ޕާކިސްތާނުގެ ޔުނިވާސީޓީތަކުން ދީނީ ހަރުކަށި ފިކުރުތަކަށް ހިތްވަރުދީ ހަރުކަށި ފިކުރުގެ ހުޅު ރޯކުރަން މަސައްކަތްކަތްކުރާ ކަމަށް އަފްޣާނިސްތާނުން ތުހުމަތުކޮށްފިއެވެ.

ދީނީ ހަރުކަށި ފިކުރު ފަތުރަން މަސައްކަތްކުރާ ތަންތަނުގެ ތެރޭގައި، ޕެޝާވަރުގެ އިރުއިތުރުން 60 ކިލޯމީޓަރު އަކޯރާ ކަޓްކް އަވަށުގައި ހުންނަ ކިޔަވައިދޭ މަރުކަޒެއް ކަމަށްވާ ދާރުލް އުލޫމް ހައްގާނިއާ ހިމެނޭ ކަމަށް އަފްޣާނިސްތާނުގެ ނޫސްތަކުން ވަނީ ރިޕޯޓްކޮށްފައެވެ. އެ މަރުކަޒަށް އަފްގާނު މީޑިއާތަކުމް ނަން ދީފައިވަނީ ''ޔުނިވާސިޓީ އޮފް ޖިހާދް'' ގެ ނަމުންނެވެ.

އެތަނަކީ އާއްމުންގެ މެދުގައި މާބޮޑު މަގުބޫލު ކަމެއް ލިބިފައިވާ ތަނަކަށް ނުވިޔަސް އެ ޔުނިވާސިޓީ އަކީ ޕާކިސްތާނުގެ ސަރުކާރުގެ ތާއީދާ އެކު ހިންގާ ތަނެއް ކަމަށާއި، ހަރުކަށި ފިކުރުގެ މީހުންނާއި، ޕާކިސްތާނުގެ ސިޔާސީ ފަރާތްތަކާއި ގާތް ގުޅުމެއް އޮންނަ ތަނެއް ކަމަށް ތުހުމަތުތަކެއް ވަނީ ކުރެވިފައެވެ. އަދި ހަށިގޮއްވާ ލައިގެން ޕާކިސްތާނުގެ ކުރީގެ ބޮޑުވަޒީރު ބޭނަޒީރު ބުއްޓޫ އަަވަހަރާކޮށްލި މީހުންނަކީވެސް އެ ޔުނިވާރސިޓީއާ ގުޅުންހުރި މީހުން ކަމަށް އަފްޣާނިސްތާނުގެ ނޫސްތަކުން ވަނީ ރިޕޯޓްކޮށްފައެވެ.

އެކަމަކު އެ ޔުނިވާސިޓީ އަކީ ''ޓެރަރިސްޓުންގެ އައްޑާއެއް'' ކަމަށް ބުނާ ވާހަކަ ހައްގާނީއާގެ ލީޑަރު ވަނީ ދޮގުކޮށްފައެވެ.

އަވަށްޓެރި ގައުމުތަކުގައި ޓެރަރިޒަމްގެ އަމަލުތައް ހިންގަން ޕާކިސްތާނުން ހިތްވަރުދޭ ކަމުގެ އިނގިލިތައް ވަނީ އެ ގައުމަށް އަމާޒުވެފައިވާއިރު، ދާދި ފަހުން ޕާކިސްތާނުގެ ބޮޑުވަޒީރު އިމްރާން ހާން އަފްޣާނިސްތާނަށް ކުރައްވަން އޮތް ދަތުރުފުޅާއި ދިމާކޮށް އެ މަނިކުފާނަކީ ޓެރަރިޒަމްގެ އަަމަލުތަކަށް ހިތްވަރުދީ ހަރުކަށި ފިކުރު ފަތުރަން މަސައްކަތްކުރައްވާ ބޭފުޅެއް ކަމަށް ބުނެ އަފްޢާނިސްތާނުގެ މަގުމަތީގައި ރައްޔިތުން ވަނީ އަޑުއުފުލާފައެވެ.