އީގަރ މުސްލިމެއްގެ ދުލުން - ކޭމްޕްތަކުގައި ހުކުރު ދުވަހު ކާންދެނީ އޫރުމަސް!
މި ތުހުމަތުތައް ކޮށްފައިވަނީ އީގަރ ދަރިފަސްކޮޅުގެ ސޯތްބޭ ނަމަކަށް ކިޔާ ޑޮކްޓަރެއް
ޗައިނާގައި ދިރިއުޅެމުންދާ މުސްލިމު ރައްޔިތުންތަކެއް
ޗައިނާގެ "ރީ-އެޑިއުކޭޝަން" ކޭމްޕްތަކާއި ޑިޓެންޝަން ސެންޓަރުތަކުގައި އީގަރ މުސްލިމުންނަށް އޫރު މަސް ކާންދޭ ކަމަށް، އެތަނުގައި ބަންދުކޮށްފައި ހުރިކަމަށް ބުނާ ޑޮކްޓަރަކު ޝާއިއުކުރި ފޮތެއްގައި ތުހުމަތުކޮށްފިއެވެ.
ސޭރަގުލް ސޯތްބޭ ނަމަކަށް ކިޔާ މި އަންހެން މީހާ، މިހާރު ދިރިއުޅެމުން އަންނަނީ ސްވީޑްންގައެވެ. އޭނާއަކީ ޑޮކްޓަރެއްގެ އިތުރުން މުދައްރިސެއް ކަމަށް "އަލްޖަޒީރާ" ގެ ރިޕޯޓެއްގައިވެއެވެ. އެގޮތުން ސޯތްބޭގެ "ދަ ޗީފް ވިޓްނަސް" ފޮތުގައި އޭނާވަނީ، ޗައިނާގެ މައި ސަރުކާރުން ހިންގާ ކޭމްޕްތަކުގައި އޭނާގެ ތަޖުރިބާއާއި، އޭނާއަށް ފެނުނު މަންޒަރުތައް ތަފްސީލުކޮށްދީފައެވެ.
ސޯތްބޭ ތުހުތަމުކުރާ ގޮތުގައި، މި ކޭމްތަކުގައި މީހުންނަށް އަނިޔާ ކުރުމާއި، ޖިންސީ ހާނިއްކަ ދިނުމާއި ދަރިމައިވުން ހުއްޓުވަން ގަދަކަމުން "ސްޓްރެލައިޒް" ކުރުމަކީ އާންމުކަމެކެވެ. އަދި އެ ކޭމްޕްތަކުގައި ތިބި މުސްލިމުންނަށް ހުކުރު ދުވަހުގެ "ހާއްސަ" ކެއުމަކީ އޫރު މަސް ކަމަށް އޭނާ ތުހުމަތުކޮށްފައިވެއެވެ.
އަލްޖަޒީރާއަށް ދިން ބަސްތީގަތުމެއްގައި ސޯތްބޭ ބުނީ، އޭނާގެ ލޮލުން ފެނުނު ލާއިންސާނީ އަމަަލުތަކުގެ ސަަބަބުން އަދިއަދަށް ދާންދެންވެސް ބިރުވެރި ހުވަފެންތައް ފެންނަ ކަމަށެވެ. އަދި މިއީ ކިޔައިދޭންވެސް އުނދަގޫ ވާހަކަތަކެއްކަން ފާހަގަކޮށް އޭނާ ބުނީ، އޫރު މަސް ކާން ދިނުމުގެ ސިޔާސަތު ފަރުމާކުރެވިފައިވަނީ ޒިންޖިއާންގެ މުސްލިމުން ލަދުގަންނަވާލަން ކަމަށެވެ.
އީގަރ މުސްލިމުންގެ މައްސަލައިގައި ޗައިނާއަށް އަމާޒުވާ ފާޑުކިޔުންތައް އިތުރުވަމުން އަންނައިރު، ޗައިނާ ސަރުކާރުން މި ތުހުމަތުތައް ދޮގުކުރެއެވެ. އަދި ބުނަނީ، އެ ކޭމްޕްތައް ހިންގަނީ ހައްދުފަހަނައަޅާފައިވާ ފިކުރާ ދެކޮޅަށް ކަމަށެވެ.
