ކ. މާލެ
|
2 ޑިސެންބަރ 2020 | ބުދަ 20:08
ކުރީގެ ރައީސް އަބްދުﷲ ޔާމީން، އޭރުގެ ނައިބްރައީސް އަހުމަދު އަދީބާއެކު ޕީޕީއެމްއިން ބޭއްވި ޖަލްސާއެއްގެ ތެރެއިން
ކުރީގެ ރައީސް އަބްދުﷲ ޔާމީން، އޭރުގެ ނައިބްރައީސް އަހުމަދު އަދީބާއެކު ޕީޕީއެމްއިން ބޭއްވި ޖަލްސާއެއްގެ ތެރެއިން
ރައީސް އޮފީސް
އެމްއެމްޕީއާރްސީ ޙިޔާނާތުގެ މައްސަލަ
ޔާމީނުގެ އޯޑަރަށް ސުޕްރީމް ކޯޓުގެ ބެންޗާއި "ކުޅެލިގޮތް" އަދީބުގެ ދުލުން!
 
ހިޔާނާތުގެ ފައިސާއިން ކުރި އެންމެ ބޮޑު އެއް ކަމަކީ ސުޕްރީމް ކޯޓުގެ ބެންޗާ ކުޅެލުން
 
ބަދަލު ގެންނަން ބޭނުންވީ އެމްޑީޕީ މެމްބަރެއް ލައްވާ، އެކަމަށް 20 މިލިއަން ޚަރަދުކުރި
 
ފަނޑިޔާރުން ވަކި ކުރުމާއި، ނަންތައް ފާސްކުރުމަކީ އެންމެ އުނދަގޫވި މަރުޙަލާ

2014 ވަނަ އަހަރު ކޯޓުތަކުގެ ޤާނޫނަށް ގެނައި އެއްވަނަ އިސްލާހުގެ ދަށުން ސުޕްރީމް ކޯޓުގެ ބެންޗަށް ބަދަލުތަކެއް ގެނައެވެ. އެގޮތުން ސުޕްރީމް ކޯޓުގެ ބެންޗުގައި 7 ބޭފުޅުން ތިއްބެވިއިރު، ޤާނޫނަށް ގެނައި އިސްލާހާއެކު އެ އަދަދު 5ށް ދަށް ކުރިއެވެ. އެ އިސްލާހާއެކު، ސުޕްރީމް ކޯޓުގެ އުއްތަމަ ފަނޑިޔާރު އަހުމަދު ފާއިޒް ހުސެއިންނާއި، ފަނޑިޔާރު މުއުތަސިމް އަދުނާނު މަޤާމުންވެސް ދުރުކުރިއެވެ.

އެކަން ހިނގާ ދިޔަ ގޮތާއި، އެކަން ކުރުމަށްޓަކައި ކުރި މަސައްކަތްތައް ކުރީގެ ނައިބްރައީސް އަހުމަދު އަދީބާއި، ދައުލަތާ ދެމެދު ވެވިފައިވާ އިއުތިރާފް އެއްބަސްވުމަށް އަދީބުގެ ފަރާތުން ހުށައެޅި ސިއްރު ބަޔާނުގައި ވަނީ ކިޔައިދެއްވާފައެވެ. އެގޮތުން ކުރީގެ ރައީސް އަބްދުﷲ ޔާމީނުގެ އޯޑަރަށް އެކަން ކުރުމަށް މަޖިލިސް މެމްބަރުންގެ އެހީ ހޯދި ގޮތްވެސް އަދީބު ވަނީ ކިޔާދެއްވާފައެވެ. އަދި އެމްއެމްޕީއާރްސީގެ ޙިޔާނާތުގެ ފައިސާއިން ޖުޑީޝަރީއާއި، ފަނޑިޔާރުންނަށް އެކި ކަންކަމާއި ގުޅިގެން ކުރި ޚަރަދުތަކުގެ ތަފްސީލުތައްވެސް އަދީބުގެ ބަޔާނުގައި ހިމަނާފައިވެއެވެ.

ހިޔާނާތުގެ ފައިސާއިން ކުރި އެންމެ ބޮޑު އެއް ކަމަކީ ސުޕްރީމް ކޯޓުގެ ބެންޗާ ކުޅެލުން!

