ދެވަނަ ފަހަރަށް ޕޮޒިޓިވްވެ ބާސާއާ ދެކޮޅަށް ކުޅުމުގެ ފުރުސަތު ސުއަރޭޒަށް ގެއްލިއްޖެ

އެތުލެޓިކޯ މެޑްރިޑަށް ކުޅެމުން އަންނަ އުރުގުއޭ ފޯވާޑް ލުއިސް ސުއަރޭޒް ކޮވިޑް-19 އަށް ކުރި ދެވަނަ ޓެސްޓުވެސް ޕޮޒިޓިވްވުމާ ގުޅިގެން، މި ހަފުތާ ބަންދުގައި ސްޕެނިޝް ލީގުގައި އެތުލެޓިކޯއިން ބާސެލޯނާއާ ބައްދަލުކުރާ މެޗުގައި ކުޅުމުގެ ފުރުސަތު އޭނާއަށް ގެއްލިއްޖެއެވެ.

ސުއަރޭޒް ކޮވިޑް-19 އަށް ޕޮޒިޓިވްވެފައިވަނީ ބައިނަލްއަގުވާމީ ބްރޭކުގައި އުރުގުއޭގެ ގައުމީ ފުޓްބޯޅަ ޓީމާއެކު ފަރިތަކުރަމުން ދަނިކޮށް މިދިޔަ ހޯމަ ދުވަހުއެވެ. ސުއަރޭޒްގެ އިތުރުން އުރުގުއޭގެ ގައުމީ ފުޓްބޯޅަ ޓީމުގެ ދެ އޮފިޝަލަކުވެސް ވަނީ ވައިރަހަށް ޕޮޒިޓިވްވެފައެވެ. އެއާއެކު ވައިރަހަށް ޕޮޒިޓިވްވި އެންމެ ސެލްފް-އައިސޮލޭޝަނަށް ބަދަލުވެފައިވާ ކަމަށް އުރުގުއޭއިން ވަނީ ހާމަކޮށްފައެވެ.

ސުއަރޭޒް އެންމެ ފުރަތަމަ ކޮވިޑް-19 އަށް ޕޮޒިޓިވްވިއިރު، އޭނާގެ ހަށިގަނޑުން ވައިރަހުގެ އަލާމާތެއް ފެނިފައެއް ނުވެއެވެ. އެހެންކަމުން ބާސާއާ ދެކޮޅަށް ކުޅުމުގެ ފުރުސަތު ސުއަރޭޒަށް އޮތް ކަމަށް ބެލެވުނު ނަމަވެސް، ބުދަ ދުވަހު ކުރި ދެވަނަ ޓެސްޓުންވެސް އޭނާ ވަނީ ވައިރަހަށް ޕޮޒިޓިވްވެފައެވެ.

އެހެންކަމުން އަންނަ ހޮނިހިރު ދުވަހުގެރޭ ސްޕެނިޝް ލީގުގައި އެތުލެޓިކޯއިން ސުއަރޭޒްގެ ކުރީގެ ކުލަބު ބާސާއާ ދެކޮޅަށް ނުކުންނައިރު، އެ މެޗުގައިވެސް އޭނާއަށް ނުކުޅެވޭނެއެވެ. މި މެޗަކީ ސުއަރޭޒް އެތުލެޓިކޯއާ ގުޅުނު ފަހުން ކުރީގެ ޓީމާ ދެކޮޅަށް ކުޅެން ލިބުނު ފުރަަތަމަ މެޗެވެ. މި ފަހަރުގެ ޓްރާންސްފާ ބާޒާރުގައި ބާސާ ދޫކޮށް އެތުލެޓިކޯއަށް ބަދަލުވި ސުއަރޭޒް އަންނަނީ އެ ޓީމުގައި މޮޅު ކުޅުމެއް ދައްކަމުންނެވެ.

މި ސީޒަނުގައި މިހާތަނަށް ސުއަރޭޒް ވަނީ އެތުލެޓިކޯއަށް ލީގުގައި ފަސް ލަނޑު ކާމިޔާބުކޮށްދީފައެވެ. ސްޕެނިޝް ލީގުގެ މި ސީޒަނުގައި މިހާތަނަށް މެޗަކުން ބަލިނުވެ އޮތް ހަމައެކަނި ޓީމަކީ އެތުލެޓިކޯއެވެ. އެތުލެޓިކޯ މި ވަގުތު ލީގުގެ ތިންވަނައިގައި ހަތް މެޗުން 17 ޕޮއިންޓާއެކު އޮތްއިރު، ބާސާ އޮތީ ތާވަލުގެ އަށްވަނައިގައި ހަތް މެޗުން 11 ޕޮއިންޓާއެކުއެވެ.