އެމްބީއޭގެ އިންތިޚާބުގައި ވާދަނުކުރަން މަމްދޫހު ނިންމަވައިފި

މޯލްޑިވްސް ބާސްކެޓްބޯލް އެސޯސިއޭޝަން (އެމްބީއޭ) ގެ ކުރިއަށް އޮތް އިންތިޚާބުގައި ވާދަނުކުރައްވަން އެ އެސޯސިއޭޝަނުގެ މިހާރުގެ ރައީސް އަޙްމަދު މަމްދޫހު ނިންމަވައިފިއެވެ.

އަންނަ ޑިސެމްބަރު މަހު މަމްދޫހުގެ ދައުރު ހަމަވާއިރު، ޑިސެމްބަރު މަހުގެ 12 ވަނަ ދުވަހު އެމްބީއޭގެ އަހަރީ އާންމު ޖަލްސާ ބޭއްވުމަށް މިހާރު ވަނީ ނިންމާފައެވެ.

ވަޓްސްއެޕްގައި ހިއްސާކުރެއްވި މެސެޖެއްގައި މަމްދޫހު ވިދާޅުވީ އޭނާގެ ދައުރުގައި ކަނޑައެޅި ގިނަ ކަންކަން ހާސިލްކުރެވިފައިވާ ކަމަށާއި، އެހެންކަމުން ހިންގާ ކޮމިޓީގައި މަސައްކަތްކުރެއްވި މެމްބަރުންނަށް ޝުކުރުއަދާކުރާ ކަމަށެވެ. އަދި އެއާއެކު ކުރިއަށް އޮތް އެމްބީއޭގެ އިންތިޚާބުގައި ވާދަނުކުރަން ނިންމާފައިވާ ކަމަށާއި، އޭގެ ބޭނުމަކީ ދެން އޮތް ޖީލަށްވެސް އެ ފުރުސަތު ދިނުން ކަމަށް ވިދާޅުވިއެވެ.

އެންމެ ފަހުން އެމްބީއޭގެ އިންތިޚާބު ބޭއްވީ 2016 ވަނަ އަހަރުއެވެ. އެ އަހަރުގެ އޮކްޓޯބަރު މަހުގެ 20 ވަނަ ދުވަހުގެރޭ ފުރަތަމަ ބޭއްވި އިންތިޚާބުގައި މަމްދޫހު ބަލިކުރައްވާ އެމްބީއޭގެ ރައީސްގެ މަގާމަށް އިންތިޚާބުވީ ކުރީގެ މަޖިލިސް މެންބަރު އަބްދުﷲ ސިނާނެވެ. އެކަމަކު ސިނާން ވަނީ އެމްބީއޭގެ ރައީސްގެ މަގާމަށް އިންތިޚާބުވެވަޑައިގެންނެވިތާ ކުޑަ އިރުކޮޅެއްގެ ތެރޭގައި އިސްތިއުފާ ދެއްވާފައެވެ.

އެއާއެކު އެ އަހަރުގެ ޑިސެމްބަރު މަހުގެ 17 ވަނަ ދުވަހު އިންތިޚާބު ދެވަނަ ފަހަރަށް ބޭއްވިއިރު، އެ އިންތިޚާބު މަމްދޫހު ކާމިޔާބުކުރެއްވީ ވިޝާމް ރަޝީދާ ވާދަކުރައްވާ އިންތިޚާބުގައި ވޯޓުލި 18 ކުލަބުގެ ތެރެއިން 17 ކުލަބުގެ ވޯޓާއެކުއެވެ.

އެމްބީއޭގެ ރައީސްގެ މަގާމަށް މަމްދޫހު އިންތިޚާބުވި ފަހުން ބާސްކެޓްބޯޅައިގައި ރާއްޖެ ގިނަ ކުރިއެރުންތަކެއް ހޯދާފައިވާއިރު، ރާއްޖޭގެ އަންހެން ބާސްކެޓްބޯޅަ ޓީމު ވަނީ މިދިޔަ އަހަރު ނޭޕާލުގައި ބޭއްވި ސައުތު އޭޝިއަން ގޭމްސްއިން ލޯ މެޑަލް ހޯދާފައެވެ. މިއީ ބާސްކެޓް އަންހެން ޓީމަށް ބައިނަލްއަގުވާމީ މުބާރާތެއްގައި ލިބުނު ފުރަތަމަ މެޑެއްޔެވެ.

އަދި މަމްދޫހުގެ ދައުރުގައި ބާސްކެޓްބޯޅައިގެ ބައިނަލްއަގުވާމީ ގިނަ މުބާރާތްތަކެއް ވަނީ ރާއްޖޭގައި ބާއްވާފައެވެ. އޭގެ ތެރޭގައި 2017 ވަަނަ އަހަރު މާލޭގައި ބޭއްވި ދެކުނު އޭޝިއާގެ ބާސްކެޓްބޯޅަ މުބާރާތް (ސާބާ ޗެމްޕިއަންޝިޕް) އާއި، މިދިޔަ އަހަރު މާލޭގައި ބޭއްވި ފީބާފީބާ އޭޝިއަން ކްއެސްޓުވެސް ހިމެނެއެވެ.