އަދީބު ކިޔައިދެއްވާފައިވާ ގޮތުގައި އެފައިސާ ބޭނުން ކޮށްގެން ކުރި އެންމެ ބޮޑު އެއް ކަމަކީ ސުޕްރީމް ކޯޓުގެ ފަނޑިޔާރުންގެ ބެންޗު 7ން 5ށް މަދު ކުރުމަށް ކުރަން ޖެހުނު މަސައްކަތެވެ. އެ މަސައްކަތަށް އެކި މަރުޙަލާތަކުގައި ޙިޔާނާތުގެ ފައިސާގެ ބޭނުން ކުރަން ޖެހުނު ކަމަށް އަދީބު ވިދާޅުވެފައިވެއެވެ..

އެ ދުވަސްވަރު ރައީސް ޔާމީން ބޭނުންވީ ރައީސް ޔާމީން ބޭނުންވާ މީހަކު ސުޕްރީމް ކޯޓުގެ ބެންޗަށް ނެގުމަށް، އެގޮތުން ދިވެހިރާއްޖޭގެ ކޯޓުތަކުގެ ޤާނޫނަށް އިސްލާޙެއް ގެންނަން ބޭނުންވާ ކަމަށާއި، އިސްލާޙުގެ މަޤްސަދަކީ ސުޕްރީމް ކޯޓުގައި ތިބި 7 ފަނޑިޔާރުންގެ އަދަދު ދަށްކޮށް، 5 ފަނޑިޔާރުންނަށް ހެދުމަށް ބޭނުންވާ ކަމަށް ރައީސް ޔާމީން އަޅުގަނޑަށް ދެންނެވި
ކުރީގެ ނައިބްރައީސް އަހުމަދު އަދީބުގެ ސިއްރު ބަޔާން

މި މަސައްކަތް ކުރުމަށް އަދީބު ފުރަތަމަ މަޝްވަރާ ކުރެއްވީ އޭރުގެ ފަނޑިޔާރު އަބްދުﷲ ސައީދާއި، ފަނޑިޔާރު އަލީ ޙަމީދު މުޙައްމަދުއާއެވެ. އަދި އޭރު އުއްތަމަ ފަނޑިޔާރަކަށް އަޙުމަދު ފާއިޒު ހުންނެވުމުން އެއްވެސް ކަމެއް އެޖެންޑާ ކުރުމުގެ ބާރުވެސް ނޯންނަ ކަމަށް ވިދާޅުވެ، އެކަން ކުރާނެ ގޮތުގެ އިރުޝާދު އެ ދެބޭފުޅުން އަދީބަށް ދެއްވިއެވެ. އެ ހިސާބުން އަދީބު އަނެއްކާވެސް އެ މަޝްވަރާތައް ރައީސް ޔާމީނަށް ހުށައެޅުއްވިއެވެ.

ބަދަލު ގެންނަން ބޭނުންވީ އެމްޑީޕީ މެމްބަރެއް ލައްވާ، އެކަމަށް 20 މިލިއަން

އަދީބު ބަޔާނުގައިވާ ގޮތުން، ރައީސް ޔާމީނާ މަޝްވަރާ ކުރެއްވުމަށްފަހު، އެ ހުށައެޅުން އެމްޑީޕީ މެމްބަރެއް ލައްވައި ހުށައެޅުން މާ ބުއްދިވެރި ކަމަށް ވިސްނުނެވެ. އެ ހިސާބުން މަރަދޫ ދާއިރާގެ މެމްބަރު އިބްރާޙިމް ޝަރީފާ ބައްދަލު ކުރައްވައި، ޝަރީފަށް 20 މިލިއަން ރުފިޔާ ދިނުމަށް އަދީބު ހުށައެޅުއްވިއެވެ.

