އަލި އެކްސްޕްރެސް ހިމެނޭ ގޮތަށް ޗައިނާގެ 43 އެޕެއް ބޭނުންކުރުން އިންޑިއާ ގައި މަނާ ކޮށްފިއެވެ.

އިންޑިއާގެ މިނިސްޓްރީ އޮފް އިލެކްޓްރޯނިކްސް އެންޑް އައިޓީން ނެރެފައިވާ ބަޔާނެއްގައި ބުނީ، އެ ގައުމުގެ ސައިބަރ ކޯޑިނޭޝަން ސެންޓަރުން ލިބިފައިވާ މައުލޫމާތުތަކާއި ގުޅިގެން އެޕްތައް އިންޑިއާގައި ބޭނުންކުރުން މަނާކޮށް ބްލޮކް ކޮށްފައިވާ ކަމަށެވެ.

އެޕްތަކަކީ ކޮން ގައުމުތަކެއް އެޕްތަކެއްކަން ހާމަކޮށްފައި ނުވިޔަސް ލިސްޓުގައި ހިމެނޭ ހުރިހާ އެޕްތަކަކީ ޗައިނާގެ އެޕްތަކެެވެ.

މި ފަހަރު 43 އެޕް ބޭނުންކުރުން މަނާކޮށްފައިވާއިރު، މިއީ ޗައިނާގެ އެޕްތައް ބޭނުންކުރުން މަނާކުރި ތިން ވަނަ ފަހަރެވެ.

މީގެ ކުރިން ޖޫން މަހުގެ 29 ވަނަ ދުވަހު 59 އެޕެއް އަދި ސެޕްޓެމްބަރު މަހު 118 އެޕެއް ބޭނުންކުރުން ވަނީ މަނާކޮށްފައެވެ. އެ އެޕްތައް މަނާކުރީ ގައުމީ ސަލާމަތަށް ނުރައްކާތެރި ކަމަށް ބުނަމުންނެވެ.

ކުރިން ބްލޮކް ކުރި އެޕްތަކުގެ ތެރޭގައި ޓިކްޓޮކް، ބިގޯ ލައިވްގެ އިތުރުން މަޝްހޫރި ''ޕަބްޖީ'' ގޭމް ހިމެނެއެވެ. އެންމެ ފަހުން ބޭނުންކުރުން މަނާކުރި އެޕްތަކުގެ ތެރޭގައި ޗައިނާގެ މަޝްހޫރު އަލީ ބާބާގެ ކުންފުނީގެ އެޕްތަކުގެ ތެރޭގައި ހިމެނޭ ''އަލި އެކްސްޕްރެސް''ގެ އިތުރުން އަލި ޕޭ ކޭޝިޔަރް ހިމެނެއެވެ. ޗައިނާގެ 220 އެޕެއް ވަނީ އިންޑިއާ ގައި ބޭނުންކުރުން މަނާކޮށްފައެވެ.

ޗައިނާގެ އެޕްތައް އިންޑިއާ ގައި މަނާކުރަން ފެށީ، ހިމާލިޔާ ބޯޑަރު ދެމެދުގައި އިންޑިއާގެ ސިފައިންނާ ޗައިނާގެ ސިފައިންނާ ދެމެދު ކުރިމަތިލުން ހިނގައި އިންޑިއާގެ 20 ސިފައިން މަރުވުމާއި ގުޅިގެންނެވެ. އެއަށް ފަހު ދެ ގައުމު ދޭތެރޭގައި ނުތަނަވަސްކަން ވަނީ އިތުރުވެފައެވެ.