ހޮނިހިރު 16 ޖެނުއަރީ 2021
11 އުތުރަހަޅަ
1442 ޖުމާދުލް އާހިރަތު 02
ފަތިސް 05:01
އިރުއަރާ 06:16
މެންދުރު 12:20
އަސްރު 15:40
އިރުއޮއްސޭ 18:15
އިޝާ 19:31
ސްޕެނިޝް ލީގު

އަލަވޭސް އަތުން ރެއާލް ބަލިވިއިރު، ހަޒާޑަށް އަނެއްކާވެސް އަނިޔާވެއްޖެ

  • އަމިއްލަ ދަނޑުގައި ރެއާލް ބަލިވީ އަލަވޭސް އަތުން 2-1 ގެ ނަތީޖާއަކުން
  • ހަޒާޑަށް މިފަހަރު ލިބުނު އަނިޔާ ސީރިއަސްއެއް ނޫން

ކ. މާލެ | 29 ނޮވެންބަރ 2020 | އާދީއްތަ 10:51 | 3,079

ރެއާލާއި އަލަވޭސް ބައްދަލުކުރި މެޗުގެ ތެރެއިން: މި މެޗުން އަލަވޭސް މޮޅުވީ 2-1 ން - ގެޓީ އިމޭޖާސް

ސްޕެނިޝް ލީގުގައި ހޮނިހިރު ދުވަހުގެރޭ ޑިޕޯޓިވޯ އަލަވެސް އަތުން އެންމެ ފަހުގެ ޗެމްޕިއަން ރެއާލް މެޑްރިޑް ބަލިވި މެޗުގައި އެ ޓީމުގެ މިޑްފީލްޑަރު އެޑެން ހަޒާޑަށް އަނެއްކާވެސް އަނިޔާވެއްޖެއެވެ.

އަމިއްލަ ދަނޑުގައި ކުޅުނު މެޗުން ރެއާލް ބަލިވީ 2-1 ގެ ނަތީޖާއަކުންނެވެ. މި މެޗުން ރެއާލް ބަލިވިއިރު، ލީގުގައި އެންމެ ފަހުން ކުޅުނު ތިން މެޗުންވެސް ރެއާލަށް މޮޅެއް ހޯދިފައެއް ނުވެއެވެ.

މި މެޗުގެ ފުރަތަމަ ހާފުގައި އަލަވޭސްއިން މޮޅު ކުޅުމެއް ދެއްކިއިރު، މެޗުގެ ވަރަށް ކުރީކޮޅު އެ ޓީމުން ވަނީ ލީޑު ނަގާފައެވެ. މެޗު ފަށައިގެން ފަސްވަނަ މިނެޓުގައި ލިބުނު ޕެނަލްޓީއަކުން މި ލަނޑު އެ ޓީމަށް ކާމިޔާބުކޮށްދިނީ ލޫކަސް ޕެރޭޒެވެ. މިއީ އޭރިއާ ތެރެއިން ރެއާލުގެ ނަޗޯ ފެނާންޑޭޒްގެ އަތުގައި ބޯޅަ ޖެހުމުން ރެފުރީ ދިން ޕެނަލްޓީއެކެވެ.

މެޗުގައި އަލަވޭސްއިން ލީޑު ފުޅާކޮށްފައިވަނީ ދެވަނަ ހާފު ފަށައިގެން ހަތަރުވަނަ މިނެޓުގައެވެ. މި ލަނޑު އެ ޓީމަށް ކާމިޔާބުކޮށްދިނީ ޖޮސެލޫއެވެ. މި މެޗުގައި ރެއާލުން ކާމިޔާބުކުރި ހަމައެކަނި ލަނޑު މެޗު ނިމެން ހަތަރު މިނެޓަށް ވެފައި ވަނިކޮށް ޖަހައިދިނީ ކަސެމީރޯއެވެ.

ރެއާލާއި އަލަވޭސް ބައްދަލުކުރި މެޗުގައި ހަޒާޑަށް އަނިޔާވެފައި ވަނިކޮށް

މި މެޗުގައި ހަޒާޑަށް އަނެއްކާވެސް އަނިޔާވިއިރު، އަނިޔާގައި ކުޅުމާ ދުރުގައި ހުރުމަށްފަހު ހަޒާޑް އެންމެ ފަހުން ކުޅުނުމުގެ ތެރެއަށް އައީ މިދިޔަ އޮކްޓޯބަރު މަހުގެ ފަހުކޮޅެވެ. އެކަމަކު މެޗަށްފަހު ރެއާލުގެ ކޯޗު ޒިނެދިން ޒިދާން ބުނީ ހަޒާޑަށް މިފަހަރު ލިބުނު އަނިޔާ ސީރިއަސް ނޫން ކަމަށް ބެލެވޭ ކަމަށެވެ.

ލީގުގައި ހޮނިހިރު ދުވަހުގެރޭ ކުޅުނު މެޗުން ރެއާލް ބަލިވިއިރު، އެ ޓީމު އޮތީ 17 ޕޮއިންޓާއެކު ތާވަލުގެ ހަތަރުވަނައިގައެވެ. އެއްވަނައިގައި އޮތީ 23 ޕޮއިންޓާއެކު ރެއާލް ސޮސިއެޑާޑެވެ. ދެވަނައިގައި 23 ޕޮއިންޓާއެކު ލަނޑުގެ ތަފާތުން އޮތީ ހޮނިހިރު ދުވަހުގެރޭ ވެލެންސިއާ އަތުން 1-0 ން މޮޅުވި އެތުލެޓިކޯ މެޑްރިޑެވެ. އަދި ބާސެލޯނާ އޮތީ 11 ޕޮއިންޓާއެކު ތާވަލުގެ 14 ވަނައިގައެވެ.

އެންމެ ފަހުން އަޕްޑޭޓް ކުރީ: 1 ހަފްތާ ކުރިން | ރިވިއު ކުރީ: ހުސައިން ފަރިޔާޒް

މި ލިޔުން ކިޔާލުމުން

ޚަބަރެއް ނުވަތަ މައުލޫމާތެއް ރާއްޖެއެމްވީ އަށް ދެއްވުމަށް [email protected] އަށް އީމެއިލް ކުރައްވާ ނުވަތަ 3007773 ނަންބަރަށް ގުޅުއްވާ.