އެއާއެކު، ކޯޓުތަކުގެ ޤާނޫނަށް އިސްލާޙު ހުށައެޅުމަށް މަޖިލީހުން މެމްބަރުން ލައްވައި ވޯޓު ހޯދަންޖެހޭ ގޮތާއި، އެކަމަށްޓަކައި ވާހަކަ ދައްކަންޖެހޭ މެމްބަރުން ފާހަގަކޮށް، ވޯޓުލާނެ މީހުންގެ "ޕެކޭޖެއް" މެމްބަރު ޝަރީފު ތައްޔާރު ކުރެއްވި ކަމަށް އަދީބު ވިދާޅުވެއެވެ. އަދި ބިލު ހުށައެޅުމުގެ ކުރިން ޝަރީފަށް 5 މިލިއަން ރުފިޔާ ދީފައިވާނެކަން އަދީބު ފާހަގަކުރެއްވިއެވެ. އެންމެ ފަހުން މި ބިލު ޝަރީފުގެ ފަރާތުން މަޖިލީހަށް ހުށައެޅީ އެމްޑީޕީގެ މެމްބަރުންނަށްވެސް ރޭކާލުމެއް ނެތިއެވެ.

މި ބިލު ޝަރީފުގެ ފަރާތުން މަޖިލީހަށް ހުށައެޅުއްވުމުން ބާކީ 15 މިލިއަން އަދީބު ވަނީ ޝަރީފަށް ދެއްވާފައެވެ. އަދި ކޮމިޓީ މަރުޙަލާ ނިމި ތަޅުމަށް ދިޔައިރު، 43 މެމްބަރުންގެ ވޯޓު ލިބޭނެކަން ޔަޤީންވާ ކަމަށާއި، ބިލު ފާސްވެ، ބޭނުންވި ގޮތަށް ތަސްދީޤުވުމުން ދެން ދިމާވީ އެންމެ އުނދަގޫ މައްސަލަ ކަމަށް އަދީބު ވިދާޅުވެފައި ވެއެވެ.

ފަނޑިޔާރުން ވަކި ކުރުމާއި، ނަންތައް ފާސްކުރުން- އެންމެ އުނދަގޫވި މަރުޙަލާ

އަދީބު ބަޔާނުގައިވާ ގޮތުން މަޖިލީހުން ކޯޓުތަކުގެ ޤާނޫނަށް އިސްލާޙު ގެނައުމަށް ފާސްކޮށް، އެ ބިލު ތަސްދީޤުކުރި ހިސާބުން ދެން ކުރިމަތިވީ އެންމެ އުނދަގޫ ކަންތަކެވެ. އެގޮތުން ފަނޑިޔާރުން ވަކިކުރުމާއި، ނަންތައް ފާސް ކުރުމަކީ މިކަމުގައި އެންމެ އުނދަގޫވި މަރުޙަލާ ކަމަށް އަދީބު ވިދާޅުވިއެވެ. ސަބަބަކީ ފަނޑިޔާރަކު ވަކިކުރާނަމަ، ރައްޔިތުންގެ މަޖިލީހަށް ހުށައަޅައި، ޖަލްސާއަށް ހާޒިރުވެ، ވޯޓުގައި ބައިވެރިވި މެމްބަރުންގެ ތިންބައިކުޅަ ދެބައި އަޢުލަބިއްޔަތުން ފާސް ކުރަން ޖެހޭތީއެވެ. އަދި އެކަމާ ގުޅޭގޮތުން އަނެއްކާވެސް މަރަދޫ ދާއިރާގެ މެމްބަރާ މަޝްވަރާ ކުރި ކަމަށް އަދީބު ވިދާޅުވެއެވެ.

އެކަމާ ގުޅޭގޮތުން ޖުމްހޫރީ ޕާޓީގެ ލީޑަރު ޤާސިމް އިބްރާޙިމްއާ މަޝްވަރާ ކުރެއްވިކަމަށް އަދީބުގެ ބަޔާނުގައިވެއެވެ. އެހެންނަމަވެސް ޤާސިމްގެ ކިބައިން ފެހި ސިގްނަލް ނުލިބުމުން ދެން ވާހަކަދެއްކެވީ ދަނގެތީ ދާއިރާގެ މެމްބަރު އިލްޙާމް އަހުމަދުއާއެވެ. އެއީ 50 މިލިއަން ރުފިޔާގެ މުޤާބިލެއްގެ ގޮތުން ޖުމްހޫރީ ޕާޓީގެ މެމްބަރުން މެދުވެރިކޮށް ވިޕެއް އެޅުމަށެވެ. އެހެންނަމަވެސް އެ އަދަދަށް ރައީސް ޔާމީން އެއްބަސްވެވަޑައިނުގަތުމުން އެ އަދަދު ފަހުން 30 މިލިއަނަށް ދަށް ކުރިކަން އަދީބު ފާހަގަ ކުރައްވާފައިވެއެވެ.

