ޝަހީދާ ވަކިވެގެން ދިއުމަކީ ތަޢުލީމީ އާއިލާއަށް ދިމާވި ފުން ހިތާމައެއް - އެޑިއުކޭޝަން މިނިސްޓްރީ
ޝަހީދާ ނިޔާވެފައިވަނީ ހޯމަ ދުވަހުގެ ވަގުތެއްގައި
އެޑިއުކޭޝަން މިނިސްޓްރީގެ ސީނިއަރ އެޑްމިނިސްޓްރޭޓިވް އޮފިސަރ، އާމިނަތު ޝަހީދާ ޢަބްދުއްސަމަދް
މިނިސްޓްރީ އޮފް އެޑިޔުކޭޝަންގައި މެދުނުކެނޑި 30 އަހަރަށްވުރެގިނަ ދުވަހު އަގުހުރި ޚިދުމަތްތަކެއް ކުރައްވާފައިވާ އާމިނަތު ޝަހީދާ ޢަބްދުއްސަމަދް ވަކިވެގެން ދިއުމަކީ ތަޢުލީމީ ޢާއިލާއަށް ދިމާވި ފުން ހިތާމައެއް ކަމަށް އެޑިއުކޭޝަން މިނިސްޓްރީން ބުނެފިއެވެ.
އެޑިއުކޭޝަނުން މިހެން ބުނީ ތަޢުލީމީ ދާއިރާއަށް އަގުހުރި ޚިދުމަތްތަކެއް ކުރައްވަމުން ގެންދެވި ޝަހީދާ ހޯމަ ދުވަހުގެ ވަގުތެއްގައި ނިޔާވުމާ ގުޅިގެން އެ މިނިސްޓްރީއިން ފޮނުވި ތަޢުޒިޔާގެ މެސެޖުުގައެވެ.
މީގެ އިތުރުން އެ މެސެޖުގައި ބުނީ ޝަހީދާ ނިޔާވުމަކީ އެ މިނިސްޓްރީއަށާއި، ތަޢުލީމީ ދާއިރާއަށް ލިބިގެން ދިޔަ ބޮޑު ހީނަރުކަމަކާއި ފަޅު ކަމެއްކަމުގައެވެ. އެޑިއުކޭޝަން މިނިސްޓްރީގެ ސީނިއަރ އެޑްމިނިސްޓްރޭޓިވް އޮފިސަރގެ މަގާމުގައި ހުންނެވި ޝަހީދާ ތަޢުލީމީ ދާއިރާގައި ޚިދުމަތް ކުރައްވަން ފެއްޓެވީ 1990 ވަނަ އަހަރު 'ދިވެހިރާއްޖޭގެ ތަޢުލީމު ކުރިއަރުވާ މަރުކަޒު' ގައެވެ.
އެ މިނިސްޓްރީން ބުނީ އައިމިނަތް ޝަހީދާ އޭގެ ފަހުން އެ މިނިސްޓްރީގެ އެކި މަޤާމުތަކުގައި މެދުކެނޑުމެއް ނެތި ޚިދުމަތް ކުރައްވާފައިވާކަމަށެވެ. އެގޮތުން ޝަހީދާ ފާހަގަކޮށްލެވެނީ މީހުންނާ ގުޅިގެން އުޅުއްވާ، ކަންކަމުގައި އިސްނަންގަވައިގެން މަސައްކަތްކުރައްވާ، އެކުވެރި މިޒާޖެއްގެ ބޭފުޅެއްގެ ގޮތުގައި ކަމަށް އެ މިނިސްޓްރީން ބުނެއެވެ.
މީގެ އިތުރުން މިނިސްޓްރީގެ ތަޢުޒިޔާގެ މެސެޖުގައި ބުނީ ޝަހީދާގެ ލޮބުވެތި ޢާއިލާއަށް، މިނިސްޓަރ އޮފް އެޑިޔުކޭޝަނާއި، މިނިސްޓްރީގެ އިސްވެރިންނާއި، އެންމެހާ މުވައްޒަފުންގެ ނަމުގައި އިޚްލާސްތެރި ތަޢުޒިޔާ ދަންނަވާ ކަމަށެވެ. އަދި މި ފުންހިތާމާގައި މި މިނިސްޓްރީގެ އެންމެހާ މުވައްޒަފުން ބައިވެރިވާ ކަމަށްވެސް އެ މިނިސްޓްރީން ބުނެއެވެ.
