އެތެރެހަށީގައި ރައްކާކޮށްގެން ރާއްޖެއަށް މަސްތުވާތަކެތި އެތެރެކުރި މީހަކު ހައްޔަރުކޮށްފިއެވެ.

ފުލުހުންގެ ޑްރަގް އެންފޯސްމަންޓް ޑިޕާޓްމަންޓުން ތަހުގީގު ކުރަމުންދާ މި މައްސަލައާއި ގުޅިގެން ހައްޔަރުކޮށްފައިވަނީ މިދިޔަ ނޮވެމްބަރު މަހުގެ 28 ވަނަ ދުވަހު ރާއްޖެއަށް އައި ބްރެޒިލްގެ ރައްޔިތެއް ކަމަށްވާ ރެނާޓޯ އަލްފްރެޑޯ (21އ) އެވެ.

އޭނާ ހައްޔަރުކުރި ގޮތުގެ ތަފްސީލް ހިއްސާކުރަމުން ފުލުހުން ބުނީ އެތެރެހަށީގައި ރައްކާކޮށްގެން ރާއްޖެއަށް މަސްތުވާތަކެތި އެތެރެކުރަން އުޅޭކަމަށް ކަސްޓަމްސް އޮފިސަރުންނަށް ޝައްކުކުރެވިގެން އޭނާ ހުއްޓުވައި، އެކްސްރޭ ކުރިކަމަށެވެ.

އޭނާގެ ހަށިގަނޑުގެ ތެރޭގައި އެއްޗެހިތަކެއް ހުރިކަމަށް ފާހަގަކުރެވުމުން ކަސްޓަމުން ފުލުހުންނަށް މައުލޫމާތު ދިނުމުން، އެ ފިރިހެން މީހާ ހޮސްޕިޓަލަށް ގެންގޮސް، ޑޮކްޓަރަށް ދެއްކުމުން އޭނާގެ ހަށިގަނޑުގައި "ފޮރިން ބޮޑީސް" ތަކެއް ހުރިކަމަށް ޔަގީންކުރެވުނުކަމަށް ފުލުހުން ބުނެއެވެ.

އޭނާ ހޮސްޕިޓަލުގައި އެޑްމިޓްކޮށް، ފުލުހުންގެ ބެލުމުގެ ދަށުގައި އޮތްއިރު އޭނާ ބޮޑުކަމުދިޔަ ތަކެތީގެ ތެރެއިން މަސްތުވާތަކެތިކަމަށް ޝައްކުކުރެވޭ އެއްޗެއްހުރި 66 ބުލެޓް ފެނިފައިވާކަމަށްވެސް ފުލުހުން ބުންޏެވެ. ނަމަވެސް، އެއީ ކޮންބާވަތެއްގެ މަސްތުވާތަކެތިކަމެއް ފުލުހުން ހާމަކޮށްފައެއްނުވެއެވެ. ފުލުހުން ބުނީ މި މައްސަލައާ ގުޅިގެން އޭނާގެ ބަންދާމެދު ގޮތެއް ނިންމުމަށް ކްރިމިނަަލް ކޯޓަށް ހާޒިރުކުރުމުން، ޝަރީއަތް ނިމެންދެން އޭނާ ބަންދުގައި ބެހެއްޓުމަށް އަމުރުކޮށްފައިވާކަމަށެވެ.

ފަހަކަށް އައިސް ރާއްޖެއަށް ކަނޑުމަގުންނާއި ވައިގެމަގުން އެތެރެކުރާ މަސްތުވާތަކެތި އަތުލައިގަނެވޭ މިންވަރުވަނީ އިތުރުވެފައެވެ. އަދި މަސްތުވާތަކެތީގެ ވަބާގައި ޖެހިފައިވާ ޒުވާނުންގެ މައްސަލަތައް އިތުރުވަމުން އަންނައިރު، ފުލުހުންނާއި ކަމާއިބެހޭ އިދާރާތަކުން އަންނަނީ ރާއްޖެއަށް އެތެރެވާ މަސްތުވާތަކެތި ހުއްޓުވުމަށް ހާއްސަ މަސައްކަތްތަކެއް ފަށާފައެވެ.