އިންޑިޔާގައި 300 އަށް ވުރެ ގިނަ މީހުން ގޮތް ނޭނގޭ ބައްޔެއްގެ ޝިކާރަ އަކަށްވެއްޖެ
އެލުރު ސިޓީގައި މި ފާއިތުވި ހަފްތާ ބަންދުގައި 180 އަށް ވުރެ ގިނަ މީހުން އެޑްމިޓް ކޮށްފައިވޭ
އެލުރު ސިޓީގައި ގޮތް ނޭންގޭ ބައްޔެއް ފެތުރެނީ
އިންޑިޔާގައި 300 އަށް ވުރެ ގިނަ މީހުން ގޮތް ނޭނގޭ ބައްޔެއްގެ ޝިކާރައަކަށްވެ، އެކަކު މި ބަލީގައި މަރުވެއްޖެއެވެ.
ސީއެންއެން އިން ބުނާ ގޮތުގައި މި ބަލި ފެތުރެން ފަށާފައި ވަނީ އިންޑިޔާގެ އަންދަރަ ޕްރަދޭޝްގެ އެލުރު ސިޓީގައެވެ. މި ބަލި ޖެހެން މެދުވެރިވާ ސަބަބެއް އަދި ދެނެގަނެވިފައި ނުވާއިރު، މިބަލީގައި ފެންނަ ބައެއް އަލާމަތް ތަކުގެ ތެރޭގައި ފިޓް ޖެހުން، ހޭނެތުމާއި ހޮޑުލުމާއި ހުން އައުން ހިމެނޭ ކަމަށް ރިޕޯޓް ތަކުން ބުނެއެވެ.
އަންދަރަ ޕްރަދޭޝްގެ އެލުރު ސިޓީގައި މި ފާއިތުވި ހަފްތާ ބަންދުގައި 180 އަށް ވުރެ ގިނަ މީހުން އެޑްމިޓް ކޮށްގެން ފަރުވާދީ ދޫކޮށްލައިފައި ވާއިރު، ފަރުވާދިން އެންމެންވެސް ވަނީ ކޮވިޑް-19 އަށް ނެގެޓިވްވެފައި ކަމަށް ރިޕޯޓް ތަކުން ބުނެއެވެ. އަދި ފަރުވާ ދެވުނު އެންމެންގެ ހަށިގަނޑުންވެސް ފެނިފައި ވަނީ މި ގޮތް ނޭނގޭ ބަލީގެ އަލާމަތް ކަމަށް ބުނެއެވެ.
ގޮތް ނޭނގޭ މި ބަލީގައި މަރުވި ކަމަށް ރިޕޯޓްކޮށްފައި ވަނީ އުމުރުން 45 އަހަރުގެ ފިރިހެނެކެވެ. އޭނާއަކީ އުލުރު ސިޓީގައި ހުންނަ ޖީޖީއެޗް ހޮސްޕިޓަލުގައި އެޑްމިޓް ކުރި ބަލި މީހުންގެ ތެރޭގައި ހިމެނޭ މީހެކެވެ. އޭނާ ހޮޑުލަވާ ވަރުބަލިވުން ފަދަ ކަންކަން ވަނީ ކުރިމަތިވެފައެވެ. އޭނާ މަރުވީ އާދިއްތަ ދުވަހުގެ ހަވީރުގެ ވަގުތެއްގައެވެ.
އަންދަރަ ޕްރަދޭޝްގެ ހެލްތް ޑިޕާރްޓްމެންޓް އާއި ހަވާލައިދީ ހަަބަރު ތަކުން ބުނާ ގޮތުގައި ބަލިވެ އެޑްމިޓް ކުރެވުނު އެންމެންގެ ގައިންވެސް ލޭގެ ސާންޕަލް ނަގައި އާންމުކޮށް ފެތުރޭ ބަލިތައް ކަމަށްވާ ޗިކަން ގުނިޔާ އަދި ޑެންގު އަށްވެސް ޓެސްޓު ކުރެވިފައި ވާކަމަށާއި ނަމަވެސް މި ދެ ބައްޔަށްވެސް ނެގެޓިވް ވެފައިވާކަމަށެވެ.
ބަލީގެ ޝިކާރައަކަށް ވެފައިވާ އެންމެންވެސް ފެން ބޭނުން ކޮށްފައިވަނީ އެއް ތަނަކުން ފޯރުކޮށްދެއްވާ ފެން ކަމަށްވާތީ އެލުރު ސިޓީގެ ކަމާއި ބެހޭ ފަރާތް ތަކުން މިހާރު ގެތަކުން ފެން ސާމްޕަލް ނަގައި ޓެސްޓް ކުރުމުގެ މަސައްކަތް ފަށާފައި ވާކަމަށް ސީއެންއެން އިން ވަނީ ބުނެފައެވެ. އެގޮތުން މިހާތަނަށް 57863 (ފަސްލައްކަ ހަތްހާސް އަށްސަތޭކަ ފަސްދޮޅަސް ތިން) ގެޔަކުން ފެނުގެ ސާމްޕަލް ނަގާފައި ވާކަމަށް ބުނެފައި ވެއެވެ.
ދުނިޔެއިން ކޮވިޑް-19 އާއި ދެކޮޅަށް މަސައްކަތް ކުރަމުން އަންނަ އިރު އިންޑިޔާއަކީ މިވަގުތު ދެވަނަ އަށް އެންމެ ގިނަ މީހުން ކޮވިޑް ޖެހިގެން ރިޕޯޓްކޮށްފައިވައި ގައުމެވެ. އަދި އެގައުމުގެ އަންދަރަ ޕްރަދޭޝް އަކީ މިވަގުތު އިންޑިޔާގައި ކޮވިޑްގެ ހާލަތު އެންމެ ދަށްވެފައިވާ ސްޓޭޓެވެ. އެގޮތުން އަންދަރަ ޕްރަދޭޝްއިން އެކަނި ވެސް 800000 މީހުން ކޮވިޑް ޖެހިގެން ރިޕޯޓް ކޮށްފައިވެއެވެ.
