ރެއާލުގެ ކޯޗުގެ މަގާމުން އިސްތިއުފާ ދޭކަށް ނުވިސްނަން: ޒިދާން

ރެއާލް މެޑްރިޑުގެ ކޯޗުގެ މަގާމުން އިސްތިއުފާ ދިނުމަށް ނުވިސްނާ ކަމަށް އެ ޓީމުގެ ކޯޗު ޒިނެދިން ޒިދާން ބުނެފިއެވެ.

ޔުއެފާ ޗެމްޕިއަންސް ލީގުގައި އަންގާރަ ދުވަހުގެރޭ ޝަޚްތަރު ޑޮނެސްކް އަތުން 2-0 ން ބަލިވެ ރެއާލް ވަނީ ގްރޫޕް ސްޓޭޖުން ކެޓުމުގެ ޕްރެޝަރާ ކުރިމަތިލާންޖެހިފައެވެ. ރަށުން ބޭރުގައި ކުޅުނު މެޗުން ރެއާލް ބަލިވިއިރު، މި ފަހަރުގެ ޗެމްޕިއަންސް ލީގުގެ ފުރަތަމަ މެޗުގައި ރެއާލް ވަނީ އަމިއްލަ ދަނޑުގައިވެސް ޝަޚްތަރު އަތުން ބަލިވެފައެވެ.

އަންގާރަ ދުވަހުގެރޭގެ މެޗަށްފަހު ޒިދާން ބުނީ މެޗުން ބަލިވި ނަމަވެސް، ރެއާލުގެ ކޯޗުގެ މަގާމުން އިސްތިއުފާ ދިނުމަށް އެއްވެސް ވަރަކަށް ނުވިސްނާ ކަމަށެވެ. އަދި މި ހާލަތު ބަދަލުކުރުމުގެ ގާބިލުކަން އޭނާގެ ކިބައިގައި އެބަހުރި ކަމަށާއި، އެކަން ކުރެވޭނެ ކަމުގެ ފުރިހަމަ ޔަގީންގަން އެބައޮތް ކަމަށްވެސް ޒިދާން ބުންޏެވެ.

ޒިދާން ބުނީ ކޮންމެ ޓީމަކަށްވެސް އުނދަގޫ ދުވަސްތަކެއް އަންނާނެ ކަމަށާއި، މިއީ އޭނާގެ ޓީމަށް އެފަދަ ހާލަތެއް ކަމަށެވެ. އެކަމަކު ޓީމުގެ ކުޅުންތެރިންވެސް ތިބީ މި ހާލަތު ބަދަލުކޮށް ޓީމުގެ ފުރިހަމަ ގާބިލުކަން ދެއްކުމަށް ތައްޔާރަށް ކަމަށްވެސް ޒިދާން ވަނީ ބުނެފައެވެ.

އަންގާރަ ދުވަހުގެރޭ ޝަޚްތަރު އަތުން ރެއާލް ބަލިވިއިރު، އެ ޓީމު އޮތީ ގްރޫޕް ބީގެ ތިންވަނައިގައި ފަސް މެޗުން ހަތް ޕޮއިންޓާއެކުއެވެ. ރެއާލަށް ގްރޫޕް ސްޓޭޖުގައި ބާކީ އެއް މެޗު އޮތްއިރު، މިހާރު އޮތްގޮތުންނަމަ ޔުއެފާ ޔޫރޮޕާ ލީގަށް ރެއާލް ވެއްޓުމުގެ ބިރު އެބައޮތެވެ.

ޗެމްޕިއަންސް ލީގުގައި އަންނަ ހަފުތާގައި އަމިއްލަ ދަނޑުގައި ރެއާލް ނުކުންނާނީ ގްރޫޕުގެ އެއްވަނައިގައި އޮތް ބޮރޫޝިއާ މޮންޗެންގްލަޑްބަކާ ދެކޮޅަށެވެ.