ކުދި އަދި މެދުފަންތީގެ ވިޔަފާރިތަކަށް 325 މިލިއަން ރުފިޔާ ދޫކޮށްފި

ކޮވިޑް-19 ގެ ސަބަބުން ރާއްޖޭގެ ވިޔަފާރިތަކަށާއި، އަމިއްލަ މަސައްކަތް ކުރާ ފަރާތްތަކަށް ދިމާވި މާލީ ގޮންޖެހުންތަކުން އަރައި ގަތުމަށް ސަރުކާރުން ދޫކުރާ ރިކަވަރީ ލޯންގެ ގޮތުގައި 325 މިލިއަން ރުފިޔާ ދޫކޮށްފިއެވެ.

ފިނޭންސް މިނިސްޓްރީ އާންމުކޮށްފައިވާ ތަފާސްހިސާބުތައް ދައްކާގޮތުން ނޮވެމްބަރ 19 ވަނަ ދުވަހުގެ ނިޔަލަށް އެސްއެމްއީ ޑިވެލޮޕްމެންޓް ފައިނޭސް ކޯޕަރޭޝަން (އެސްޑީއެފްސީ) އިން ވަނީ 1,946 ފަރާތަކަށް 325 މިލިއަން ރުފިޔާގެ ލޯން ދޫކޮށްފައެވެ.

އެގޮތުން މިހާތަނަށް 1,337 ކުދި އަދި މެދުފަންތީގެ ވިޔަފާރިއަށް 306.8 މިލިއަން ރުފިޔާގެ ލޯން ދޫކޮށްފައިވާއިރު، އަމިއްލަ މަސައްކަތް ކުރާ 609 ފަރާތަކަށް 18.2 މިލިއަން ރުފިޔާ ވަނީ ދޫކޮށްފައެވެ.

ލޯނަށް އެދި 3,964 ފަރާތަކުން ހުށައަޅާފައިވާއިރު، އޭގެ ތެރޭގައި ހިމެނެނީ އަމިއްލަ މަސައްކަތްކުރާ 2,000 ފަރާތަކާއި 1,964 ވިޔަފާރި ކަމަށް ފިނޭންސް އިން ބުނެއެވެ. އެގޮތުން މި ފޯމްތަކުގެ ތެރެއިން 2,128 ފޯމެއް ބަލައިގަނެފައިވާ އިރު، 657 ފޯމު ވަނީ ރިޖެކްޓްކޮށްފައެވެ.

ކޮވިޑް-19 އާއި ގުޅިގެން މިހާރު ހިނގަމުންދާ ވިޔަފާރިތަކަށް ހިންގުމުގެ ހަރަދާއި އެހެނިހެން މާލީ އެހީ ފޯރުކޮށްދިނުމުގެ ގޮތުން އެސްޑީއެފްސީ އިން ތައާރަފުކުރި މި ލޯނަކީ ވިޔަފާރީގެ ވޭތުވެދިޔަ އަހަރުގެ އާމްދަނީ 10 މިލިއަން ރުފިޔާއަށް ވުރެ ދަށްވުމާއި ކޮވިޑް-19 އާ ގުޅިގެން އަދި ލޯނު އެހީދޭ މުއްދަތުގެ ތެރޭގައި ވެސް އެ ވިޔަފާރީގެ އެއްވެސް ދިވެހި މުވައްޒަފެއް ވަކިނުކުރާ ފަރާތްތަކަށް ދޫކުރާ ލޯނެކެވެ. މި ލޯނު ދޫކުރަނީ ހަ އިންސައްތައިގެ އިންޓެރެސްޓްއަކާއިއެކު ތިން އަހަރުގެ ތެރޭގައި ދައްކާ ގޮތަށެވެ.