ބުދަ 02 ޑިސެންބަރު 2020
06 ދޮށަ
1442 ރަބީޢުލްއާޚިރު 16
ފަތިސް 04:40
އިރުއަރާ 05:56
މެންދުރު 11:59
އަސްރު 15:20
އިރުއޮއްސޭ 17:54
އިޝާ 19:11
ގާޑިއޯލާ ސިޓީގައި މަޑުކުރުން

ސިޓީގެ އެއްބަސްވުން ގާޑިއޯލާ އާކޮށްފި

  • ގާޑިއޯލާ ވަނީ ސިޓީއާއެކު ހަދާފައި އޮތް އެއްބަސްވުން އިތުރު ދެ އަހަރަށް އާކޮށްފައި
  • ސިޓީގެ ކޯޗުގެ މަގާމުގައި 2023 ވަނަ އަހަރުގެ ހޫނު މޫސުމުގެ ނިޔަލަށް ގާޑިއޯލާ ހުންނާނެ

ކ. މާލެ | 19 ނޮވެންބަރ 2020 | ބުރާސްފަތި 18:56 | 3,398

މެންޗެސްޓާ ސިޓީގެ ކޯޗު ޕެޕް ގާޑިއޯލާ - ގެޓީ އިމޭޖާސް

މެންޗެސްޓާ ސިޓީގެ އެއްބަސްވުން އެ ޓީމުގެ ކޯޗު ޕެޕް ގާޑިއޯލާ އާކޮށްފިއެވެ.

އުމުރުން 49 އަހަރުގެ ގާޑިއޯލާ މީގެ ކުރިން ސިޓީއާއެކު ހަދާފައި އޮތް އެއްބަސްވުން ހަމަވަން އޮތީ އަންނަ އަހަރުގެ ހޫނު މޫސުމަށެވެ. އެހެންކަމުން ގާޑިއޯލާ ވަނީ ސިޓީއާއެކު ހަދާފައި އޮތް އެއްބަސްވުން އިތުރު ދެ އަހަރަށް އާކޮށްފައެވެ. އެހެންކަމުން ސިޓީގެ ކޯޗުގެ މަގާމުގައި 2023 ވަނަ އަހަރުގެ ހޫނު މޫސުމުގެ ނިޔަލަށް ގާޑިއޯލާ ހުންނާނެއެވެ.

އެއްބަސްވުން އާކުރުމަށްފަހު ގާޑިއޯލާ ބުނީ މިހާތަނަށް ސިޓީއާއެކު ބޭނުންވި ގިނަ ކާމިޔާބީތަކެއް ހާސިލުކުރެވިފައިވާ ކަމަށާއި، ކުރިއަށް އޮތް ތަނުގައިވެސް އެކަން ތަކުރާރު ކުރުމަށް ތައްޔާރަށް ހުރި ކަމަށެވެ. އަދި މިހާތަނަށް ސިޓީގެ މެނޭޖުމަންޓުގެ ފަރާތުން އޭނާއަށް ވަރަށް ބޮޑު އެއްބާރުލުމެއް ލިބިފައިވާ ކަމަށާއި، އެއީ ކޯޗުގެ މަގާމުގައި ދެމިހުރުމަށް ލިބޭ އެންމެ ބޮޑު ހިތްވަރު ކަމަށެވެ.

ގާޑިއޯލާ ސިޓީގެ އެއްބަސްވުން އާކުރިއިރު، ކުރީގެ ކުލަބު ބާސެލޯނާގެ ރައީސްގެ މަގާމުން ޖޯސެފް މާރިއާ ބާޓޮމެއޫ އިސްތިއުފާ ދެއްވުމުން ބާސާގެ ކޯޗުގެ މަގާމާ ގާޑިއޯލާ އަލުން ހަވާލުވާނެ ކަމަށް މީޑިއާތަކުން ރިޕޯޓުކުރިއެވެ. އެކަމަކު ވާހަކަތަކައް ރައްދު ދެމުން ގާޑިއޯލާ މީގެ ކުރިން ބުނީ އޭނާ ބާސާގެ ކޯޗަކަށް ހުރި ވަގުތު މިހާރު ނިމިފައިވާ ކަމަށާއި، ދެން ބާސާއާ ހަވާލުނުވާނެ ކަމަށެވެ.

މީގެ ކުރިން ބާސާ އާއި ބަޔާން މިއުނިކަށްވެސް އިރުޝާދު ދިން ގާޑިއޯލާ ސިޓީއާ ހަވާލުވީ 2016 ވަނަ އަހަރުއެވެ. ގާޑިއޯލާ ވަނީ ސިޓީއާއެކު މިހާތަނަށް އަށް ތަށި ކާމިޔާބުކޮށްފައެވެ. އޭނާއަށް ސިޓީ އާއެކު ކާމިޔާބު ހޯދިފައިނުވަނީ ޔުއެފާ ޗެމްޕިއަންސް ލީގުގައި އެކަންޏެވެ.

ސިޓީގެ އެއްބަސްވުން ގާޑިއޯލާ އާކުރިއިރު، ސިޓީން އަންނަނީ ބާސާގެ ކެޕްޓަން ލިއޮނަލް މެސީ ހޯދުމަށް މަސައްކަތް ކުރަމުންނެވެ. އެގޮތުން މި ނިމުނު ޓްރާންސްފާގައި ބާސާ ދޫކޮށްލަން މެސީ ނިންމުމާއެކު، ސިޓީން ވަނީ މެސީ ހޯދުމަށް މަސައްކަތް ކޮށްފައެވެ. އަދި ސިޓީއަށް ބަދަލުވުމާ ގުޅޭ ގޮތުން މެސީ އޭނާއަށް ކުރިން އިރުޝާދުދިން ކޯޗު ގާޑިއޯލާއާ މަޝްވަރާކުރި ކަމަށްވެސް އޭރު ރިޕޯޓުކުރިއެވެ.

އެކަމަކު ފަހުން މި ސީޒަނުގައި ބާސާގައި މަޑުކުރަން މެސީ ނިންމުމާއެކު، އަންނަ ސީޒަން ނިމުމުން އޭނާ ހިލޭ ޓްރާންސްފާއެއްގެ ދަށުން ސިޓީއަށް ބަދަލުވާނެ ކަމަށް ރިޕޯޓުތައް ބުނެއެވެ.

އެންމެ ފަހުން އަޕްޑޭޓް ކުރީ: 2 ހަފްތާ ކުރިން | ރިވިއު ކުރީ: ހުސައިން ފަރިޔާޒް

މި ލިޔުން ކިޔާލުމުން

ޚަބަރެއް ނުވަތަ މައުލޫމާތެއް ރާއްޖެއެމްވީ އަށް ދެއްވުމަށް [email protected] އަށް އީމެއިލް ކުރައްވާ ނުވަތަ 3007773 ނަންބަރަށް ގުޅުއްވާ.