ދިފާއީ ވަޒީރު މާރިޔާ ލަންކާގެ ބޮޑުވަޒީރާ ބައްދަލުކުރައްވައިފި
މިނިސްޓަރ މާރިޔާ ވަނީ ސްރީ ލަންކާގެ ސަރުކާރުގެ ފަރާތުން ރާއްޖެއަށް ވެދެއްވަމުން އަންނަ އެހީއަށް ޝުކުރުއަދާ ކުރައްވާފައި
ޑިފެންސް މިނިސްޓަރ މާރިޔާ އަހުމަދު ދީދީ، ލަންކާގެ ބޮޑު ވަޒީރު މަހިންދަ ރާޖަ ޕަކްސާ އާއިއެކު ބޭއްވުނު ބައްދަލުވުމުގެ ތެރެއިން
ޑިފެންސް މިނިސްޓަރ މާރިޔާ އަހުމަދު ދީދީ ސްރީ ލަންކާއަށް ކުރައްވަމުން ގެންދަވާ ދަތުރުފުޅުގައި އެ ގައުމުގެ ބޮޑުވަޒީރު މަހިންދަ ރާޖަޕަކްސައާ ބައްދަލުކުރައްވައިފިއެވެ.
ބޮޑުވަޒީރުގެ ރަސްމީ ގެކޮޅު ވިޖެރަމާ ރެސިޑެންސްގައި، ހުކުރު ދުވަހު އޮތް މި ބައްދަލުވުމުގައި މިނިސްޓަރ މާރިޔާ ވަނީ ސްރީ ލަންކާގެ ސަރުކާރުގެ ފަރާތުން ރާއްޖެއަށް ވެދެއްވަމުން އަންނަ އެހީއަށް ޝުކުރުއަދާ ކުރައްވާފައެވެ. އަދި ކުރިޔަށް އޮތް ތަނުގައި ލަންކާގެ ސަރުކާރާއި ގުޅިގެން ރާއްޖޭގެ ސިފައިން ތަމްރީނު ކުރުމުގެ ފުރުސަތު ލިބިގެންދާނެ ކަމަށް އުންމީދު ކުރައްވާކަމަށް އެކަމަނާ ވަނީ ވިދާޅުވެފައެވެ.
މިނިސްޓަރ މާރިޔާގެ މި ދަތުރުފުޅަކީ ސްރީ ލަންކާ، އިންޑިއާ އަދި ރާއްޖޭ ގުޅިގެން ބާއްވާ 4 ވަނަ ނެޝަނަލް ސެކިއުރިޓީ އެޑްވިސަރ، ބައްދަލުވުމުގައި ބައިވެރިވުމަށް ކުރެއްވަމުން އަންނަ ދަތުރުފުޅެކެވެ. މިނިސްޓަރ މާރިޔާ އަރިހު ރާއްޖޭއިން ލަންކާއަށް ކަނޑައަޅާފައި ހުންނަވާ ސަފީރު އުމަރު އަބްދުލް ރައްޒާގްގެވެސް މި ބައްދަލުވުމުގައި ބައިވެރިވެވަޑައިގަންނަވައެވެ.
