އދ އިން ފަލަސްތީނުގެ ރެފިއުޖީންނަށް ދޭ ފަންޑު ފުރަތަމަ ފަހަރަށް ހުސްވެއްޖެކަމަށް ބޭރުގެ މީޑިއާތަކުން ރިޕޯޓް ކޮށްފިއެވެ.
އަލްޖަޒީރާގައި ރިޕޯޓް ކޮށްފައިވާ ގޮތުން އދ އިން ފަލަސްތީނުގެ ރެފިއުޖީންނަށް ކަނޑައަޅާފައިވާ ފަންޑުގައި ހުރި ފައިސާ އަހަރު ނިމެންވާއިރަށް ހުސްވާނެ ކަމަށް ވަނީ އަންދާޒާ ކުރެވިފައެވެ. އަދި މިއީ އދ އިން ފަލަސްތީނުގެ ރެފިއުޖީންނަށް ދޭ ފަންޑު މިގޮތަށް ހުސްވެގެންދާ ފުރަތަމަ ފަހަރު ކަމަށް އަލްޖަޒީރާގައި ރިޕޯޓް ކޮށްފައިވެއެވެ.
އަލްޖަޒީރާގައި ރިޕޯޓް ކޮށްފައިވާގޮތުން އދ ގެ "ރިލީޕް އެންޑް ވާރކްސް އޭޖެންސީ ފޯރ ޕަލެސްޓައިން ރެފިއުޖީސް އިން ދި ނިއަރ އީސްޓް" (ޔޫއެންއާރްޑަބްލިއުއޭ) ގެ ފަންޑުތައް ބަރޯސާވެފައި އޮންނަނީ އދ ގެ މެމްބަރު ޤައުމުތަކުންނާއި ޔޫރަޕިއަން ޔޫނިއަނުން ދޭ އެހީގެ މައްޗަށެޗެ. އެހެން ނަމަވެސް ފާއިތުވި 4 އަހަރު ތެރޭގައި މި ފަންޑަށް ލިބޭ ފައިސާ އެތައް ގުނައަކަށް ދަށްވެފައިވާއިރު، ކޮވިޑުގެ މި ޙާލަތުގައި ފުރަތަމަ ފަހަރަށް ފަންޑު މުޅިން ހުސްވާނެ ކަމަށް މިވަނީ ބެލެވިފައެވެ.
ބުރާސްފަތި ދުވަހު ގާޒާގައި އޮތް ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން ޔޫއެންއާރްޑަބްލިއުއޭ ގެ ކޮމިޝަނަރ ޖެނެރަލް ފިލިޕް ލަޒާރްނީ ވިދާޅުވީ، އެ އޭޖެންސީ މިވަގުތު ވަރަށް ބޮޑަށް އަޑިއަޅާލާފައިވާ ކަމަށާއި، އެހެން ނަމަވެސް މި ޙާލަތުން އަރައިގަނެވިދާނެ ކަމަށެވެ. އަދި އެކަމަށްޓަކައި ބައިނަލްއަޤުވާމީ ދުނިޔޭގެ އެހީތެރިކަން ނުހަނު ބޭނުންވާކަން ލަޒާރްނީގެ ވާހަކައިގައި ފާހަގަ ކުރެއްވިއެވެ.
މި މަހުގެ ކުރީކޮޅު އެ އޭޖެންސީން ވަނީ މި ހިނގާ ނޮވެމްބަރު މަހުގެ ނިޔަލަށް މަދުވެގެން 70 މިލިއަން އެމެރިކާ ޑޮލަރުގެ އެހީ ބޭނުންވާކަން ފާހަގަ ކޮށްފައެވެ. އެހެން ނޫން ނަމަ، އަހަރު ނިމެންވާއިރު އެންމެ ކުޑަމިނުން އެޖެންސީގައި މަސައްކަތް ކުރާ އެތައް ހާސް މުވައްޒަފުންނަށް މުސާރަވެސް ނުދެވޭނެކަން ފާހަގަ ކޮށްފައިވެއެވެ. އެއާއެކު ޔޫއެންއާރްޑަބްލިއުއޭގެ 28000 މުވައްޒަފުންނަށްވެސް މިހާރު ވަނީ މުސާރައަށް ބަދަލުތަކެއް އަންނާނެކަން ކުރީބައިގައި އަންގާފައެވެ.
