ސްޕެނިޝް ފުޓްބޯލް ފެޑެރޭޝަނުގެ ރައީސްގެ މަގާމަށް ކުރިމަތިލާފައިވާ، ސްޕެއިން ގައުމީ ޓީމުގެ ގޯލްކީޕަރު އިކާ ކަސިއަސް އޭނާގެ ނަން އަނބުރާ ގެންގޮސްފިއެވެ.

މިއަހަރުގެ ފެބްރުއަރީ މަހުގެ ތެރޭގައި ކަސިއަސް ވަނީ މިފަހަރުގެ އިންތިޚާބުގައި އެ އިދާރާގެ ރައީސްގެ މަގާމަށް ކުރިމަތިލާނެކަން އިއުލާން ކޮށްފައެވެ. އެކަމަކު ދާދި ފަހުން ކަސިއަސް ބުނީ ނަން އަނބުރާ ގެންނަން ނިންމީ، މިހާރު ކުރިމަތިވެފައިވާ ކޮރޯނާވައިރަސް (ކޮވިޑް-19) އާ ގުޅިގެން އެ ގައުމު މިވަގުތު އެއްބައިވަންތަކަމަށް ބޭނުންވެފައިވާތީ ކަމަށެވެ.

އެހެންވެ، އޮގަސްޓް މަހު އޮންނަ އިންތިޚާބުގައި މިހާރުގެ ރައީސް ލުއިސް ރުބިއާލެސް ވާދަކުރައްވާނީ ގިނިކަންޏާ އެވެ. އަދި އޭނާ އަލުން އިންތިޚާބުވުމުގެ ފުރުސަތު ވަނީ ބޮޑުވެފައެވެ. މީގެ ކުރިން ކަސިއަސް ވަނީ ލުއިސް ރުބިއާލެސް، އެ ފެޑެރޭޝަން މިހާރު ހިންގަމުން އަންނަގޮތާ މެދު ކަންބޮޑުވުން ފާޅުކޮށްފައެވެ.

ސްޕެނިޝް ފުޓްބޯލް ފެޑެރޭޝަނުގެ އިންތިޚާބުގައި ވާދަނުކުރަން އުމުރުން 39 އަހަރުގެ ކަސިއަސް ނިންމިއިރު، އޭނާ މިހާރު ކުޅެމުން އަންނަނީ ޕޯޗުގަލްގެ ޕޯޓޯއަށެވެ. މިދިޔަ އަހަރު މެއި މަހު ޕޯޓޯގެ ފަރިތަކުރުންތަކުގެ ތެރެއިން ކަސިއަސްއަށް ހާޓްއެޓޭކެއް ޖެހިގެން ހޮސްޕިޓަލުން ފަރުވާ ހޯދިއިރު، ދެ މަސް ފަހުން އަލުން ފަރިތަކުރުންތަކަށް ނުކުތް ނަމަވެސް، ފަހުން އޭނާ ކުޅުމުގައި އެއްކޮށް ބައިވެރިއެއް ނުވެއެވެ. އެކަމަކު ރަސްމީކޮށް އަދި ކުޅުން ހުއްޓާލިކަން ކަސިއަސް އިއުލާން ކޮށްފައެއް ނުވެއެވެ.

ރެއާލް މެޑްރިޑަށް ގިނަ އަހަރުތަކެއް ވަންދެން ކުޅުނު ކަސިއަސް އަކީ 2010 ވަނަ އަހަރު ސްޕެއިނުން ފުރަތަމަ ފަހަރަށް ވޯލްޑް ކަޕް ތަށި އުފުލާލިއިރު، އެޓީމުގެ ކެޕްޓަނެވެ. އަދި ކަސިއަސް ވަނީ ސްޕެއިންއާއެކު ދެފަހަރު ޔޫރޯ ފުޓްބޯޅަ މުބާރާތްވެސް ކާމިޔާބުކޮށްފައެވެ.