ލޮނުޒިޔާރަތް ޕާކަށް 12000 އަށްވުރެ ގިނަ މީހުން ޒިޔާރަތްކޮށްފި
ޕާކު ހުޅުވީ 12 ނޮވެމްބަރު ގައި
ލޮނުޒިޔާރަތް ޕާކް
ލޮނުޒިޔާރަތް ޕާކަށް މިހާތަނަށް 12000 އަށް ވުރެ ގިނަ މީހުން ޒިޔާރަތްކޮށްފި އެވެ.
މާލޭ ސިޓީ ކައުންސިލުން ބުނީ މިހިނގާ ނޮވެމްބަރު މަހުގެ 12 ގައި ލޮނުޒިޔާރަތް ޕާކް ހުޅުވިފަހުން މިހާތަނަށް 12773 މީހުން ޕާކަށް ވަދެފައިވާ ކަމަށެވެ.
ސިޓީ ކައުންސިލުން ވަނީ ޕާކް ހުޅުވާނެ ގަޑިތަކުގެ އިތުރުން ޕާކަށް ވަދެ ނިކުމެ އުޅުމުގައި އަމަލުކުރަން ޖެހޭ އުސޫލެއް އެކުލަވާލައި އާއްމުކޮށްފަ އެވެ.
ޕާކް ހުޅުވާފައި ހުންނާނީ ފަތިހު 4:30 އިން ހެނދުނު 9:30 އަށް އަދި ހަވީރު 4:30 އިން ރޭގަނޑު 9:30 އަށެވެ. ޕާކް ތެރޭގައި އުޅޭ ހުރިހާ ވަގުތެއްގައި ވެސް، ނޭފަތާއި އަނގަ ނިވާވާ ގޮތަށް މާސްކް އަޅައިގެން ތިބެން ސިޓީ ކައުންސިލުން ވަނީ އިލްތިމާސްކޮށްފަ އެވެ.
ޕާކަށް ޒިޔާރަތްކުރާ ފަރާތްތަކުން ޕާކް ތެރޭގައި އުޅޭއިރު، އެކަކު އަނެކަކާ ދެމެދު 3 ފޫޓު ދުރުމިން ބެހެއްޓުމަށާއި، ކޮވިޑް-19 ގެ އެއްވެސް އަލާމާތެއް ހުރި މީހެއްނަމަ ޕާކަށް ޒިޔާރާތް ނުކުރުމަށް ކައުންސިލުގެ އުސޫލުގައި ވަނީ ބުނެފަ އެވެ.
ޕާކް ތެރެއަށް އެއްވެސް ބާވަތެއްގެ ކާބޯތަކެތި ވައްދައި ކައިބޮއި ހެދުމަކީ މަނާކަމެކެވެ. އަދި އެ ޕާކް ތެރޭގައި އެއްފަހަރު ބޭނުންކޮށްފައި އުކާލާ ޒާތުގެ ޕްލާސްޓިކް ބޭނުން ކުރުން މަނާކޮށްފައިވާއިރު ޕާކު ތެރޭގައި ދުންފަތުގެ އިސްތިއުމާލު ކުރުމަކީވެސް މަނާ ކަމެކެވެ.
ޕާކަށް ވަނުމުގެ ކުރިން އަދި ޕާކުން ނުކުތުމުގެ ކުރިން އަތްދަބަސް ޗެކް ކުރެވޭނެ ކަމަށް ސިޓީ ކައުންސިލުން ވަނީ ބުނެފައެވެ. އަދި ތޫނު ތަކެތި ނުވަތަ އެއްވެސް ބާވަތެއްގެ ހަތިޔާރެއް ޕާކު ތެރެއަށް ވެއްދުމަކީ މަނާކަމެކެވެ.
ލޮނުޒިޔާރަތް ޕާކަކީ ރައީސް ސޯލިހުގެ ރިޔާސީ ވައުދުފުޅުގެ ތެރެއިން ވައުދެކެވެ. "ލޮނުޒިޔާރަތް ޕާކް" އަކީ ގިނަ އަދަދެއްގެ ގަސްތައް އިންދައިގެން ތަރައްގީ ކޮށްފައިވާ ރާއްޖޭގައި މިވަގުތު ހުރި އެންމެ ބޮޑު ބަގީޗާ އެވެ.
ލޮނު ޒިޔާރަތްކޮޅުގައި ޕާކެއް ގާއިމު ކުރުމުގެ މަސައްކަތް ފެށީ، މާލެ-ހުޅުމާލެ ބްރިޖްގެ މަސައްކަތް ނިމި، ހުޅުވި ފަހުންނެވެ. ބްރިޖްގެ މަސައްކަތް ކުރިއަށް ދިއައިރު، އެތަނަކީ، ކޮންޓްސްޓްރަކްޝަން ސައިޓެކެވެ. އެތަން ޕާކެއްގެ ގޮތަށް ތަރައްގީ ކުރުމުގެ މަސައްކަތް ފެށީ މިދިއަ އަހަރުން ފެށިގެންނެވެ.
