ނިއުޒިލޭންޑުން ކްލައިމެޓް އިމަރޖެންސީ އިއުލާނުކޮށް، 2025 ގެ ކުރިން ކާރބަން ނިއުޓްރަލް ޤައުމަކަށް ވުމަށް ނިންމައިފިއެވެ.

ނިއުޒިލޭންޑުން ކްލައިމެޓް އިމަރޖެންސީ އިއުލާނު ކުރީ ބުދަ ދުވަހުއެވެ. އެގޮތުން މިއީ މޫސުމަށް ސަމާލުވުމަށް ބޮޑެތި ފިޔަވަޅުތަކެއް އަޅަންޖެހިފައިވާކަން ދައްކާދިނުމުގެ ގޮތުން އެ ޤައުމުގެ ސަރުކާރުން ނިންމި ނިންމުމެއް ކަމަށް ރޮއިޓަރސްގައި ރިޕޯޓް ކޮށްފައިވެއެވެ.

މޫސުމީ ކުއްލި ޙާލަތު އިއުލާނު ކުރުމަށްފަހު ނިއުޒިލޭންޑުން ވަނީ 2025ށް އެ ޤައުމަކީ ކާރބަން ނިއުޓްރަލް ޤައުމަކަށް ހެދުމަށް ނިންމާފައެވެ. އެކަމާ ގުޅޭގޮތުން ވާހަކަ ދައްކަވަމުން ނިއުޒިލޭންޑުގެ ބޮޑުވަޒީރު ޖަސިންޑާ އާރޑެން ވިދާޅުވީ، މިހާރު ހޯދިފައިވާ ހޯދުންތަކަށް ބަލާއިރު، ހަކަތަ ބޭނުންކުރާ މިންވަރު 2023 ގެ ނިޔަލަށް 45 އިންސައްތަ ކުޑަ ކުރަން ޖެހޭ ކަމަށެވެ. އަދި 2050 ގެ ނިޔަލަށް އެ އަދަދު ސުމަކަށް ތިރި ކުރަން ޖެހޭ ކަމަށް މޫސުމާ ގުޅޭ ހޯދުންތަކުން އެނގިފައިވާ ކަމަށެވެ.

މި ނިންމުމަށް މަޖިލީހުގައި ގަޑިއިރެއް ވަންދެން މަޝްވަރާ ކޮށްފައިވާއިރު، ގިނަ މެމްބަރުން ވަނީ މޫސުމީ ކުއްލި ޙާލަތު އިއުލާނު ކުރުމަށް ތާއީދު ކުރައްވާފައެވެ. އެހެންނަމަވެސް ސަރުކާރާ އިދިކޮޅު ޕާޓީގެ ބައެއް މެމްބަރުން ވަނީ މި ނިންމުމަށް ތާއީދު ނުކުރައްވާ ކަމަށް ވިދާޅުވެފައެވެ.

ނިއުޒިލޭންޑުގެ އިތުރުން، 32 ޤައުމަކުން މިހާތަނަށް ވަނީ މޫސުމީ ކުއްލި ޙާލަތު އިއުލާނު ކޮށްފައެވެ. އެގޮތުން މިހާތަނަށް ކުއްލި ޙާލަތު އިއުލާނު ކޮށްފައިވާ ޤައުމުތަކުގެ ތެރޭގައި ޖަޕާން، ކެނެޑާ، ފްރާންސް، ޔޫކޭ ހިމެނެއެވެ.