ކްރޮއޭޝީއާގައި ކޮވިޑު ޖެހުނު 99 އަހަރުގެ މީހާ ބަލިން ރަނގަޅުވުމުން ދިނީ "ތަމްބްސް އަޕް" އެއް

ކްރޮއޭޝިއާގައި ކޮވިޑު ޖެހުނު 99 އަހަރުގެ އަންހެނަކު ބަލިން ރަނގަޅުވެއްޖެއެވެ.

ޑެއިލީމެއިލްގައި ރިޕޯޓް ކޮށްފައިވާ ގޮތުން އުމުރުން 99 އަހަރުގެ މާގަރިޓާ ކްރަންޖެކް ކޮވިޑް-19 އަށް ޕޮޒިޓިވްވެގެން ހަސްފަތާލުގައި އެނދުމަތި ކުރީ މިދިޔަ އޮކްޓޯބަރު މަހުގެ ފަހުކޮޅުއެވެ. އޭނާއަކީ އުމުރުން ދުވަސްވީ މީހުން ބައިތިއްބާ މަރުކަޒެއްގައި ދިރިއުޅެމުން ދިޔަ މީހެއް ކަމަށް ޑެއިލީ މެއިލްގައި ރިޕޯޓް ކޮށްފައިވެއެވެ.

ރިޕޯޓްތައް ބުނާގޮތުން މާގަރިޓާ ވަނީ އޮގުލިން ޖެނެރަލް ހޮސްޕިޓަލުގައި 3 ހަފްތާ ވަންދެން ފަރުވާ ހޯދާފައެވެ. އަދި އެންމެ ފަހުން ބަލިން ރަނގަޅުވުމާއެކު، މީޑިއާތަކަށް ދިން އިންޓަރވިއުއެއްގައި "ތަމްބްސް އަޕް" އެއް ދިން ފޮޓޯ މިހާރު މީސްމީޑިއާގައި ދަނީ ވައިރަލް ވަމުންނެވެ. ނޫސްވެރިންނަށް ދިން އިންޓަރވިއުއެއްގައި މާގަރިޓާ ބުނި ގޮތުގައި ކޮވިޑަށް ފަރުވާ ހޯދުމަށްފަހު މިހާރު އޭނާގެ ޙާލު މުޅިން ރަނގަޅެވެ.

އުމުރުން ދުވަސް ވުމުގެ ސަބަބުން މާގަރިޓާ އެނދުމަތިވެފައި އޮންނަތާ ގިނަ ދުވަސްތަކެއް ވެފައިވީނަމަވެސް، އޭނާގެ ސިއްޙީ އިތުރު މައްސަލައެއް ނެތް ކަމަށް ރިޕޯޓުތައް ބުނެއެވެ. އެގޮތުން އުމުރުން ދުވަސްވީ މީހުން ކޮވިޑު ޖެހިގެން ޙާލަތު ގޯސްވާ ނިސްބަތް ގިނަ ނަމަވެސް، މާގަރިޓާ ބަލިން ފަސޭހަވީ އެ ސަބަބާހެދި ކަމަށް ވެދާނެ ކަމަށް ޑޮކްޓަރުންނާ ޙަވާލާދީ ބޭރުގެ މީޑިއާތަކުން ރިޕޯޓު ކުރެއެވެ.

މުޅި ދުނިޔެއިން ކޮވިޑް-19 ޖެހިގެން 1،524،000ށް ވުރެ ގިނަ މީހުން މަރުވެފައިވާއިރު، އޭގެ ތެރޭގައި އުމުރުން ދުވަސްވީ މީހުންނާއި، ސިއްޙީ އެކި މައްސަލަތައް ތަޙައްމަލު ކުރަމުންދާ މީހުން ނިސްބަތުން ގިނައެވެ.