފާޅުކޮށްފައިވާއިރު، ފްލައިން ސްކޫލާމެދު ހިތްހަމަ ނުޖެހި، ކޯސް ދިގުލައިގެން ދިއުމާ ގުޅިގެން ދަރިވަރުންނާއި ބެލެނިވެރިންގެ ޝަކުވާ ވަނީ އިންތިހާއަށް ގޮސްފަ އެވެ.

ފްލައިންގ ގަޑި ހަމަނުވެ، އެތައް ދުވަހެއް މަޑުކުރަން ޖެހި ކޯސް ދިގުލައިގެން ގޮސް ކޯހަށް ހޭދަކުރަންޖެހޭ މިންވަރު އިތުރުވެފައިވާކަން ބެލެނިވެރިންނާއި ދަރިވަރުންގެ ފާހަގަކޮށް ޕެޓިޝަން ހުށަހަޅާފައި ވެސް ވެއެވެ.

އަދި އެތަނުގައި ކިޔަވާ ދަރިވަރުންނާމެދު ބޭއިންސާފުން އަމަލުކުރުމުންދާތީ ޓްރާންސްޕޯޓް މިނިސްޓްރީން ވެސް ވަނީ އެކަން ފާހަގަކޮށް މައްސަލަ ބަލާފައެވެ. އަދި ފްލައިން ސްކޫލް ހިންގަމުންދާ ކުންފުނިން އަމަލުކޮށްފައިވާ ގޮތުން އެ ސްކޫލާމެދު ސަރުކާރުން ފިޔަވަޅުވެސް އަޅާފައިވާއިރު، އަލުން އެތަން ހިންގުމަށް ޝައުގުވެރިވާ ފަރާތްތަކަށް ވަނީ ހުޅުވާލާފަ އެވެ.

މިމައްސަލައާ ގުޅިގެން ގައުމީ އެއަރލައިންގެ ކެޕްޓަން އަހުމަދު ހުނައިން ވިދާޅުވީ ދިވެހިން ހިއްސާވާ ދިވެހި ފްލައިން ސްކޫލެއް ނުހިންގެންވީ އެއްވެސް ސަބަބެއް އޮވެގެން ނޫން ކަމަށެވެ. އަދި ޓްވިންއޮޓަރ(ސީޕްލޭން) ޑޭޝް8 އަދި އެއަރބަސްގެ ތަމްރީންތައް ވެސް އެތެރޭގައި މިހާރު ވެސް ހިންގާކަން ހުނައިން ފާހަގަކުރެއްވިއެވެ.

ފްލައިން ސްކޫލު ހިންގުމާއި ހަވާލުވުމަށް މޯލްޑިވިއަނުން ތައްޔާރުވަމުން އަންނައިރު، ވެލާނާ އިންޓަރނޭޝަނަލް އެއަރޕޯޓަށް އަންނަ އެކި މަރުކާގެ ބޯޓަށް ޚިދުމަތް ދިނުމުގައި ވެސް މޯލްޑިވިއަން ފާހަގަ ކުރެވެއެވެ. އެކުންފުނިން ބުނީ ވީ.އައި.އޭއަށް ޖައްސާ އެއަރބަސް މަރުކާގެ 350ހާއި 330ހާއި 320ގެ އިތުރުން ބޯއިންގެ 777 އާއި 787އާއި 767 އާއި 737 މަރުކާގެ ބޯޓަށް މިހާރުވެސް އެކުންފުނީގެ އިންޖިނިއަރިންއިން ޚިދުމަތްދޭ ކަމަށެވެ.

ޚިދުމަތްތައް އިތުރަށް ތަފްސީލް ކޮށްދެއްވާ މޯލްޑިވިއަން ގެ ޖެނެރަލް މެނޭޖަރ އިންޖިނިއަރިން މުހައްމަދު ހަސަން ވިދާޅުވީ އޭވިއޭޝަން ދާއިރާގެ ކުރު ތަމްރީންތައް ވެސް އެކުންފުނިން ހިންގަމުންދާ ކަމަށެވެ. ތަޖުރިބާއާއި ހިންގުމުގެ ގޮތުން ވަރުގަދަ ޓީމެއް އޮތްއިރު މިކަން ކުރެވޭނެ އެންމެ ރަނގަޅު ޓީމަކަށް ގައުމީ އެއަރލައިންގެ ޓީމް ކަމަށް ހަސަން ވިދާޅުވި އެވެ.

މީގެ އިތުރުން ހަސަން ވިދާޅުވީ ރާއްޖޭގައި އޭވިއޭޝަން ދާއިރާ ފުޅާވެގެން ދިޔައިރު ތަމްރީނާއި ތަޖުރިބާ ހޯދޭނެ ގޮތެއް ނެތް ނަމަވެސް މިއަދު ހާލަތު ބަދަލުވެފައިވާ ކަމަށެވެ. ދިވެހިން މި ދާއިރާގައި ކުރިއަރަމުން އައިސް މިއަދު އަމިއްލަ ގައުމުގައި އަމިއްލަ ފްލައިން ސްކޫލެއް ހިންގޭނެހާ ގާބިލްކަން ދިވެހިންގެ އެބަހުރި ކަމަށް ހަސަން ވިދާޅުވި އެވެ.

ފްލައިން ސްކޫލު ހިންގެވުމާއި ހަވާލުވުމަށް ކުރަންޖެހޭ މަސައްކަތްތައް ކުރަމުންދާކަން ފާހަގަކޮށް މޯލްޑިވިއަނުން ބުނީ ފްލައިން ސްކޫލްގެ ޚިދުމަތްދޭނެ ފެސިލިޓީއެއް ހޯދުމުގެ މަސައްކަތް މިހާރު ފަށާފައިވާ ކަމަށެވެ. އަދި ސަރުކާރުގެ އެހީތެރި ކަމާއެކު އަންނަ އަހަރު ފްލައިން ސްކޫލެއްގެ ޚިދުމަތް ދިނުމަށް މޯލްޑިވިއަނުން މިހާރު ވަނީ އަމާޒުހިފާފައެވެ.