އެމްބީއޭގެ މުބާރާތްތަކުގައި ބައިވެރިވުމުގެ ފުރުސަތު ހުޅުވާލައިފި

މޯލްޑިވްސް ބާސްކެޓްބޯލް އެސޯސިއޭޝަނުން އިންތިޒާމުކޮށްގެން ބާއްވާ މުބާރާތްތަކުގައި ބައިވެރިވުމުގެ ފުރުސަތު އެ އެސޯސިއޭޝަނުން ހުޅުވާލައިފިއެވެ.

އެ އެސޯސިއޭޝަނުން ނެރެފައިވާ އިއުލާނެއްގައި އެ އެސޯސިއޭޝަނުން ވަނީ ޖުމްލަ ފަސް މުބާރާތެއްގައި ބައިވެރިވުމުގެ ފުރުސަތު ހުޅުވާލާފައެވެ. އެގޮތުން 10 އޮކްޓޯބަރުން ފެށިގެން 30 އޮކްޓޯބަރާ ހަމަޔަށް ކުރިޔަށް ގެންދިޔުމަށް ނިންމާފައިވާ ފުރަތަމަ ގައުމީ ބާސްކެޓްބޯލް ލީގުގެ ފިރިހެން ދެވަނަ ޑިވިޝަނާއި ގައުމީ ބާސްކެޓްބޯލް ލީގުގެ އަންހެން ޑިވިޝަނާއި ފިރިހެން ފަސްޓް ޑިވިޝަންގައި ބައިވެރިވުމުގެ ފުރުސަތު ވަނީ ހުޅުވާލާފައެވެ.

ފުރަތަމަ ޑިވިޝަންގެ ކުޅުން ކުރިޔަށް ގެންދިޔުމަށް ހަމަޖެހިފައިވަނީ ނޮވެމްބަރު އެކަކުން ފެށިގެން އެ މަހުގެ 11 ވަނަ ދުވަހާ ހަމަޔަށެވެ. ދެވަނަ ޑިވިޝަނަށް ޓީމް ލިސްޓް ހުށަހެޅުމުގެ އެންމެ ފަހު ވަގުތަކީ އޮކްޓޯބަރު މަހުގެ ފުރަތަމަ ދުވަހެވެ. އަދި ފުރަތަމަ ޑިވިޝަންގައި ބައިވެރިވުމަށް ޓީމް ލިސްޓް ހުށަހެޅުމުގެ އެންމެ ފަހު ވަގުތަކީ އޮކްޓޯބަރު މަހުގެ 19 ވަނަ ދުވަހެވެ.

ގައުމީ ބާސްކެޓްބޯލް މުބާރާތުގެ ކުޅުން ފަށަން ހަމަޖެހިފައިވަނީ ނޮވެމްބަރު މަހުގެ 13 ވަނަ ދުވަހުއެވެ. މި މުބާރާތަށް ކޮލިފައި ވާނީ ބާސްކެޓްބޯލް ލީގުގެ ގަދަ ހަތަރު ޓީމު ކަމަށް މޯލްޑިވްސް ބާސްކެޓްބޯލް އެސޯސިއޭޝަނުން ހާމަކުރެއެވެ. މި ހުރިހާ މުބާރާތެއްގައި ވެސް ބިދޭސީ ކުޅުންތެރިން ހިމެނުމުގެ އެންމެ ފަހު ވަގުތަކީ އޮކްޓޯބަރު މަހުގެ 25 ވަނަ ދުވަހުއެވެ.