އުތުރު ކޮރެއާގައި ކޮވިޑްގެ ކޭސްއެއް ނެތްކަމަށް ގަބޫލުކުރަން އުނދަގޫ: ދެކުނު ކޮރެއާ
6 ޑިސެމްބަރު 2020 | އާދީއްތަ 04:04ޑަބްލިޔުއެޗްއޯ އިން ބުނެފައިވަނީ އުތުރު ކޮރެއާއިން ކޮވިޑަށް ޝައްކުކުރެވޭ 8594 ކޭސްއެއް ފެނިގެން އަންގާފައިވާކަމަށް
ދެކުނު ކޮރެއާގެ ފޮރިން މިނިސްޓަރ ކަންގް ކިޔަންގ ވާ ނޫސްވެރިންނާ ބައްދަލުކުރައްވާ ވާހަކަދައްކަވަނީ
އުތުރުކޮރެއާގައި ކޮވިޑް-19 ގެ ކޭސްއެއް ނެތްކަމަށް އެ ގައުމުން ބުނާބުނުން ގަބޫލުކުރަން އުނދަގޫކަމަށް ދެކުނު ކޮރެއާގެ ފޮރިން މިނިސްޓަރ ކަންގް ކިޔަންގ ވާ ވިދާޅުވެއްޖެއެވެ.
ދެކުނު ކޮރެއާއިން އެކަމާމެދު ޝައްކުކުރާކަން ރަސްމީކޮށް ހާމަކޮށްފައިވަނީ ކޮވިޑްގެ ޕެންޑަމިކުން އަރައިގަތުމަށް އުތުރު ކޮރެއާއަށް އެހީތެރިކަން ފޯރުކޮށްދޭން ތައްޔާރަށް އޮތްކަން ހާމަކުރަމުންނެވެ. ދެކުނު ކޮރެއާއިން އެހީތެރިވެދިނުމަށް ހުށަހެޅި މި ހުށަހެޅުން އަދި އުތުރުކޮރެއާއިން ގަބޫލުކޮށްފައެއް ނުވެއެވެ.
ކަންގް ވިދާޅުވީ އުތުރު ކޮރެއާގައި ކޮވިޑްގެ އެއްވެސް ކޭސްއެއް ނެތުމަކީ ގަބޫލުކުރަން ވަރަށް އުނދަގޫކަމެއް ކަމަށެވެ. އުތުރުކޮރެއާގައި ވައިރަސް ނެތްއިރު ވައިރަސް ކޮންޓްރޯލްކުރުމަށް ފިޔަވަޅުތައް އަޅަމުންދާ ކަމަށް ކަންގް ވިދާޅުވިއެވެ. އަދި ނެތް ބައްޔެއް ކޮންޓްރޯލްކުރުމަށް ގިނަ ފިޔަވަޅުތަކެއް އަޅަމުންދާތީ އެއީ އާދަޔާ ޚިލާފުކަމެއްކަމަށް ކަންގް ވިދާޅުވިއެވެ.
ދުނިޔޭގެ ސިއްހަތު ޖަމިއްޔާ (ޑަބްލިޔުއެޗްއޯ) އިން ބުނެފައިވަނީ އުތުރު ކޮރެއާއިން ކޮވިޑް ކަމަށް ޝައްކުކުރެވޭ 8594 ކޭސް އެއް ފެނިފައިވާކަން އެޖަމިއްޔާއަށް އަންގާފައިވާކަމަށެވެ.
ކޮވިޑްގެ ޕެންޑަމިކާއެކު ކުރިންވެސް ދުނިޔެއާ އެކަހެރިކޮށް ކަންކަން ކުރަމުން އަންނަ އުތުރުކޮރެއާ ވަނީ އިތުރަށް އެކަހެރިވެފައިކަމަށާއި ގައުމުގެ އެތެރޭގައި ހިނގަމުން އަންނަ ކަންކަން މަޝްވަރާތައް ކުރަމުން އަންނަނީ ވަރަށް މަދުންކަމަށް ކަންގް ވިދާޅުވިއެވެ. އުތުރު ކޮރެއާގެ ސްޓޭޓް ނިއުސް އެޖެންސީން މި ހަފްތާގައި ބުނެފައިވަނީ ވައިރަސް ފެތުރުން ކޮންޓްރޯލްކުރުމަށް ސަރުކާރުން އެމަރޖެންސީ ފިޔަވަޅުތަކެއް އަޅާފައިވާކަމަށެވެ.
ދެކުނު ކޮރެއާގެ އިންޓަލިޖެންސުން ބުނާގޮތުގައި އުތުރުކޮރެއާގައި ވައިރަސް ނެތްކަމަކަށް ނުނިންމެނޭއެވެ. އެއީ އެ ގައުމުން ޗައިނާއާއެކު ވިޔަފާރީގެ މުއާމަލާތްތައް ހިންގާފައިވާއިރު މި އަހަރުގެ ޖެނުއަރީ މަހުގެ ފަހުކޮޅު އެ ގައުމުގެ ބޯޑަރު ބަންދުކުރުމުގެ ކުރިން މީހުން ޗައިނާއަށް އައިސް ގޮސް އުޅެފައިވާތީކަމަށެވެ.
