ސަތޭކަ ދުވަސް ވަންދެން އެމެރިކާގައި މާސްކު އެޅުން މަޖުބޫރު ކުރަނީ

100 ދުވަސް ވަންދެން އެމެރިކާގައި މާސްކު އަޅަން މަޖުބޫރު ކުރާނެ ކަމަށް އެ ގައުމުގެ އިންތިހާބީ ރައީސް ޖޯ ބައިޑަން ވިދާޅުވެއްޖެއެވެ.

"ސީއެންއެން" އަށް ދެއްވި ބަސްދީގަތުމެއްގައި ޖޯ ބައިޑަން ވިދާޅުވީ، މާސްކު އަޅައިފިނަމަ ބޮޑު ތަނުން އެމެރިކާގައި ކޮވިޑް-19 ފެތުރުން ކޮންޓްރޯލް ކުރެވިގެން ދާނެކަމަށް ގަބޫލުކުރައްވާކަމަށެވެ. ބައިޑަން ވިދާޅުވީ، އެ ގައުމުގެ ރައީސްކަމުގެ ހުވާ ކުރާ ދުވަހު އެގައުމުގައި 100 ދުވަހަށް މާސްކު އެޅުން މަޖުބޫރު ކުރާނެކަމަށެވެ.

އެގޮތުން މަގުމަތީގައި އުޅޭއިރު މާސްކު އެޅުމާއި، ދަތުރުފަތުރު ކުރާއިރުވެސް މާސްކު އެޅުމާއެކު އަނގަޔާއި ނޭފަތް ނިވާކުރަން މަޖުބޫރު ކުރައްވާނެކަމަށް ބައިޑަން ވިދާޅުވިއެވެ. ވަކިން ހާއްސަކޮށް އެއަރޕޯޓުގައި އަދި ފަތުރުވެރިކަމާއި އެ ސިނާއަތުގައި މަސައްކަތް ކުރާ އެންމެހާ ފަރާތްތަކުން މި ގަވައިދުތަކާއި އެއްގޮތަށް އަމަލު ކުރުމަށްވެސް މަޖުބޫރު ކުރައްވާނެކަމަށްވެސް ވިދާޅުވިއެވެ.

އެމެރިކާއިން މިހާތަަނަށް 14 މިލިއަން މީހުންނަށް ވަނީ ކޮވިޑް-19 ޖެހިފައެވެ. އަދި ޖުމްލަ 275،000 މީހުންވަނީ މި ބަލީގައި މަރުވެފައެވެ. އެމެރިކާއަކީ މުޅި ދުނިޔެއަށް ބަލާލި ނަމަވެސް، މި ބަލީގެ ހާލަތު އެންމެ ބޮޑު އެއް ގައުމެވެ. އަދި މިހެން ދިމާވީ ބައެއް ފިޔަވަޅުތައް އެޅުން ލަސްވެގެންކަމަށް ބައެއް މާހިރުން ބުނެފައިވެއެވެ.