ވެލެންސިއާގައި އޮތީ ޗެލެންޖް ކުރެވޭ ފެންވަރުގެ ސްކޮޑެއް: އާތީ

ކުލަބު ވެލެންސިއާގައި އޮތީ ފުރަތަމަ ޑިވިޝަނުގެ ޓީމުތަކާ ޗެލެންޖް ކުރެވޭނެ ފެންވަރުގެ ސްކޮޑެއް ކަމަށް އެ ޓީމުގެ ކޯޗު މުޙައްމަދު އާތިފް (އާތީ) ބުނެފިއެވެ.

އެއް އަހަރުގެ މެދުކެނޑުމަކަށްފަހު ވެލެންސިއާ ފުރަތަމަ ޑިވިޝަނަށް ކޮލިފައިވެފައިވާއިރު، އެ ކުލަބު އަލުން ފުރަތަމަ ޑިވިޝަނުން ޖާގަ ހޯދީ މިދިޔަ ސީޒަނުގެ ދެވަނަ ޑިވިޝަން ފުޓްބޯޅަ މުބާރާތުގެ ޗެމްޕިއަންކަން ހޯދައިގެންނެވެ.

އައު ސީޒަނަށް ސްކޮޑު ވަރުގަދަ ކުރުމަށް ވެލެންސިއާއިން ވަނީ ތަޖުރިބާކާރު ގިނަ ކުޅުންތެރިންތަކެއް އެ ޓީމަށް ގެނެސްފައެވެ. އޭގެ ތެރޭގައި ރާއްޖޭގައި އުފެދުނު އެންމެ މޮޅު ފުޓްބޯޅަ ކުޅުންތެރިޔާ އަލީ އަޝްފާގު (ދަގަނޑޭ) އާއި، ފޯވާޑް އަލީ ފާސިރު (ސެންޓޭ) އަދި ގައުމީ ފުޓްބޯޅަ ޓީމުގެ ކެޕްޓަން އަކުރަމް އަބްދުލް ޣަނީ (އަކޫ) ހިމެނެއެވެ. މީގެ އިތުރުން އެ ޓީމުން ވަނީ ޒުވާން މިޑްފީލްޑަރު އިސްމާއިލް ޒާން އާމިރާއި ހުނަރުވެރި މިޑްފީލްޑަރު އަޙްމަދު އިމާޒް (އާއްކޮ) ގެ ސޮއިވެސް ހޯދާފައެވެ.

ހޯމަ ދުވަހު ބޭއްވި ނޫސްވެރިންގެ ބައްދަލުވުމުގެ ތެރެއިން އާތީ ބުނީ ލީގުގެ ފުރަތަމަ މެޗު އަންނަން ހަފުތާއަކަށް ވިއިރު، އެ ޓީމުގައި އޮތީ ފުރަތަމަ ޑިވިޝަނުގެ ޓީމުތަކާ ޗެލެންޖް ކުރެވޭނެ ފެންވަރުގެ ސްކޮޑެއް ކަމަށެވެ. އެކަމަކު ސްކޮޑެއް އޮތުމަކުން ނިމުނީ ނޫން ކަމަށާއި، ކުޅުންތެރިންގެ ކޮމްބިނޭޝަނާއި ކުޅުންތެރިންގެ ފިޓްނަސް ރަނގަޅުވުންވެސް ބޭނުންވާ ކަމަށްވެސް ބުންޏެވެ. އެހެންކަމުން ފުރަތަމަ މެޗު ނޫނީ ދެވަނަ މެޗުގައި ބޭނުންވާ ހިސާބަށް ދެވޭނެކަން ބުން ނޭނގޭ ކަމަށާއި، އެކަމަކު މިހާރު އޮތް ޓީމަކީ ލީގު ނިމޭއިރު ރަނގަޅު ހިސާބަކަށް ދެވޭނެ ޓީމެއްކަން ބުނަން ޔަގީން ކަމަށްވެސް އާތީ ބުންޏެވެ.

ނޫސްވެރިންގެ މި ބައްދަލުވުމުގައި ވެލެންސިއާގެ ކެޕްޓަން އަކޫ ބުނީ ފަރިތަކުރުންތައް ފުރަތަަމަ ފެށިއިރު އޮތް ޓީމާއި މިހާރު އޮތް ސްކޮޑް ވަރަށް ބޮޑަށް ބަދަލުވެފައިވާ ކަމަށާއި، އެކަމަކު މި ސީޒަނަށް އެއްކޮށް ބަލާނަމަ ވެލެންސިއާއަށް ރަނގަޅު ނަތީޖާތަކެއް ނެރެވޭނެ ކަމަށެވެ. އަދި ކުޅުންތެރިންނާއި، ކޯޗުން އަދި މެނޭޖުމަންޓުގެ މަސައްކަތުން ވެލެންސިއާ ކުރީގައިވެސް އޮތް ގޮތަށް ކާމިޔާބު ޓީމަކަށް ހަދައި، ކުރީގައި އޮތް ހިސާބަށް ގެންދިއުމަށް ބޭނުންވާ ކަމަށްވެސް އަކޫ ބުންޏެވެ.

ފުރަތަމަ ޑިވިޝަނުގައި ގިނަ ކާމިޔާބުތަކެއް ހޯދާފައިވާ ވެލެންސިއާ މީގެ ކުރިން ވަނީ 1979 ވަނަ އަހަރުން ފެށިގެން 2018 ވަނަ އަހަރުގެ ނިޔަލަށް ފުރަތަމަ ޑިވިޝަނުގައި ވާދަކޮށްފައެވެ. މި މަހުގެ 13 ވަނަ ދުވަހު ދިރާގު ދިވެހި ޕްރިމިއާ ލީގުގެ ކުޅުން ފަށާއިރު، އައު ސީޒަނުގައި ވެލެންސިއާއިން ކުޅޭ ފުރަތަމަ މެޗުގައި މި މަހުގެ 14 ވަނަ ދުވަހުގެރޭ ބައްދަލުކުރާނީ ކުލަބު ގްރީން ސްޓްރީޓްސްއާއެވެ.