އެއްބަސްވުމުގެ މައްސަލައިގައި ސެޓިއެން ކޯޓަށް

އެއްބަސްވުމާ ޚިލާފަށް ބާސެލޯނާގެ ކޯޗުގެ މަގާމުން ވަކިކުރި ކަމަށް ބުނެ އެ ޓީމު ގޮވައިގެން ކޯޓަށް ދާން ކިކޭ ސެޓިއެން ނިންމާފައިވާ ކަމަށް ރިޕޯޓުތައް ބުނެފިއެވެ.

ބާސާގެ ކޯޗުގެ މަގާމާ ޖެނުއަރީ މަހު ހަވާލުވި ސެޓިއެން މަގާމުން ދުރުކުރިކަން އިއުލާން ކުރީ މިދިޔަ އޮގަސްޓް މަހުގެ 17 ވަނަ ދުވަހުއެވެ. އަދި ސެޓިއެންގެ ބަދަލުގައި ނެދަލެންޑްސް ގައުމީ ޓީމަށް އިރުޝާދު ދެމުން އައި ރޮނާލްޑް ކޫމަން އެ މަގާމަށް ހަމަޖެއްސިކަން ބާސާއިން އިއުލާން ކޮށްފައިވަނީ އޭގެ ދެ ދުވަސް ފަހުންނެވެ.

2022 ވަނަ އަހަރުގެ ނިޔަލަށް ސެޓިއެން ބާސާއާއެކު އެއްބަސްވުން ހެދި ނަމަވެސް، އަށް މަސް ފަހުން ބާސާއިން ވަނީ ސެޓިއެން މަގާމުން ވަކިކޮށްފައެވެ. އޭނާ މަގާމުން ވަކިކޮށްފައިވަނީ އެއްބަސްވުމުގައިވާ ކޮންމެ ސީޒަނެއް ނިމުމުން ވަކި ކަންތައްތަކެއް ފުރިހަމަ ނުވެއްޖެނަމަ ސެޓިއެން ވަކިކުރަން ބާސާއަށް އިހުތިޔާރު ލިބޭ މާއްދާއަށް ބެލުމަށްފަހު ކަމަށް ރިޕޯޓުތައް ބުނެއެވެ. އެކަމަކު މިދިޔަ ސީޒަނަކީ ސެޓިއެންއަށް އެއްކޮށް ފުރިހަމަ ސީޒަނެއްގެ ގޮތުގައި ނުގުނޭނެތީ އެ މާއްދާއަށް ބަލައި އޭނާ ވަކިނުކުރެވޭނެ ކަަމަށް ސެޓިއެން ވަނީ ބުނެފައެވެ.

މީގެ ކުރިން ސެޓިއެން ވަނީ އެއްބަސްވުން ކެންސަލް ކުރުމަށް ބަދަލެއްގެ ގޮތުގައި އަށް މިލިއަން ޔޫރޯ ހޯދުމަށް މަސައްކަތް ކޮށްފައެވެ. އެކަމަކު މައްސަލަ ކޮޅެއްގައި ނުޖެހުމާ ގުޅިހެން ވަކީލުން މެދުވެރިކޮށް ކޯޓަށް ދިޔުމަށް ސެޓިއެން މިހާރު ނިންމާފައިވާ ކަމަށް ރިޕޯޓުތައް ބުނެއެވެ.

އާނެސްޓޯ ވަލްވޭޑޭގެ ބަދަލުގައި ބާސާއިން އެ ޓީމުގެ ކޯޗެއްގެ ގޮތުގައި ގެނައި ސެޓިއެންއަށް އެ ޓީމުގައި އެންމެ އެދެވޭ މަސައްކަތްތަކެއް ކުރެވިފައެއް ނުވެއެވެ. އެގޮތުން ސެޓިއެން މަގާމުން ވަކިކުރީ މިދިޔަ ސީޒަނުގެ ޔުއެފާ ޗެމްޕިއަންސް ލީގުގައި ލަދުވެތި ގޮތަކަށް ބަޔާން މިއުނިކް އަތުން 8-2 ން ބާސާ ބަލިވެ މުބާރާތުން ކެޓުމާ ގުޅިގެންނެވެ. މިއީ ޔޫރަޕުގެ މުބާރާތެއްގައި މިހާ ތަފާތު ބޮޑުކޮށް ބާސާ ބަލިވި ފުރަތަމަ ފަހަރެވެ. އަދި މިއީ ފާއިތުވި 74 އަހަރު ތެރޭ އެއް މެޗެއްގައި ބާސާ ކޮޅަށް އަށް ލަނޑު ވަން ފުރަތަމަ ފަހަރެވެ.