ރައީސްގެ އަނބިކަނބަލުން "ދުރާލާ ތައްޔާރުވެ ހުރަސް އެޅުން" ފޮތް ނެރެދެއްވައިފި
މި ފޮތް ބިނާކޮށްފައި ވަނީ ޕާޓްނަރޝިޕް ފޮރ ޑްރަގް ފްރީ ކިޑްސްގެ "އިންޓަރވެންޝަން އީބުކް" ގެ އިތުރުން ކަމާ ގުޅުންހުރި މައުލޫމާތު ތަކުގެ މައްޗަށް
\"ދުރާލާ ތައްޔާރުވެ ހުރަސް އެޅުން\" މި ފޮތް ނެރެދިނުމަށް މުލިއާ ގޭގައި ބޭއްވުނު ބައްދަލު ވުމުގެ ތެރެއިން
"ޖަރނީ" ން "ދުރާލާ ތައްޔާރުވެ ހުރަސް އެޅުން،" މި ނަމުގައި ޝާއިޢުކޮށްފައިވާ ފޮތެއް ރައީސުލްޖުމްހޫރިއްޔާގެ އަނބިކަނބަލުން ފަޒްނާ އަޙްމަދު ނެރެދެއްވައިފިއެވެ.
އެ ކަމަނާ މި ފޮތް ނެރެދެއްވާފައިވަނީ މި ކަމަށްޓަކައި މުލީއާ ގޭގައި ހޯމަ ދުވަހުގެ ހެނދުނު ބޭއްވި ބައްދަލު ކުރެއްވުމެއްގައެވެ.
އެގޮތުން މި ފޮތް ބިނާކޮށްފައި ވަނީ ޕާޓްނަރޝިޕް ފޮރ ޑްރަގް ފްރީ ކިޑްސްގެ "އިންޓަރވެންޝަން އީބުކް" އަދި ނޭޝަނަލް އިންސްޓިޓުޓް އޮފް ޑްރަގް އެބިއުސް ގެ ސައިންސް އޮފް އެޑިކްޝަން އަދި ސަބްސްޓަންސް އެބިއުސް އެންޑް މެންޓަލް ހެލްތު ސަރވިސަސް އެޑްމިނިސްޓްރޭޝަން އިން ޝާއިޢުކޮށްފައިވާ އެކި މަޢުލޫމާތުތަކުގެ މައްޗަށެވެ.
"ދުރާލާ ތައްޔާރުވެ ހުރަސް އެޅުން،" މި ފޮތް ބައްޓަންކޮށްފައި ވަނީ، އެ މަޢުލޫމާތުތައް ދިވެހި ބަހަށް ތަރުޖަމާކޮށް، ރާއްޖޭގެ މާހައުލާއި އާދަކާދަތަކާ ގުޅޭގޮތަށް، މަސްތުވާތަކެއްޗާއި މެދު ހޭލުންތެރިކަން އިތުރުކުރުމަށް ބޭނުންވާ މަޢުލޫމާތު އެކުލަވައިލައިގެންނެވެ.
"ޖަރނީ" އަކީ މަސްތުވާތަކެތީގެ ނުރައްކާތެރި ވަބާގައި ޖެހިފައިވާ ޒުވާނުންނަށް އެހީތެރިކަން ފޯރުކޮށްދިނުމަށް މަސައްކަތްކުރާ ޖަމުޢިއްޔާއެކެވެ. އަދި އެއީ މަސްތުވާތަކެތީގެ ވަބާއިން މީހުން ސަލާމަތްކޮށް، އެ ވަބާއިން ސަލާމަތްވާން މަސައްކަތްކުރާ މީހުންނަށް ފަރުވާހޯދުމާއި، މުޖުތަމަޢާ އެނބުރި ގުޅުމަށް މަސައްކަތްކުރާ މީހުންނަށް އެހީތެރިވެދިނުމަށް މަސައްކަތްކުރާ ޖަމުޢިއްޔާއެކެވެ. މި ޖަމުޢިއްޔާ ރަޖިސްޓްރީކޮށްފައި ވަނީ 2005 ވަނަ އަހަރުގެ ނޮވެންބަރު މަހުއެވެ.
