ޕްރީ-ސީޒަން ވަރަށް ފުރިހަމަ، ލީގަށް ތައްޔާރު: ނިޒާމްބެ
7 ޑިސެމްބަރު 2020 | ހޯމަ 12:10އައު ސީޒަނަށް ތައްޔާރުވުމަށް ފަރިތަކުރުންތައް ފެށި ފުރަތަމަ ޓީމަކީ މާޒިޔާ
މާޒިޔާ ސްޕޯޓްސް އެންޑް ރެކްރިއޭޝަންގެ ކޯޗު މުޙައްމަދު ނިޒާމް (ނިޒާމްބެ)
ކުރިއަށް އޮތް ފުޓްބޯޅަ ސީޒަނަށް ތައްޔާރުވުމުގެ ގޮތުން ކުރިއަށްގެންދިޔަ ޕްރީ-ސީޒަން ވަރަށް ކާމިޔާބު ކަމަށާއި، ޓީމު އޮތީ ފުރިހަމައަށް ތައްޔާރުވެފައި ކަމަށް މާޒިޔާ ސްޕޯޓްސް އެންޑް ރެކްރިއޭޝަންގެ ކޯޗު މުޙައްމަދު ނިޒާމް (ނިޒާމްބެ) ބުނެފިއެވެ.
ނިޒާމްބެ ގެ އިރުޝާދުގެ ދަށުން މާޒިޔާއިން އައު ސީޒަނާ ކުރިމަތިލާއިރު، އެ ޓީމުގެ ކޯޗަކަށް ނިޒާމްބެ ހަމަޖެއްސީ މި އަހަރުގެ ޖުލައި މަހުގެ ތެރޭގައެވެ. އެކަމަކު މި އަހަރުގެ އޭއެފްސީ ކަޕް ކެންސަލް ކުރުމާއެކު މާޒިޔާ ގޮވައިގެން ނިޒާމްބެ އަދި މިހާތަނަށް ރަސްމީ މެޗެއް ކުޅެފައެއް ނުވެއެވެ.
ހޯމަ ދުވަހު ބޭއްވި ނޫސްވެރިންގެ ބައްދަލުވުމުގެ ތެރެއިން ނިޒާމްބެ ބުނީ މާޒިޔާއިން ތައްޔާރީތައް ފެށީ އޭއެފްސީ ކަޕަށް ކަމަށާއި، އެކަމަކު އެ މުބާރާތް ކެންސަލް ވުމާއެކު ފަރިތަކުރުންތައް ހުއްޓާލަން ޖެހުނު ކަމަށެވެ. އަދި އެ ފަހަރު ފަރިތަކުރުންތަކަށް ކުޅުންތެރިން ނުކުތްއިރު ކުޅުންތެރިންގެ ފިޓްނަސް ހުރީ ކަންބޮޑުވާ މިންވަރެއްގައި ކަމަށާއި، އެކަމަކު ފަރިތަކުރުންތައް ހުއްޓާލިއިރު ކުޅުންތެރިން ފިޓްނަސް ހިފެހެއްޓުމަށް އަމަލުކުރާނެ އުސޫލުތަކެއް ހަދައި އަލުން ފަރިތަކުރުންތައް ފެށިއިރު ކުޅުންތެރިންގެ ފިޓްނަސްއަށް ބޮޑު ބަދަލުތަކެއް އައިސްފައިވާ ކަމަށްވެސް ބުންޏެވެ.
އައު ސީޒަނަށް ދުރާލާ ތައްޔާރުވުން އެއީ ސީޒަނަށް ނުކުންނައިރު ޓީމަށް ލިބޭނެ ބޮޑު ފައިދާއެއް ކަމަށާއި، އެގޮތުން މާޒިޔާއިން އައު ސީޒަން ފަރިތަކުރުންތައް އަވަހަށް ފެށުމުން އޭގެ ފައިދާތަކެއް ކުރާނެ ކަމަށްވެސް ނިޒާމްބެ ބުންޏެވެ.
މި ނޫސްވެރިންގެ ބައްދަލުވުމުގައި މާޒިޔާގެ ކެޕްޓަން އަސަދުﷲ އަބްދުﷲ ބުނީ ކުޅުންތެރިން ތިބީ މެޗެއް ކުޅެލަން ކެތްމަދުވެފައި ކަމަށާއި، އެކަން އަންގާރަ ދުވަހުގެރޭ ކުޅޭ ޗެރެޓީ ޝީލްޑް މެޗުން ފެނިގެންދާނެ ކަމަށެވެ. އަދި ކުޅުންތެރިން މިވަގުތު ތިބީ ވަރަށް ފޯމުގައި ކަމަށާއި، ލީގު ދިފާއުކުރުން އެއީ ޓީމުގެ އަޒުމެއް ކަމަށްވެސް އަސަދުﷲ ބުންޏެވެ.
އައު ސީޒަނަށް ފަރިތަކުރުންތައް ފެށި ފުރަތަމަ ޓީމަކީ މާޒިޔާއެވެ. އެގޮތުން މާޒިޔާއިން ވަނީ އޮކްޓޯބަރު މަހުގެ 10 ވަނަ ދުވަހު ފަރިތަކުރުންތައް ފަށާފައެވެ. ކުރިއަށް އޮތް ސީޒަނަށް މާޒިޔާ ނުކުންނައިރު، އެޓީމުން ވަނީ ތަޖުރިބާކާރު މިޑްފިލްޑަރު މުޙައްމަދު އުމެއިރުގެ އިތުރުން ޔޫރަޕުގެ ތިން ގައުމެއްގައި ގިނަ އަހަރުތަކެއް ވަންދެން ކުޅެފައިވާ ސާބިއާގެ ގޯލްކީޕަރު ނިކޯލާ ވުޔަނަޗް އެ ޓީމަށް ގެނެސްފައެވެ.
ރާއްޖޭގެ ފުޓްބޯޅަ ސީޒަން ފެށުމަށް ކުޅޭ އެފްއޭ ޗެރިޓީ ޝީލްޑް މެޗުގައި އަންގާރަ ދުވަހުގެރޭ މާޒިޔާ ނުކުންނާނީ ކުލަބު އީގަލްސްއާ ދެކޮޅަށެވެ. އަދި އެއަށްފަހު މި މަހުގެ 13 ވަނަ ދުވަހު ދިރާގު ދިވެހި ޕްރިމިއާ ލީގުގެ ކުޅުން ފަށާއިރު، ލީގުގެ ފުރަތަމަ މެޗުގައި ހަމަ އެ ދުވަހު އެންމެ ފަހުގެ ޗެމްޕިއަން މާޒިޔާ ނުކުންނާނީ ޔުނައިޓެޑް ވިކްޓަރީ (ޔޫވީ) އާ ދެކޮޅަށެވެ.