އަދީބު މައުލޫމާތު ދެއްވާ ގޮތުގައި 30 މިލިއަން ނަޤުދު ފައިސާއިން ޙަވާލު ކުރުމަށް އޭދަފުށީ ދާއިރާގެ މެމްބަރު ސަލީމް (ރެޑްވޭވް ސަލީމް) މެދުވެރިކޮށް 20 މިލިއަން ރުފިޔާ އަދި އަމިއްލަ ވިޔަފާރިވެރިއެއްގެ އަތުން 10 މިލިއަން ރުފިޔާ ނަގާފައިވެއެވެ. އަދި ބަދަލެއްގެ ގޮތުން މުޙައްމަދު އައްލާމް ލަތީފް މެދުވެރިކޮށް އެސްއޯއެފުން ޑޮލަރު ޗެކް ދިން ކަމަށް އަދީބު ވިދާޅުވެފައި ވެއެވެ.

ކޮންމެއަކަސް މި މަރުޙަލާ ނިމިގެން ދިޔައިރު އިލްހާމަށް 30 މިލިއަން ރުފިޔާ ޙަވާލު ކޮށްފައިވާއިރު، އެކަން ހިނގާ ނުހިނގާ ގޮތް ބެއްލެވުމަށް ދޭތެރެ ދޭތެރެއިން ރައީސް ޔާމީން ގުޅުއްވާ ކަމަށްވެއެވެ.

ރައީސް ޔާމީނު އަޅުގަނޑު ގާތުގައި ވިދާޅުވި ރައީސް ޔާމީން ބޭނުންވަނީ ޖުޑީޝަރީގެ ބާރު ކަމަށް، އެހެން ނޫނީ ރާއްޖެ އަންނަ ޕްރޮޖެކްޓްތައް ހުއްޓުވާލެވޭނެ ކަމަށް އަޅުގަނޑު ގާތުގައި ރައީސް ޔާމީން ބުނެފައިވޭ، ވަކި ކުރަން ޖެހޭ ފަނޑިޔާރުންގެ ނަންތައްވެސް ނިންމީ ރައީސް ޔާމީން، އޭގެ ފަހުން އުއްތަމަ ފަނޑިޔާރަކަށް އަބްދުﷲ ސައީދުގެ ނަންވެސް ހުށައެޅީ ރައީސް ޔާމީން،
ކުރީގެ ނައިބްރައީސް އަހުމަދު އަދީބުގެ ސިއްރު ބަޔާން

ސުޕްރީމް ކޯޓަށް ބޭނުންވާ ބަދަލުތައް ގެނައުމަށްފަހު ކޯޓުތައް މެދުވެރިކޮށް ރައީސް ޔާމީން ހިންގެވި ޖަރީމާތަކުގެ ވާހަކަތައް މިއަދު މި ދަނީ ފެންމަތިވަމުންނެވެ. އެގޮތުން ކުރީގެ ރައީސް އަދި މިހާރުގެ ރައްޔިތުންގެ މަޖިލީހުގެ ރައީސް މުޙައްމަދު ނަޝީދަށް ޙުކުމް ކުރުމުގެ ކުރިން އެ ޙުކުމުގެ ކޮޕީއެއް ނައިބްރައީސް އަދީބުއާއި، ރައީސް ޔާމީނަށް ލިބިވަޑައިގަންނަވާފައިވާއިރު، ފުރަތަމަ ޙުކުމުގައި އޮތީ 10 އަހަރު ނަމަވެސް، ރައީސް ޔާމީނުގެ އެދިވަޑައިގަތުމަށް އެ އަދަދު 13 އަށް އިތުރު ކުރިކަންވެސް އަދީބު ފާހަގަ ކުރައްވާފައި ވެއެވެ. އަދި ކޯޓުތަކުގެ ފުރިހަމަ ބާރާއެކު ޖުޑީޝަރީއަށް "އަތް ބޭނުމަށް" ހިންގި އެފަދަ ކަންކަމުގެ ވާހަކަތައްވެސް އަދީބު ވަނީ ހިއްސާ ކުރައްވާފައެވެ.

