މޯލްޑިވްސް ބާސްކެޓްބޯލް އެސޯސިއޭޝަން (އެމްބީއޭ) ގެ އިންތިޚާބު އަންނަ ޑިސެމްބަރު މަހުގެ 12 ވަނަ ދުވަހު ބޭއްވުމަށް ތާވަލުކޮށްފިއެވެ.
އެމްބީއޭއިން ނެރުނު ބަޔާނެއްގައި ބުނީ އެ އެސޯސިއޭޝަނުގެ ކުރިއަށް އޮތް ދައުރުގެ ހިންގާ ކޮމިޓީ އިންތިޚާބުކުރުމަށްޓަކައި އާންމު ޖަލްސާއެއް ޑިސެމްބަރު މަހުގެ 12 ވާ ހޮނިހިރު ދުވަހުގެ ހަވީރު 05:00 ގައި ސޮލައިޓް ރެސްޓޯރަންޓުގެ ނުވަވަނަ ފަންގިފިލާގެ އިންޑޯ ހޯލުގައި ބޭއްވުމަށް ހަމަޖެހިފައިވާ ކަމަށެވެ.
އެހެންކަމުން އިންތިޚާބުގައި ވޯޓުދިނުމުގެ ހައްގުލިބިފައިވާ ފުރިހަމަ މެންބަރު ކުލަބު/ޖަމުޢިއްޔާތައް ތަމްސީލުކުރާ މަންދޫބުން ރަޖިސްޓާ ކުރުމަށް ހުށަހަޅާ ޕްރޮކްސީ ފޯމާއި، އިންތިޚާބުގައި ހޮވާ މަގާމުތަކަށް ކުރިމަތިލުމަށް ހުށަހަޅާ ފޯމު ޑިސެމްބަރު މަހުގެ އެކަކުން ފެށިގެން 10 ވަނަ ދުވަހުގެ ނިޔަލަށް ބަންދުނޫން ކޮންމެ ދުވަހެއްގެ ހެނދުނު 9:00 ން 12:00 ށް އެ އެސޯސިއޭޝަނުން ލިބެން ހުންނާނެ ކަމަށްވެސް ވަނީ ބުނެފައެވެ.
އެމްބީއޭގެ އިންތިޚާބުގައި ވޯޓުލުމުގެ ހައްގު 23 ކުލަބަކަށް ލިބެއެވެ. މި އިންތިޚާބުގައި ވާދަނުކުރައްވަން އެ އެސޯސިއޭޝަނުގެ މިހާރުގެ ރައީސް އަޙްމަދު މަމްދޫހު ވަނީ ނިންމަވާފައެވެ. މީގެ ކުރިން ވަޓްސްއެޕްގައި ހިއްސާކުރެއްވި މެސެޖެއްގައި މަމްދޫހު ވިދާޅުވީ އޭނާގެ ދައުރުގައި ކަނޑައެޅި ގިނަ ކަންކަން ހާސިލްކުރެވިފައިވާ ކަމަށާއި، އެހެންކަމުން ހިންގާ ކޮމިޓީގައި މަސައްކަތްކުރެއްވި މެމްބަރުންނަށް ޝުކުރުއަދާކުރާ ކަމަށެވެ. އަދި އެއާއެކު ކުރިއަށް އޮތް އެމްބީއޭގެ އިންތިޚާބުގައި ވާދަނުކުރަން ނިންމާފައިވާ ކަމަށާއި، އޭގެ ބޭނުމަކީ ދެން އޮތް ޖީލަށްވެސް އެ ފުރުސަތު ދިނުން ކަމަށް ވިދާޅުވިއެވެ.
އެންމެ ފަހުން އެމްބީއޭގެ އިންތިޚާބު ބޭއްވީ 2016 ވަނަ އަހަރުއެވެ. އެ އަހަރުގެ އޮކްޓޯބަރު މަހުގެ 20 ވަނަ ދުވަހުގެރޭ ފުރަތަމަ ބޭއްވި އިންތިޚާބުގައި މަމްދޫހު ބަލިކުރައްވާ އެމްބީއޭގެ ރައީސްގެ މަގާމަށް އިންތިޚާބުވީ ކުރީގެ މަޖިލިސް މެންބަރު އަބްދުﷲ ސިނާނެވެ. އެކަމަކު ސިނާން ވަނީ އެމްބީއޭގެ ރައީސްގެ މަގާމަށް އިންތިޚާބުވެވަޑައިގެންނެވިތާ ކުޑަ އިރުކޮޅެއްގެ ތެރޭގައި އިސްތިއުފާ ދެއްވާފައެވެ.
އެއާއެކު އެ އަހަރުގެ ޑިސެމްބަރު މަހުގެ 17 ވަނަ ދުވަހު އިންތިޚާބު ދެވަނަ ފަހަރަށް ބޭއްވިއިރު، އެ އިންތިޚާބު މަމްދޫހު ކާމިޔާބުކުރެއްވީ ވިޝާމް ރަޝީދާ ވާދަކުރައްވާ އިންތިޚާބުގައި ވޯޓުލި 18 ކުލަބުގެ ތެރެއިން 17 ކުލަބުގެ ވޯޓާއެކުއެވެ.
އެމްބީއޭގެ ރައީސްގެ މަގާމަށް މަމްދޫހު އިންތިޚާބުވި ފަހުން ބާސްކެޓްބޯޅައިގައި ރާއްޖެ ގިނަ ކުރިއެރުންތަކެއް ހޯދާފައިވާއިރު، ރާއްޖޭގެ އަންހެން ބާސްކެޓްބޯޅަ ޓީމު ވަނީ މިދިޔަ އަހަރު ނޭޕާލުގައި ބޭއްވި ސައުތު އޭޝިއަން ގޭމްސްއިން ލޯ މެޑަލް ހޯދާފައެވެ. މިއީ ބާސްކެޓްބޯޅަ އަންހެން ޓީމަށް ބައިނަލްއަގުވާމީ މުބާރާތެއްގައި ލިބުނު ފުރަތަމަ މެޑެއްޔެވެ.
އަދި މަމްދޫހުގެ ދައުރުގައި ބާސްކެޓްބޯޅައިގެ ބައިނަލްއަގުވާމީ ގިނަ މުބާރާތްތަކެއް ވަނީ ރާއްޖޭގައި ބާއްވާފައެވެ. އޭގެ ތެރޭގައި 2017 ވަަނަ އަހަރު މާލޭގައި ބޭއްވި ދެކުނު އޭޝިއާގެ ބާސްކެޓްބޯޅަ މުބާރާތް (ސާބާ ޗެމްޕިއަންޝިޕް) އާއި، މިދިޔަ އަހަރު މާލޭގައި ބޭއްވި ފީބާ އޭޝިއަން ކްއެސްޓުވެސް ހިމެނެއެވެ.
