އެންމެ ބޮޑު އިސްކަމެއް ދިނީ ސިޔާސީ ނުފޫޒުން ސިފައިން އެއްކިބާ ކުރުމަށް: މިނިސްޓަރ
"ކެޕްސްޓޯން ޑޮކްޓްރިން" އެކުލަވައިލައި، އެއަށް ޢަމަލުކުރަން ފެށި
މިނިސްޓަރ މާރިޔާ ވަނީ ސިފައިންގެ އަގުހުރި މަސައްކަތް ފާހަގަ ކުރައްވައި އެކަމަށް ތައުރީފް ކުރައްވާފައި
ސަރުކާރުގެ ފާއިތުވެގެން ދިޔަ 2 އަހަރު އެންމެ އިސްކަމެއް ދެއްވި އެއް ކަމަކީ ސިޔާސީ އެކި ނުފޫޒުން ދިވެހި ސިފައިން އެއްކިބާ ކުރުމަށް ކަމަށް ޑިފެންސް މިނިސްޓަރ މާރިޔާ އަޙުމަދު ދީދީ ވިދާޅުވެއްޖެއެވެ.
ސަރުކާރުގެ 2 އަހަރުގެ ކާމިޔާބީ ފާހަގަ ކުރައްވައި ނެރުއްވި ޚިތާބެއްގައި މިނިސްޓަރ ވިދާޅުވީ، އެންމެ ބޮޑު އިސްކަމެއް ދީފައިވާނީ ސިޔާސީ ހުރިހާ ނުފޫޒަކުން ދިވެހިރާއްޖޭގެ ދިފާޢީ މުއައްސަސާ އެއްކިބާކުރުމަށް ކަމަށެވެ. ހަމައެއާއެކު، ދިވެހި ޤައުމީ ދިފާޢީ ބާރުގެ ހިންގުން އިތުރަށް ހަރުދަނާ ކުރުމަށްޓަކައި، ކަނޑައެޅިފައިވާ ވަކި ހަމަތަކާއި އުޞޫލުތަކެއްގެ މައްޗަށް ހިމެނޭ "ކެޕްސްޓޯން ޑޮކްޓްރިން" އެކުލަވައިލައި، އެއަށް ޢަމަލުކުރަން ފެށުމުގެ އިތުރުން، އަސްކަރީ ޢަދުލުގެ ނިޒާމެއް ޤާއިމްކޮށްފައިވާނެ ކަމަށް މިނިސްޓަރ ވިދާޅުވިއެވެ.
އޭގެ އިތުރުން، ސިފައިންނާއި ފުލުހުންގެ ވެލްފެއަރގެ ކަންކަން އެއްގޮތްކޮށް، ސިފައިންގެ މަރުކަޒުތަކުގެ ތެރެއިން ސިފައިންނަށް ލިބެން ހުންނަ ޚިދުމަތްތަކުގެ ފެންވަރު ވެސް އިތުރަށް ރަނގަޅު ކޮށްފައިވާނެ ކަން މިނިސްޓަރުގެ ޚިތާބުގައި ފާހަގަކުރައްވާފައިވެއެވެ.
މިނިސްޓަރ ވަނީ ރާއްޖެ އިސްލާމްވި ދުވަހުގެ ހެޔޮ އެދުމާއި ތަހުނިޔާ، ރައީސުލްޖުމްހޫރިއްޔާ އަދި ސިފައިންގެ އެންމެ މަތީ ވެރިޔާ އިބްރާހީމް މުޙައްމަދު ޞާލިޙާއި، ޗީފް އޮފް ޑިފެންސް ފޯސް މޭޖަރ ޖެނެރަލް ޢަބްދުﷲ ޝަމާލާއި، އެމްއެންޑީއެފްގެ ލީޑަރޝިޕާއި، އެންމެހާ ސިފައިންނާއި ސިފައިންގެ ޢާއިލާތަކަށް، އަރިސް ކުރައްވާފައެވެ.
މިނިސްޓަރ ވިދާޅުވީ، ރައީސް ޞާލިޙްގެ ވަޢުދުފުޅާ އެއްގޮތަށް، ސިފައިންގެ ޤާބިލްކަން އިތުރުކުރުމަށް ސަރުކާރުން ކުރަމުން ގެންދާ މަސައްކަތުގެ ނަތީޖާއެއްގެ ގޮތުން، މިހާރު ވެސް 600 އެއްހާ ސިފައިން ރާއްޖެއިން ބޭރުގައި ތަމްރީނުވަމުން ދާ ކަމަށެވެ. އަދި ވޭތުވެދިޔަ 2 އަހަރުގެ ތެރޭގައި، ސިފައިންގެ ކޮންމެ 5 މީހެއްގެ ތެރެއިން 3 މީހަކު ވާނީ ކޮންމެވެސް ދާއިރާއަކުން ތަމްރީނުކޮށްފައިކަން މިނިސްޓަރ ފާހަގަ ކުރެއްވިއެވެ.
ރައީސް ޞާލިޙްގެ ސަރުކާރަށް 2 އަހަރު ފުރިގެންދާއިރު، މިދިޔަ 2 އަހަރު، ކަނޑުމަތީގައި ހިނގި 700 ހާދިސާއެއްގައި ގާތްގަނޑަކަށް 2000 އަށްވުރެ ގިނަ މީހުންގެ ފުރާނަޔާއި މުދާ ވަނީ، ސަލާމަތް ކޮށްފައިވެއެވެ. އަދި މާލޭގައި ހިނގައިދިޔަ އަލިފާނުގެ ހާދިސާތަކުން އެކަނި ވެސް ސިފައިންގެ ހިތްވަރާއި ޤާބިލުކަން ފެނިގެން ގޮސްފައިވާކަން މިނިސްޓަރ ފާހަގަކުރެއްވިއެވެ.