އެންމެ ފަހުން އަޕްޑޭޓް ކުރީ: 3 ހަފްތާ ކުރިން
ރިވިއު ކުރީ: އަބުދުﷲ ނަސީރު އިބްރާހިމް
15%
4%
2%
49%
17%
13%
ކޮމެންޓް
5 ޖެނުއަރީ 2021 | އަންގާރަ 13:27
ހާމިދު ހުސައިން
ހެޔޮ ނިޔަތުގައި މަރުވެ ދިއުން ރަނގަޅު 💥
4 ޑިސެންބަރ 2020 | ހުކުރު 22:03
އައިށާ
ސުޕްރީމް ކޯޓަށް ބަދަލު ގެންނަން ހަދަންވީގޮތް އަބްދުﷲ ސައީދު އާއި އަލީ ހަމީދު ކައިރިން ޔާމީން އާއި އަދީބު ނާ ހާނެކަން ކުޑަކުއްޖަކަށްވެސް އެގޭނެ. ޔާމީން އާއި އަދީބުގެ ހިޔަޅުވިސްނުން އެމީ ހުުންނަށްވުރެ މާގަދަވާނެ.
4 ޑިސެންބަރ 2020 | ހުކުރު 21:55
އައިށާ
ސުޕްރީމް ކޯޓަށް ބަދަލު ގެނ
3 ޑިސެންބަރ 2020 | ބުރާސްފަތި 04:46
ބުރޯއި
ކަލޯ އޯޑަރަށޭ ކިޔައި މިއަދު ތިޔައުޅެނީ ހަމައެކަނި ޔާމީން ކުއްވެރި ކުރަން އުތަ! ވެރިމީހާ ކުރިޔަސް ގާނޫނާ ހިލާފް އަމުރަށް ތަ ބާވާން ނުޖެހޭކަމެއް އެވަރުގެ މަތީ މަގާމެއްގަ ހުރިއިރު ނުދެނަހުރިންތަ!
3 ޑިސެންބަރ 2020 | ބުރާސްފަތި 03:10
ޅިޔަނު
ހެހެހެހެ. އަދީބަކީ ކާކު؟ އަދީބަކީ އެމްޑީޕީ އިން އެދުނު ކޮންމެ ގޮތަކަށް ވާހަކަ ދައްކާ މީހެއް.
3 ޑިސެންބަރ 2020 | ބުރާސްފަތި 00:03
މުހަންމާ
ރޯ ބުހުތާން، އެމް.ޑީ.ޕީ ވެރިކަމަށް ގެންނަން އަދީބު ޚަރަދު ކުރީ. މިވާހަކަ މިތިލަކުރީ އެމް.ޑީ.ޕީ އިން މިހާރު ކުރަމުންދާ ވައްކަމަށް ފަސްއަޅަން.
2 ޑިސެންބަރ 2020 | ބުދަ 23:01
ޟަޒް
މަވޯޓާ ޝަރީފް އިސްތިއުފާ ދޭންޖެހޭ.
2 ޑިސެންބަރ 2020 | ބުދަ 22:38
ބަބަބބ ބަޑިއަ ބުދުﷲ
ތިމައްސަލަ ގަވާޢިދުން ބަލަންޖެހޭނެ!މަވޯޓާއަކީ އެމްޑީޕީ ޚަރާ ބު ކުރަން އެޕާޓީއަށް ވަދެގެންއުޅުނު ގައްދާރެއްކަން މާކުރިންވެސްއަހަރެމެންނަންއެގޭ އެމްޑީޕީ މީހުންހީކުރީތާ އެއީރަންގަޑެއްކަމަން !!!މިހާރުއެގޭތަ؟ތި ބުނާއިލްހާމު ކަރުފުއްޕާފާގޮވަނީ ކަމެއްނެތިގެނެން ނޫކަންވެސްއެގޭ ހައްގުއަދަ ބު ދޭންޖެހޭނެ
2 ޑިސެންބަރ 2020 | ބުދަ 22:32
ކީކުރަާނީ
ސިއްރު ބަޔާން ސިއްރެއްނުވިތާ
2 ޑިސެންބަރ 2020 | ބުދަ 21:05
އަހުމަދު
ރައީސް ޔާމީންގެ ދުރުވިސްނުންފުޅު ވަރަށް ރަނގަޅުކަމަށް މިބަލަނީ،