ކ. މާލެ
|
29 ނޮވެންބަރ 2020 | އާދީއްތަ 11:16
ބެނެވެންޓޯ އާއި ޔުވެންޓަސް ބައްދަލުކުރި މެޗުގެ ތެރެއިން: މި މެޗު އެއްވަރުވީ 1-1 ން
ބެނެވެންޓޯ އާއި ޔުވެންޓަސް ބައްދަލުކުރި މެޗުގެ ތެރެއިން: މި މެޗު އެއްވަރުވީ 1-1 ން
ގެޓީ އިމޭޖަސް
އިޓާލިއަން ލީގު
ޔުވެންޓަސް އެއްވަރުވިއިރު، އިންޓައަށް ފަސޭހަ މޮޅެއް
 
ސަސުއޯލޯ އަތުން އިންޓަ މޮޅުވީ 3-0 ގެ ނަތީޖާއަކުން
 
ބެނެވެންޓޯ އާއި ޔުވެންޓަސް ބައްދަލުކުރި މެޗު އެއްވަރުވީ 1-1 ގެ ނަތީޖާއަކުން

އިޓާލިއަން ލީގުގައި ހޮނިހިރު ދުވަހުގެރޭ އެންމެ ފަހުގެ ޗެމްޕިއަން ޔުވެންޓަސް އާއި ބެނެވެންޓޯ ބައްދަލުކުރި މެޗު އެއްވަރުވިއިރު، ސަސުއޮލޯ އަތުން އިންޓަ މިލާން ފަސޭހަކަމާއެކު މޮޅުވެއްޖެއެވެ.

ރަށުން ބޭރުގައި ކުޅުނު މެޗުން ޔުވެންޓަސް އެއްވަރުވީ 1-1 ގެ ނަތީޖާއަކުންނެވެ. މި މެޗުން ޔުވެންޓަސް އެއްވަރުވިއިރު، މިއީ މި ސީޒަނުގައި އެ ޓީމުގެ ކޯޗުގެ މަގާމާ ހަވާލުވި އަންދްރެއާ ޕިރްލޯގެ އިރުޝާދުގެ ދަށުން ކުޅެ ޔުވެންޓަސް އެއްވަރުވި ފަސްވަނަ މެޗެވެ.

މި މެޗުގައި ޔުވެންޓަސްގެ ތަރި ކްރިސްޓިއާނޯ ރޮނާލްޑޯ ކުޅެފައެއް ނުވެއެވެ. އެކަމަކު މެޗުގައި އެންމެ ފުރަތަމަ ލަނޑު ޖަހާ ލީޑު ނެގީ އެ ޓީމުންނެވެ. އެގޮތުން މެޗުގެ 21 ވަނަ މިނެޓުގައި ޔުވެންޓަސްއަށް ލީޑު ނަގައިދިނީ އަލްވާރޯ މޮރާޓާއެވެ. އެކަމަކު ފުރަތަމަ ހާފު ނިމުމުގެ ކުރިން ބެނެވެންޓޯއިން ވަނީ ނަތީޖާ އެއްވަރުކޮށްފައެވެ. ފުރަތަމަ ހާފުގެ އިތުރުވަގުތުގައި މި ލަނޑު އެ ތީމަށް ޖަހައިދިނީ ގައެޓާނޯ ލެޓިޒިއާއެވެ.

މި މެޗު ޔުވެންޓަސްއިން ނިންމާލީ އެއް ކުޅުންތެރިއަކު މަދުކޮށެވެ. އެއީ މެޗުގެ ފަހު ވަގުތު ޔުވެންޓަސްގެ މޮރާޓާއަށް ސީދާ ރަތް ކާޑެއް ދެއްކުމާ ގުޅިގެންނެވެ. މޮރާޓާއަށް ރެފުރީ ރަތް ކާޑު ދެއްކީ އޭނާ ބޭއަދަބީ އިބާރާތުން ވާހަކަ ދެއްކުމާ ގުޅިގެންނެވެ.

ސަސުއޯލޯ އާއި އިންޓަ ބައްދަލުކުރި މެޗުގެ ތެރެއިން: މި މެޗުން އިންޓަ މޮޅުވީ 3-0 ން

ލީގުގައި ހޮނިހިރު ދުވަހުގެރޭ ކުޅުނު މެޗުން ޔުވެންޓަސް އެއްވަރުވިއިރު، އިންޓަ މިލާން މޮޅުވީ ސަސުއޮލޯ އަތުން 3-0 ގެ ނަތީޖާއަކުންނެވެ.

ސަސުއޯލޯގެ ދަނޑުގައި ކުޅުނު މެޗުގެ ވަރަށް ކުރީކޮޅު އިންޓައިން ވަނީ ލީޑު ނަގާފައެވެ. މެޗު ފަށައިގެން ހަތަރުވަނަ މިނެޓުގައި މި ލަނޑު އިންޓައަށް ކާމިޔާބުކޮށްދިނީ އެލެކްސިސް ސަންޗޭޒެވެ. އަދި އޭގެ 10 މިނެޓު ފަހުން އިންޓައިން ވަނީ ލީޑު ފުޅާކޮށްފައެވެ. މި ލަނޑަކީ ސަސުއޯލޯގެ ވްލަޑް ކިރިކެސް އަތުން ބައިކޮޅަށް ވަން ލަނޑެކެވެ. އަދި މެޗުގައި އިންޓައިން ކާމިޔާބުކުރި ތިންވަނަ ލަނޑު 60 ވަނަ މިނެޓުގައި ޖަހައިދިނީ ރޮބާޓޯ ގަލިއާޑިނީއެވެ.

މި މޮޅާއެކު އިންޓަ ވަނީ ކުޅުނު ނުވަ މެޗުން 18 ޕޮއިންޓް ހަމަކޮށް ތާވަލުގެ ދެވަނައަށް ޖެހިލާފައެވެ. ސަސުއޮލޯއިން އެ އަދަދަށް ޕޮއިންޓް ހޯދި ނަމަވެސް، އެ ޓީމު އޮތީ ލަނޑުގެ ތަފާތުން ތިންވަނައިގައެވެ. އަދި ޔުވެންޓަސް އޮތީ ނުވަ މެޗުން 17 ޕޮއިންޓާއެކު ފަސްވަނައިގައެވެ. ބެނެވެންޓޯ އޮތީ ނުވަ މެޗުން 10 ޕޮއިންޓާއެކު ތާވަލުގެ 12 ވަނައިގައެވެ.

އެންމެ ފަހުން އަޕްޑޭޓް ކުރީ: 3 ހަފްތާ ކުރިން
ރިވިއު ކުރީ: ހުސައިން ފަރިޔާޒް
0%
0%
0%
0%
0%
0%
ކޮމެންޓް