ސައުދީގެ ހުރިހާ ރައްޔިތުންނަށް ހިލޭ ވެކްސިން ލިބޭނެ

ކޮވިޑް-19ގެ ވެކްސިން ސައުދީ އަރަބިޔާގެ ރައްޔިތުންނަށް އެއްވެސް އަގެއް ނުނަގައި ހިލޭ ލިބޭނެ ކަމަށް ސައުދީ ސަރުކާރުން ބުނެފިއެވެ.

އަލް އިޙްބަ ރިޔާ ޓީވީއަށް ދެއްވި އިންޓަރވިއުއެއްގައި ސައުދީގެ ޑެޕިއުޓީ މިނިސްޓަރު އޮފް ހެލްތް ފޯ ޕްރެވެންޓިވް އެފެއަރޒް ޑރ. އަބްދުﷲ އަލް އަސިރީ ވިދާޅުވީ، ސައުދީން ވެކްސިން ހޯދާނީ ސިއްހީ ކަންތައްތަކުގައި ކަމަށްވާތީވެ ވިއްކާ ތަކެތީގެ ލިސްޓުގައި ވެކްސިން ނުހިމެނޭނެ ކަމަށެވެ. އަދި އަންނަ އަހަރު ތެރޭގައި އާބާދީގެ 70 އިންސައްތަ މީހުންނަށް ވެކްސިން ދެވޭނެ ކަމުގެ އުއްމީދު ކުރައްވާ ކަމަށް ޑެޕިއުޓީ މިނިސްޓަރު ވިދާޅުވިއެވެ. އޭނާ ވިދާޅުވީ، އެންމެ ރައްކާތެރި ވެކްސިން ލިބޭ ލިސްޓުގެ ކުރީގައި ސައުދީ ހިމެނޭނެ ކަމަށެވެ.

ވެކްސިން އެއް ހޯދުމުގެ ކަންތައްތަކާއި ގުޅޭ ގޮތުން ދުނިޔޭގެ ސިއްހަތު ޖަމިއްޔާގެ (ޑަބްލިޔުއެޗްއޯ) ގެ ޑިރެކްޓަރ ޖެނެރަލް ޓެޑްރޯސް އަދަނޮމް ގެބްރިޔޭސަ ވިދާޅުވެފައިވަނީ ތާރީހުގައި މިހާ އަވަހަށް އުފެއްދި ވެކްސިނެއް ނެތް ކަމަށާއި، ވެކްސިން އުފެއްދުމުގެ މަރުހަލާގައި ސައިންސް ވެރިން އާ ހަރުފަތަކަށް ކުރިއަށް ޖެހިލާފައިވާ ކަމަށެވެ. އަދި ވެކްސިން ފޯރުކޮށްދިނުމުގައި ވެސް އެ އުސޫލު ގެންގުޅެން ޖެހޭ ކަމަށާއި، ވެކްސިން ހަމަހަމަކަމާއެކު ފޯރުކޮށްދެވެން ޖެހޭ ކަމަށެވެ.

ވެކްސިން ރޭހުގެ އެންމެ ކުރީގައި އުޅެނީ އެމެރިކާގެ ފައިޒަރ ވެކްސިނާއި، ޖަރުމަނުވިލާތުގެ ބައޯއެންޓެކް ވެކްސިނެވެ. މީގެ ތެރެއިން ފައިޒަރ ވެކްސިންގެ 95 އިންސައްތަ ރައްކާތެރިކަން ކަށަވަރު ކުރެވިފައިވާ އިރު، ބައޯއެންޓެކް ވެކްސިންގެ 90 އިންސައްތަ ރައްކާތެރިކަން ވަނީ ކަށަވަރު ކުރެވިފައެވެ. ބައެއް އެހެން ވެކްސިންތަކަށް ބަލާ އިރު އެސްޓްރަޒެނިކާ އަދި މޮޑަރނާ ވެސް އުޅެނީ މި ރޭހުގެ ކުރީގައެވެ.